ەل ازاماتتارى شەتەلدەن كوبىنەسە قانداي اۋرۋلاردى جۇقتىرىپ كەلەدى

استانا. قازاقپارات - شەت مەملەكەتتەرگە بارىپ كەلگەن وتانداستارىمىز كوبىنە قانداي اۋرۋ، ينفەكسيا نەمەسە ۆيرۋس جۇقتىرىپ كەلەتىنى انىقتالدى، دەپ حابارلايدى قازاقپارات ءتىلشىسى.

«ەلىمىزدە شەت ەلدەن كەلگەندەر اراسىنان ءجيى انىقتالاتىن دەرت - بەزگەك اۋرۋى. ءبىراق، جىل باسىنان بەرى بەزگەك اۋرۋى تىركەلگەن جوق. سونىمەن قاتار تروپيكالىق ينفەكسيالار بويىنشا قولايسىز ەلدەرگە باراتىن ازاماتتار ساقتىق جانە الدىن الۋ شارالارىن ءبىلۋى قاجەت. ولاردىڭ ىشىندە اسا ءقاۋىپتى جۇقپالى اۋرۋلار - تىرىسقاق، وبا، گەمورراگيالىق قىزۋ كەزىگەدى»، - دەلىنگەن دەنساۋلىق ساقتاۋ مينيسترلىگىنىڭ قازاقپارات ءتىلشىسى جولداعان رەسمي ساۋالعا جاۋابىندا.

ۆەدومستۆونىڭ اقپاراتىنشا، كەيبىر ەلدەردە ينفەكسيالىق اۋرۋدىڭ تابيعي وشاقتارى بار. ونداي جاعدايدا ساقتىق، شەكتەۋ شارالارىن بىلگەن ءجون.

«جۇقپالى اۋرۋلار ىشىنەن تىرىسقاق جانە دەنگە قىزباسى شەتەلدەن كەلگەن وتانداستارىمىزدان نەمەسە ەلىمىزگە كەلگەن وزگە دە مەملەكەت ازاماتتارىنان انىقتالىپ جاتادى. تىرىسقاق جانە دەنگە قىزباسى كوبىنە ءۇندىستان، يندونەزيا، تايلاند، پاكىستان، ەگيپەت ەلدەرىنەن كەلەدى. سوڭعى ءبىر جىلدىڭ ىشىندە دەنگە قىزباسى بويىنشا 3 شەتەلدەن كەلگەن (بانگلادەش جانە تايلاند) جاعدايى تىركەلگەن، ال تىرىسقاق تىركەلگەن جوق»، - دەيدى مينيسترلىكتەن.