كوكونىس شىرىنى قاتەرلى ىسىكتى ەمدەيتىنى راس پا؟

استانا. قازاقپارات - جەلى قولدانۋشىلارى قاتەرلى ىسىك اۋرۋىن ەمدەۋدىڭ «سەنساتسيالىق رەتسەپتىسىن» ءبولىسىپ جاتىر.

وندا اۋرۋدى بالدىركوك، اقجەلكەن، كينزا جانە باسقا دا شوپتەردەن جاسالعان كوكونىس شىرىنىمەن ەمدەۋگە بولادى دەلىنگەن.

الايدا بۇل - جالعان اقپارات، - دەپ حابارلايدى Massaget.kz ءتىلشىسى

قاتەرلى ىسىكتەن ايىعۋدىڭ جىلدام ءادىسى تۋرالى ايتىلعان ۆيدەودا دجۋدا مۇحاممەد اۆاد ەسىمدى دارىگەر ءبىر رەتسەپتىنى بولىسەدى. دارىگەردى ەسىمى بويىنشا جەلىدەن ىزدەۋ ناتيجەسىندە Facebook-تەگى پاراقشا عانا تابىلدى. ول 2021-جىلعى شىلدەدە اشىلعان، وندا سوزىلمالى اۋىرسىنۋدان قۇتىلۋ، سۇيەكتەردىڭ سىنۋىن بولدىرماۋ جانە ناقتى اۋرۋلاردى ەمدەۋ تۋرالى كەڭەستەرى بار بەس ۇقساس ۆيدەو شىققان. پاراقشادا دوكتور اۆادتىڭ قايدا وقىعانى، قاي جەردە جۇمىس ىستەيتىنى جانە ماماندىعى قانداي ەكەنى تۋرالى اقپارات جوق.

جەلىدە پاتسيەنتتەردى قابىلدايتىن وسىنداي دارىگەر تۋرالى دا اقپارات جوق. دوكتور اۆاد جازعان عىلىمي ەڭبەكتەر دە تابىلمادى.

قاتەرلى ىسىكتى بالدىركوك پەن كوكتىڭ شىرىنىمەن ەمدەۋگە كەلەتىن بولساق، ينتەرنەتتەگى دارىگەر عىلىمي زەرتتەۋلەرگە، ەكسپەريمەنتتەرگە نەمەسە دالەلدى مەديتسينا سالاسىندا جۇمىس ىستەيتىن باسقا ءبىر دارىگەرلەرگە سۇيەنبەيدى.

الايدا ا ق ش ۇلتتىق مەديتسينا كىتاپحاناسىنىڭ پورتالىندا بالدىركوكتى وبىر جاسۋشالارىنىڭ كەيبىر تۇرلەرىنىڭ پايدا بولۋىنا قارسى قولدانۋ تۋرالى بىرقاتار ەڭبەك بار.

سيپاتتالعان ەكسپەريمەنتتىڭ بارلىعى جانۋارلاردا نەمەسە جاسۋشا جەلىلەرىندە جۇرگىزىلگەن. قاتەرلى ىسىككە شالدىققان ادامداردا بالدىركوك شىرىنى بويىنشا اۋقىمدى كلينيكالىق زەرتتەۋلەر جۇرگىزىلمەگەن. ياعني، بالدىركوك شىرىنى ءبىر ايدا قاتەرلى ىسىك اۋرۋىن ەمدەي الاتىنىنا سەنىمدى عىلىمي دالەلدەر جوق.

ماماننىڭ ءبىلىم دەڭگەيىن، ونىڭ قانشالىقتى ساۋاتتى ەكەنىن بىلمەي، قاتەرلى ىسىك سياقتى قاۋىپتى اۋرۋدى ينتەرنەتتەگى دارىگەرگە سەنىپ ەمدەگەن دۇرىس ەمەس. ونكولوگيالىق اۋرۋلاردى دالەلدى مەديتسينا ادىستەرىن ۇستاناتىن ماماندارعا بارىپ ەمدەلگەن ءجون.