بيىلعى «ۇلى دالا جورىعىنىڭ» جەڭىمپازدارى قانشا ميلليون تەڭگەمەن ماراپاتتالادى

استانا. قازاقپارات - قازاقستاندا استانا- تۇركىستان باعىتى بويىنشا «ۇلى دالا جورىعى» مارافون-بايگەسىنىڭ ەكىنشى ماۋسىمى وتەدى، دەپ حابارلايدى قازاقپارات.

جوبا 6- قىركۇيەك ساعات 14.00 دە قاراجار (يلينكا) اۋىلىنان باستالادى.

وسى شارا قارساڭىندا – 5- قىركۇيەكتە ەلورداداعى «قازانات» يپپودرومىندا 18.00 دە رەسپۋبليكالىق ۇلتتىق سپورت تۇرلەرىنىڭ فەستيۆالى اياسىندا جورىقتىڭ سالتاناتتى تۇساۋكەسەرى وتەدى.

ۇزىندىعى 1300 شاقىرىم بولاتىن مارشرۋت اقمولا، قاراعاندى، ۇلىتاۋ، قىزىلوردا جانە تۇركىستان وبلىستارىن باسىپ ءوتىپ، 19- قىركۇيەكتە تۇركىستان قالاسىندا ءوز مارەسىنە جەتەدى.

مارافون 14 بولىككە (ءبىرىنشى جانە سوڭعى كۇنى 50 شاقىرىمنان؛ قالعان كۇندەرى 100 شاقىرىمنان) بولىنگەن.

جوبانىڭ جۇلدە قورى - 65 ميلليون تەڭگە. جەڭىمپاز كوماندا 30 ميلليون تەڭگە، ەكىنشى ورىن يەگەرلەرى - 20 ميلليون تەڭگە، قولا جۇلدەگەرلەر - 15 ميلليون تەڭگە الادى.

مارافون جۇمىسىنا 2 حالىقارالىق، 2 قازاقستاندىق سۋديا جانە 2 حالىقارالىق، 3 قازاقستاندىق ۆەتەرينار شاقىرىلدى.

«ۇلى دالا جورىعى» جوباسىن رەسپۋبليكالىق «JORYQ» ات سپورتى فەدەراتسياسى قازاقستان رەسپۋبليكاسى مادەنيەت جانە سپورت مينيسترلىگىنىڭ، «امانات» پارتياسىنىڭ، ق ر ۇلتتىق سپورت تۇرلەرى قاۋىمداستىعىنىڭ قولداۋىمەن جۇزەگە اسىرادى.

جوبانىڭ باستى سەرىكتەسى - تۋريزم جانە سپورت يندۋسترياسىن قولداۋ قورى. اقپاراتتىق سەرىكتەس - «قازاقستان» ر ت ر ك.