الماتى اۋەجايىندا يتاليادان اكەلىنگەن قوراپتان قۇمىرسقالار تابىلدى
الماتى حالىقارالىق اۋەجايىندا مەملەكەتتىك كىرىستەر دەپارتامەنتىنىڭ «جەتىسۋ» كەدەن بەكەتىنىڭ قىزمەتكەرلەرى تەكسەرىس جۇرگىزۋ بارىسىندا يتاليادان كەلگەن قوراپ ىشىنەن كونديتەرلىك ونىمدەردىڭ ورنىنا ءتىرى جاندىكتەر، بولجام بويىنشا قۇمىرسقالار بار 7 پروبيركا مەن 22 پلاستيكالىق كونتەينەر انىقتادى.
«ەۋرازيالىق ەكونوميكالىق كوميسسيا القاسىنىڭ سىرتقى ەكونوميكالىق قىزمەتتىڭ تاۋار نومەنكلاتۋراسى كودى بويىنشا جابايى ءتىرى جاندىكتەر ەۋرازيالىق ەكونوميكالىق وداقتىڭ كەدەندىك اۋماعىنا اكەلۋگە رۇقسات بەرۋ ءتارتىبى بەلگىلەنگەن تاۋارلار تىزبەسىنە كىرەدى. وسىلايشا، رۇقسات قۇجاتتارىنسىز ءتىرى جاندىكتەردى قازاقستان رەسپۋبليكاسىنىڭ اۋماعىنا زاڭسىز اكەلۋ ارەكەتى توقتاتىلدى»، - دەلىنگەن مەملەكەتتىك كىرىستەر دەپارتامەنتىنىڭ حابارلاماسىندا.
اتالعان دەرەك بويىنشا ماتەريالدار شەشىم قابىلداۋ ءۇشىن ۋاكىلەتتى مەملەكەتتىك ورگانعا جىبەرىلدى.
