قىزىلوردالىقتار قوڭىر اڭگىمە ءداستۇرىن جانداندىرىپ جاتىر

قىزىلوردا. قازاقپارات - قازاقتا ىلگەرىدەن بەرى قوڭىر اڭگىمە دەگەن تاعىلىمعا تولى ەرەكشە ءداستۇر بولعان.

قىزىلوردا وبلىستىق مادەنيەت جانە سپورت باسقارماسى وسى كونە ءۇردىستى جانداندىرماق، دەپ حابارلايدى قازاقپارات.

«بۇگىندە وسىنداي كەشتى ايماقتا ۇيىمداستىرۋدى قولعا الدىق. سەبەبى قازاقتىڭ سوزىندەگى قوڭىرلىق - تىڭداعان ادامعا تاعىلىم بەرەدى»، - دەپ جازدى ۆەدومستۆودان.

ونداعى مالىمەتتەرگە قاراعاندا، كەزەكتى رۋحاني كەشتىڭ قوناعى قازاقستاننىڭ ەڭبەك سىڭىرگەن قايراتكەرى، «پاراسات» وردەنىنىڭ يەگەرى الماس الماتوۆ بولدى. ال، «قوڭىر اڭگىمە» كەشىنىڭ تۇراقتى مودەراتورى - ايتىسكەر اقىن مۇحتار نيازوۆ.

«التىننىڭ قىمباتى - ازدىعىندا» دەمەكشى، قارا ءسوزدى بيىك ساناعان حالىق «دوستىق» ۇيىندە باس قوستى. ءجۇز جىراۋ شىققان مەكەننىڭ پەرزەنتى الماس الماتوۆ قوڭىر اڭگىمەنى تىڭداۋعا كەلگەن حالىقتى رۋحاني توق قىلدى. «قازىنا» اتتى داستانىن ءدۇيىم جۇرتقا اڭگىمەلەپ، ءازىل ارالاس ماعىنالى كەشتى ءوربىتتى»، - دەلىنگەن جازبادا.

بۇعان قوسا، جيىنعا حالىقارالىق دارەجەدەگى سپورت شەبەرى تيمۋر سىپاتايەۆ قاتىسىپ، كەز كەلگەن ەر-ازاماتتىڭ قولىنان كەلە بەرمەيتىن ونەرىن پاش ەتتى. سونداي-اق، سىربويىلىق ساڭلاقتار دا قوڭىر اڭگىمەمەن بىرگە، قوڭىر ۇنمەن ءان اۋەلەتىپ، ساحنادا ونەر كورسەتتى.