كومانداسىز جۇرگەن تانىمال فۋتبولشىلار

None
None
استانا. قازاقپارات - ەۋروپاداعى فۋتبول ماۋسىمى باستالىپ كەتتى. جاڭا دوپ دوداسىنىڭ باستالعانىنا قاراماستان، ءالى دە كومانداسىز جۇرگەن تانىمال فۋتبولشىلار بار. ولاي بولسا قايدا بارارىن ويلانىپ جۇرگەن ويىنشىلارمەن تانىستىرا كەتەيىك.

داۆيد دە حەا، قاقپاشى

يسپان قاقپاشىسى 12 جىل بويى «مانچەستەر يۋنايتەدتە» وينادى. جازدا كوماندامەن كەلىسىمشارتى اياقتالىپ، ەركىن اگەنت رەتىندە جاڭا كوماندا تاڭداپ ءجۇر. ال مانكۋنياندىق كوماندا «ينتەردەن» اندرە ونانى ساتىپ الدى. تيبو كۋرتۋا جاراقات العاننان كەيىن «رەال» وسى قاقپاشىعا كوز تىگەدى دەپ كۇتىلگەن. الايدا «كورولدىك كلۋب» تاڭداۋى كەپا اريسابالاگاعا ءتۇستى. ەندى داۆيد دە حەانىڭ قايدا باراتىنى ازىرگە بەلگىسىز. «باۆارياعا» بارىپ قالۋى دا مۇمكىن.

دجەسسي لينگارد، جارتىلاي قورعاۋشى

«مانچەستەر يۋنايتەد» كومانداسىنىڭ بۇرىنعى ويىنشىسى دجەسسي لينگارد تا كوماندا تاپقان جوق. وتكەن ماۋسىمدى «نوتتيگەم فورەست» كلۋبى قاتارىندا وتكىزگەن. قازىر سپورتتىق بابىن جوعالتىپ الماۋ ءۇشىن «ۆەست حەم» كلۋبىمەن بىرگە جاتتىعىپ ءجۇر. جاقىندا رەسەيدىڭ تسسكا كلۋبى كەلىسسوز جۇرگىزگىسى كەلەتىنى جايلى حابارلاعان. كەيىننەن اعىلشىندىق ويىنشىنىڭ كەلمەيتىنى انىقتالعان-دى.

ەدەن ازار، ۆينگەر

«چەلسيدە» مانسابىنىڭ ەڭ جارقىن ساتتەرىن وتكىزگەن بەلگيالىق فۋتبولشى كەيىنگى جىلدارى جانكۇيەرلەر كوزىنە كوپ تۇسە بەرمەيدى. جاراقاتىنا بايلانىستى الاڭعا كوپ شىقپايتىن دا بولعان. «رەالدا» وتكىزگەن 4 جىلدا 76 ويىنعا عانا قاتىستى. جازدا مادريدتىك كلۋبپەن كەلىسكەن تۇردە كەلىسىمشارتىن اياقتادى. مانسابىن اياقتاۋى دا مۇمكىن دەگەن اقپاراتتار تاراعان. الايدا ازارعا بەلگيا، ساۋد ارابياسى مەن اقش كلۋبتارىنان ۇسىنىستار تۇسكەن. الدە مانسابىن اياقتار ما ەكەن؟

سەرحيو راموس، قورعاۋشى

تانىمال فۋتبولشى ءالى جاڭا كوماندا تابا قويعان جوق. كەيىنگى جىلدارى پ س ج ساپىندا ويناپ، مەسسيمەن قاتار كوماندادان كەتتى. سەرحيو راموسقا تۇركيانىڭ «بەشيكتاش» جانە «گالاتاساراي» كوماندالارى ۇسىنىس جاساعان. الايدا يسپان ويىنشىسىنىڭ سۇراعان جالاقىسىنا بۇل كوماندالار كەلىسە قويماعان. «بەشيكتاشقا» اۋىسار بولسا، وتانداسىمىز باحتيەر زاينۋتدينوۆپەن كوماندالاس اتانىپ قالۋى دا مۇمكىن ەدى. قازىر ويىنشى MLS كوماندالارىنان دا ۇسىنىستاردى قاراستىرىپ جاتىر.

الەكسيس سانچەس، شابۋىلشى

چيليلىك فۋتبولشى وتكەن ماۋسىمدى فرانتسيانىڭ «مارسەل» كلۋبىندا وتكىزدى. قازىر كومانداسىز جۇرگەن ويىنشىلار قاتارىندا. الەكسيس سانچەس ەۋروپاداعى «ۋدينەزە»، «بارسەلونا»، «ارسەنال»، «ميۋ»، «ينتەر»، «مارسەل» كلۋبتارىندا ويناعان تاجىريبەلى ويىنشى. ءالى دە ەۋروپانىڭ توپ كلۋبتارى بولماسا دا، ورتاڭقول ۇجىمدارىندا ابىرويمەن ويناۋعا قاۋقارلى.

روبەرتو پەرەيرا، جارتىلاي قورعاۋشى

پەرەيرانىڭ ەسىمى دە حەا جانە راموس سەكىلدى كوپشىلىككە تانىمال ەمەس. ءبىراق 2011-جىلدان بەرى ەۋروپانىڭ توپ ليگاداعى كلۋبتارىندا ويناپ كەلەدى. ول «ۋدينەزە»، «يۋۆەنتۋس» جانە «ۋوتفوردتا» دوپ تەپتى. قول جەتكىزگەن اتاقتارى دا از ەمەس. Transfermarkt اقپاراتى بويىنشا ترانسفەرلىك قۇنى ازار مەن راموستان جوعارى. جۋىق ارادا ەۋروپالىق كوماندالاردىڭ ءبىرىنىڭ قاتارىن تولىقتىرىپ قالار.

مەيسون گرينۆۋد، شابۋىلشى

اعىلشىندىق ويىنشى جارتى جىلدان بەرى الاڭعا شىققان جوق. زورلىق- زومبىلىق بويىنشا ايىپتالعان مەيسون اقتالىپ تا شىقتى. الايدا «مانچەستەر يۋنايتەد» قاتارىنا قايتا قوسقان جوق. 21- تامىز كۇنى قوس تاراپ كەلىسىمىمەن ءوزارا قوش ايتىستى. قازىر شابۋىلشىعا يتاليانىڭ «روما» جانە ساۋد ارابياسىنىڭ «ءال-يتتيفاك» كلۋبتارى قىزىعۋشىلىق تانىتۋدا.

massaget.kz

سوڭعى جاڭالىقتار