ۋنيۆەرسيتەت وقىتۋشىلارىنا جالاقى تولەۋدىڭ جاڭا جۇيەسى ىسكە قوسىلادى
بۇل تۋرالى ەلورداداعى جوعارى ءبىلىم جانە عىلىم فورۋمىندا پرەمەر-ءمينيستردىڭ ورىنباسارى تامارا دۇيسەنوۆا ايتتى، دەپ حابارلايدى قازاقپارات ءتىلشىسى.
«جالاقىعا قاتىستى پروبلەمانىڭ ءمان-جايىنان حاباردارمىن. جالپى، وسى سالادا ەڭبەكاقى لايىق دەڭگەيدە باعالانۋى كەرەك. گرەيد نەگىزىندە جاڭا جالاقى جۇيەسىن ازىرلەۋ كەرەك. شكالا شەگىندەگى جالاقىنىڭ وزگەرۋى ماماننىڭ قۇزىرەتىنە، جۇمىس ناتيجەلەرىنە بايلانىستى بولادى. مۇنداي جۇيە وتە يكەمدى. مينيسترلىك ەڭبەكاقى تولەۋدىڭ ۇلگىلىك جۇيەسىن ازىرلەۋى قاجەت، كەيىن ول ءاربىر ۇيىمنىڭ ەرەكشەلىكتەرىنە قاراي بەيىمدەلەدى. ياعني وسى قادامدار بۇل جۇمىستىڭ ءبىرىنشى بولىگىندە قامتىلعان»، - دەدى ت. دۇيسەنوۆا.
وسى ورايدا ول پروفەسسورلىق-وقىتۋشىلىق قۇرامعا جالاقى تولەۋدىڭ جاڭا جۇيەسىنە قاتىستى تاپسىرما جۇكتەدى.
«ەگەر ءبىز پروفەسسورلىق-وقىتۋشىلىق قۇرامعا جالاقى تولەۋدىڭ جاڭا جۇيەسىنە كوشەتىن بولساق، وندا ونىڭ گرانتتار قۇنىنىڭ قۇرىلىمىنداعى اسەرىن قاراۋ كەرەك. جاڭا جۇيە جالاقى ۇلەسى قۇرىلىمىنا، سونداي-اق گرانت قۇنىنا دا اسەر ەتۋى مۇمكىن. مينيسترلىك جوعارى وقۋ ورىندارىنىڭ رەكتورلارىمەن بىرلەسە بيىلعى قاراشاعا دەيىن اياقتاۋى ءتيىس. ياعني جىل سوڭىنا دەيىن جوعارى وقۋ ورىندارىنىڭ قىزمەتكەرلەرىنە جالاقى تولەۋدىڭ جاڭا تەتىگى بويىنشا شەشىم قابىلداۋ ءۇشىن وسى جۇمىستى اياقتاۋدى تاپسىرامىن»، - دەدى ۇكىمەت باسشىسىنىڭ ورىنباسارى.
