الماتىدا قايتىس بولعان قىزدىڭ اناسى پرەزيدەنتتەن كومەك سۇرادى
ءوز-وزىنە قول جۇمساۋ فاكتىسى بويىنشا قىلمىستىق ءىس ءبىر جىلدان استام ۋاقىت تەرگەلىپ، قىلمىس قۇرامىنىڭ بولماۋىنا بايلانىستى جابىلعان.
الايدا مارقۇمنىڭ اناسى ايناگۇل بەيىسوۆا تەرگەۋشىلەردىڭ نۇسقاسىمەن كەلىسپەيدى، قىزى كىسى قولىنان قازا تاپقانىن ايتادى. قازاقپارات ءتىلشىسى وقيعانىڭ ءمان-جايىمەن تانىستى.
قىزىنان ايىرلىعان انا پرەزيدەنتتەن كومەك سۇرادى
ءىس توقتاتىلعاننان كەيىن ايناگۇل بەيىسوۆا قىزىنىڭ ولىمىنە كىنالىلەردى تاۋىپ، جازالاۋعا كومەكتەسۋ تۋرالى وتىنىشپەن پرەزيدەنتكە اشىق تۇردە جۇگىنۋدى ۇيعاردى. ول ءىستى تولىق ءارى وبەكتيۆتى تەرگەۋ ءۇشىن ىشكى ىستەر مينيسترلىگىنە بەرۋدى تالاپ ەتۋدە.
ايەل ءوزىنىڭ بەينەۇندەۋىندە وسى ۋاقىتقا دەيىن جۇرگىزىلگەن بارلىق ساراپتامالار مۇنىڭ كىسى ءولتىرۋ ەكەنىن كورسەتىپ وتىرعانىن العا تارتتى.
«دەنەسىندەگى جاراقاتتار سۋيتسيد جاساعانىن جوققا شىعارادى. ونىڭ ۇستىنە سوت-مەديتسينالىق ساراپتامادا دەنەسىندەگى جاراقاتتار ۇشى ۇشكىر دوعال زاتتىڭ اسەرىنەن بولعانىن كورسەتتى. باسىنان العان جاراقاتى، قىزىمنىڭ ءوز اياعىمەن تۇرا الماعانىن دالەلدەيدى. سونداي-اق، ول قاراڭعى جەردە، ەكى مەتردەن اساتىن قورشاۋعا ءوز بەتىمەن شىعىپ، ەشقانداي تىرەۋسىز اعاشقا اسىلىپ قالۋى مۇمكىن ەمەس. ونىڭ ۇستىنە قىزىما دارىگەرلەر ميوپيا ديگنوزىن قويعان، ياعني ەكى كوزىدە -2,5. كوزى ناشار كورەتىن قىزىمنىڭ وزىنە وسىلاي قول جۇمساۋى مۇمكىن ەمەس. وسى تۇسى زەرتتەلمەگەن، ويتكەنى فيزيكالىق تۇرعىدان ءالجۋاز جانە دەنە شىنىقتىرۋدان بوساتىلعان»، - دەيدى ول ۆيدەودا.
سونىمەن قاتار، ول قاراعاندىدا جۇرگىزىلگەن بيولوگيالىق ساراپتامادا قىزىنىڭ كيىمىنەن قان ىزدەرى تابىلعانىن ايتتى. الايدا بۇل تەرىسكە شىعارۋعا بولمايتىن فاكتىلەر تەرگەۋدە ەسكەرىلمەگەن.
«قىزىمدى ەكى ادام ءولتىردى دەگەن كۋاگەرلەردىڭ ءسوزى مەن ايعاقتارى ەسەپكە الىنبادى. ولاردىڭ ايتۋىنشا، قىزىمدى ۇرىپ، كەيىن اسىپ كەتكەن. ونىڭ ۇستىنە ساۋساق ءىزىن تەكسەرگەندە الاقاندا دا، تىرناق استىنان دا، قىزىمنىڭ كيىمىنەن دە ارقاننىڭ تالشىقتارى تابىلعان جوق»، - دەيدى ادەلدىڭ اناسى.
ايناگۇل بەيىسوۆا ءتارتىپ ساقشىلارىنىڭ ارەكەتسىزدىگىنە شاعىمداندى. ونىڭ ايتۋىنشا، پوليتسەيلەر اۋلا تۇرعىندارىنان جاۋاپ الماعان، كورشى كەڭسەلەردەگى كامەرالاردان بەينەجازبانى تالاپ ەتپەگەن، ءۇي-ءۇيدى ارالاماعان.
«تەرگەۋشىلەر كورشىم بەرگەن جاۋاپتى ەسكەرمەدى. كورشىم كىشكەنتاي قىزدىڭ ايقايلاعان داۋىسىن جانە ول شامامەن 3-5 سەكۋندقا سوزىلعانىن، كەيىن «جوووق» دەگەن داۋىس ەستىلىپ، تەمىر زاتقا سوعىلعان ءبىر دىبىستى ەستىگەنىن ايتقان ەدى»، - دەپ ەسكە الادى ايەل.
ونىڭ ايتۋىنشا، ادەل قاتىگەزدىكتى بىلمەيتىن جارقىن جانە پوزيتيۆتى بالا بولعان.
«ادەلدىڭ ومىرگە دەگەن ۇلكەن جوسپارلارى بولدى. مەنىڭ قىزىم يادرولىق فيزيك بولعىسى كەلدى، ونىڭ بولاشاعى جارقىن بولۋى مۇمكىن ەدى، ويتكەنى ادەل سيرەك كەزدەسەتىن اقىلدى جانە ەرەكشە مەيىرىمدى ادام. مەن ادەل تۋرالى وتكەن شاقتا ويلاۋدى جانە ايتۋدى ۇيرەنبەدىم، مەن ءۇشىن ادەل مەنىمەن بىرگە. مەنىڭ باستى مىندەتىم - ءىستى ق ر قىلمىستىق كودەكسىنىڭ 99-بابى (كىسى ءولتىرۋ) بويىنشا ءادىل تۇردە وزگەرتىپ، جان تۇرشىگەرلىك زۇلىمدىق جاساعان قىلمىسكەرلەردىڭ جازالانۋىن قامتاماسىز ەتۋ»، - دەيدى ايناگۇل بەيىسوۆا.
پرەزيدەنتكە جولداعان ۇندەۋىندە ول ءىستى قايتا قاراۋدى جانە تەرگەۋدى ىشكى ىستەر مينيسترلىگىنىڭ بىلىكتى قىزمەتكەرلەرىنىڭ قولىنا بەرۋدى سۇرايدى.
الماتى پوليتسيا دەپارتامەنتى بۇل وقيعاعا قاتىستى بىلاي دەپ جاۋاپ بەردى.
«بۇل وقيعاعا قاتىستى الماتى پوليتسيا دەپارتامەنتى قىلمىستىق كودەكستىڭ 105-بابى (ءوزىن- ءوزى ولتىرۋگە يتەرمەلەۋ) بويىنشا تەرگەۋ جۇرگىزدى. تەرگەۋ ورگانى كامەلەتكە تولماعان ادامدى ءولتىرۋ فاكتىسى بويىنشا ءوزىنىڭ وبەكتيۆتى راستالۋىن تاپپاي، سوت-مەديتسينالىق ساراپتامانىڭ قورىتىندىلارىمەن جانە كۋالاردان جاۋاپ الۋمەن تەرىسكە شىعارىلعان بارلىق دالەلدەردى تەكسەردى»، - دەپ اتاپ ءوتتى ۆەدومستۆودان.
2023 -جىلدىڭ 1-شىلدەسىندە قىلمىستىق قۇقىق بۇزۋشىلىق قۇرامىنىڭ بولماۋىنا بايلانىستى قىلمىستىق ءىس توقتاتىلدى، قاۋلىنى الماتى قالاسىنىڭ پروكۋراتۋراسى بەكىتتى.
