11:37, 24 - تامىز 2023 | GMT +6
توك سوققان اقمولالىق تۇرعىن اۋرۋحاناعا ءتۇستى: ءىس قوزعالدى
كوكشەتاۋ. قازاقپارات - اقمولا وبلىسىنىڭ تۇرعىنىن ءوندىرىس ورنىندا توك سوقتى. ەر ادام «قول- اياعىنىڭ ەلەكترلىك كۇيىگى» دياگنوزىمەن اۋرۋحاناعا جەتكىزىلدى، دەپ حابارلايدى قازاقپارات ءتىلشىسى.
وبلىستىق پوليتسيا دەپارتامەنتىنىڭ باسپا ءسوز قىزمەتىنەن ءمالىم ەتكەندەي، وقيعا ستەپنوگور قالاسىندا بولدى. بۇل تۋرالى جەرگىلىكتى پوليتسيا باسقارماسىنا قالالىق اۋرۋحانانىڭ قابىلداۋ بولىمىنەن حابارلاپ ايتقان.
«انىقتالعانداي، ەر ادام قالاداعى كاسىپورىنداردىڭ بىرىندە ەلەكتريك بولىپ جۇمىس ىستەگەن. ءوندىرىس ورنىندا ترانسفورماتوردى جوندەۋ كەزىندە توك سوققان. وسى دەرەككە بايلانىستى قىلمىستىق كودەكستىڭ 156-بابى 1-بولىگى بويىنشا («ەڭبەكتى قورعاۋ زاڭناماسىنىڭ بۇزىلۋى») سوتقا دەيىنگى تەرگەۋ امالدارى جۇرگىزىلۋدە. ساراپتاما تاعايىندالىپ، مەملەكەتتىك ەڭبەك ينسپەكتورى تەكسەرىپ جاتىر»، - دەدى ۆەدومستۆودان.
