قىرعىزستان پرەزيدەنتى سادىر جاپاروۆ كۇتپەگەن مالىمدەمە جاسادى

استانا. قازاقپارات -قىرعىزستان پرەزيدەنتى سادىر جاپاروۆ كۇتپەگەن مالىمدەمە جاساپ، ايتىسكەر اقىن امانجول التايەۆتىڭ سىنىنا جاۋاپ بەردى، - دەپ حابارلايدى «كابار» اگەنتتىگى.

مەملەكەت باسشىسى سادىر جاپاروۆ كوكپاردان الەم چەمپيوناتىنىڭ اشىلۋىندا قازاقتىڭ اقىنى ءبىرجان قالدىبايەۆقا اسىلتۇقىمدى جىلقى سىيلاعان ەدى. ءبىر اپتادان سوڭ اقىنعا ۋادە ەتىلگەن سىيلىق بەرىلدى. الايدا كەيىن ايتىسكەر اقىن امانجول التايەۆ ءبىرجان قالدىبايەۆتى سىناعان ەدى. قىرعىزستان پرەزيدەنتى سادىر جاپاروۆ اقىننىڭ سىنىنا جاۋاپ بەردى.

«ءيا، باۋىرىمىز امانجول التايەۆتىڭ الەۋمەتتىك جەلىدەگى ۇندەۋىن مەن دە وقىدىم. ارينە، بۇل ىڭعايسىز ۇندەۋ بولدى. ەڭ الدىمەن، «ەلشىگە دە، انشىگە دە ءولىم جوق» دەيدى. ەلشىلەر ءوز جۇمىسىن ىستەيدى. انشىلەر، ءتىپتى اقىندار وزدەرىنە ىڭعايلى جەردە ءان سالادى. سىناپ، ماداقتاپ، بىرنارسە سۇراپ ءان سالادى. ودان كەمشىلىك، ساياسي استار ىزدەۋدىڭ قاجەتى جوق. ەكىنشىدەن، اقىن ءبىرجان قالدىبايەۆ - قىرعىزعا جيەن. مەن - قازاققا جيەنمىن. ءبىز - تۋىسقانبىز. بەسىنشى اتام سولتونقۇلدىڭ ايەلى نووچا قازاقتىڭ قىزى ەدى. ۇشىنشىدەن، ءبىز - قىرعىز بەن قازاق، سوزگە ءمان بەرەتىن حالىقپىز. سول ساتتە ارعىماق سىيعا تارتپاسام، ول كەيىن مەنى انىنە قوسىپ، مۇنى ەسىمە سالاتىن ەدى. اقىن سول ساتتە ماعان ءانىن ارناماسا، مەن ونى كەيىن ەستىگەن بولسام، وندا اڭگىمە باسقاشا بولار ەدى. سوندىقتان امانجول مىرزاعا ايتارىم، وندا تۇرعان ەشتەڭە جوق»، - دەدى ول.

قىرعىزستان پرەزيدەنتىنىڭ ايتۋىنشا، ول بۇرىن ءبىرجان قالدىبايەۆتى مۇلدەم تانىماعان.

«مۇندا ەشقانداي ساياسات جوق. ايتىسكەر اقىن جيەنىمنىڭ رەنىشىنە قالماس ءۇشىن عانا ارعىماقتى سىيعا تارتتىم. مەن ءبىرجان قالدىبايەۆتىڭ قانداي اقىن ەكەنىن دە بىلمەيمىن. مەن ونى بۇعان دەيىن تانىمايتىنمىن. ول كوشە اقىنى اتانعان. قازىر كوشە اقىنى بولسا، كەيىن قازاق، قىرعىز حالقىنا بەلگىلى اقىن بولىپ كەتەر. ول ءالى جاس. شىعارماشىلىعى شىڭدالىپ، تانىمالدىعى ارتۋ ءۇشىن ونى قولداۋ كەرەك. قازاق پەن قىرعىز ءبىر-ءبىرىن قولداۋى كەرەك. قازىرگى جاعداي قيىن. قازاق پەن قىرعىزدىڭ اراسىنا وت سالعىسى كەلەتىندەر بار. ءبىز مۇندايدان اۋلاق بولۋىمىز كەرەك. ارامىزداعى دوستىقتى ساقتايىق»، - دەدى سادىر جاپاروۆ.

ەسكە سالايىق، بۇعان دەيىن قىرعىزستان پرەزيدەنتى سادىر جاپاروۆ قازاق اقىنى ءبىرجان قالدىبايەۆقا ات سىيلاعانىن حابارلاعان ەدىك. بۇل تۋرالى پرەزيدەنت اكىمشىلىگىنىڭ اقپاراتتىق ساياسات قىزمەتىنىڭ باسشىسى دايىربەك ورىنبەكوۆ Facebook-پاراقشاسىندا ايتتى. كەيىن قازاق اقىنى ءبىرجان قالدىبايەۆتى ءماجىلىس دەپۋتاتى، تانىمال ايتىسكەر اقىن امانجول التايەۆ سىناپ تاستادى.