استاناداعى اۆتوبۋستاردا بيلەتسىز ءجۇرۋ ماسەلەسى قالاي شەشىلەدى؟

None
استانا. قازاقپارات - استانا اۆتوبۋستارىندا جول اقىسىن تولەمەيتىندەرگە بايلانىستى جول اقىسىن تولەۋ جۇيەسىن اۋىستىرۋ جوسپاردا بار، - دەپ حابارلايدى Massaget.kz ءتىلشىسى.

مۇنداي ۇسىنىستى «استانا قالاسى كولىك جانە جول-كولىك ينفراقۇرىلىمىن دامىتۋ باسقارماسى» باسشىسىنىڭ ورىنباسارى مىندەتىن اتقارۋشى باۋىرجان تايبەرگەنوۆ ءماسليحات وتىرىسىندا ايتتى.

«سۋبسيديالاۋ جانە جۇمىس تيىمدىلىگى. قالا دا، دەپۋتاتتار دا جولاۋشىلار اعىنىنىڭ قانداي ەكەنىن، ونىڭ قانشاسى تەگىن جۇرگەنىنىڭ ناقتى سانىن بىلمەيدى. ءاردايىم 3-4 ميلليارد تەڭگە سۇرايسىز، جاعداي وزگەرە مە الدە باياعىداي ادامدار اۆتوبۋسقا وتىرىپ، تولەمەي كەتە بەرە مە؟ ەشنارسە وزگەرمەيتىن بولسا، نەگە جاڭا نارسە ساتىپ الىپ، اقشا جۇمسايمىز» - دەپ سۇرادى ءماسليحات دەپۋتاتى ۆلاديسلاۆ سەرگەيەۆ.

تايبەرگەنوۆتىڭ ويىنشا، ەلوردالىق اۆتوبۋستاردا QR- كود ارقىلى جول اقىسىن تولەۋدى الىپ تاستاۋ بيلەتسىز ءجۇرۋ ماسەلەسىن شەشۋگە كومەكتەسەدى.

«ءبىز ەڭ ءبىرىنشى نەگە جول اقىسىن تولەمەيتىندەر بار دەگەن سۇراق قويۋىمىز كەرەك. سەبەبى، QR- كودتار بار. جولاۋشىلار كىرەدى، سكانەرلەيدى، ءبىراق تولەمەيدى. QR- كودتان باس تارتىپ، تەك كارتالاردى پايدالاناتىن بولساق، بۇل ماسەلەنى شەشە الامىز. سوندا جولاۋشىلار كىرگەن كەزدە اقى تولەيدى، ياعني تولەۋگە ءماجبۇر بولادى»، - دەدى تايبەرگەنوۆ.

دەپۋتات بانك كارتالارىن قولدانىپ، قوعامدىق كولىكتە جول اقىسىن تولەۋدىڭ تەستىلەۋ جۇيەسى ەنگىزىلدى مە دەپ سۇرادى.

«نەگە جۇيە ءالى ەنگىزىلمەگەن؟ قانشا ادام تولەمەيتىنى تۋرالى مالىمەتتەر بار ما»، - دەپ سۇرادى دەپۋتات.

اكىمدىك وكىلىنىڭ مالىمەتىنشە، پاندەمياعا دەيىن اۆتوبۋستاردا 850 مىڭ جولاۋشى تولەم جاساعان.

«پاندەمياعا دەيىنگى جىلدارمەن سالىستىرساق، تاۋلىگىنە 200-250 مىڭ ايىرماشىلىق بار. QR- كود ارقىلى تولەمدى الىپ تاستاپ، تەك بانك كارتالارىن ەنگىزسەك، تولەم جاسامايتىن جولاۋشىلار سانى 2-3 ەسە ازايادى. QR- كود سالون بويىنشا ىلىنەدى، جولاۋشى تەكسەرۋشى كىرگەن كەزدە عانا تولەيدى، ەگەر تەكسەرۋشى بولماسا جولاقى دا تولەنبەيدى»، - دەپ جاۋاپ بەردى تايبەرگەنوۆ.

تايبەرگەنوۆتىڭ ايتۋىنشا، استانادا CTS كولىك كومپانياسىنىڭ 60 قا جۋىق، ال جەكە اۆتوپاركتەردىڭ ءوز باقىلاۋشىلارى بار.

سوڭعى جاڭالىقتار