قازاقستان حالىقارالىق كينولوگيا فەدەراتسياسىنا مۇشە بولدى
ءسۇيىنشى جاڭالىقتى پرەزيدەنتتىڭ ءىس باسقارۋشىسى ايبەك دادەبايەۆ جەتكىزدى.
«حالىقارالىق كينولوگيا فەدەراتسياسى (FCI) باس اسسامبلەياسىنىڭ وتىرىسىندا قازاقستان كينولوگتارى وداعى وسى ۇيىمنىڭ تولىق قۇقىلى مۇشەسى دەپ تانىلدى. بۇگىن جەنيەۆاداعى جيىندا داۋىس بەرۋ ءراسىمى ءوتىپ، 77 مۇشە مەملەكەتتىڭ 72 ءسى قازاقستاندىق ۇيىمنىڭ كانديداتۋراسىنا قولداۋ ءبىلدىردى. وسى ىسكە اتسالىسقان مەملەكەتتىك قىزمەتكەرلەرگە، ديپلوماتتارعا، قولداپ داۋىس بەرگەن ەلدەرگە جانە FCI باسشىلىعىنا شىنايى العىسىمدى ايتامىن»، - دەپ جازدى ول Telegram پاراقشاسىندا.
قازاقستان كينولوگتارى وداعى ءۇشىن بۇل وتە ماڭىزدى جەتىستىك ەكەنى ءسوزسىز. سونىڭ ارقاسىندا قازاقى ءيت تۇقىمدارىن حالىقارالىق دەڭگەيدە تانىتۋعا جول اشىلىپ وتىر.
«وسى ورايدا قازاقى تازى مەن توبەتتى ساقتاۋ مەن قالپىنا كەلتىرۋ، ولاردى ءتولتۋما قازاقى ءيت تۇقىمدارى رەتىندە تانىتۋ ماسەلەسىنە مەملەكەت باسشىسى قاسىم-جومارت توقايەۆتىڭ نازار اۋدارعانىن اتاپ وتكىم كەلەدى. پرەزيدەنت «تازى - حالقىمىزدىڭ جەتى قازىناسىنىڭ ءبىرى، سوندىقتان بۇل اسىل تۇقىمدى ءيتتى جوعالتىپ الماۋىمىز كەرەك. ۇكىمەت پەن قوعامدىق ۇيىمدار بىرلەسىپ، ءتيىستى ءىس-شارالاردى قولدانۋى قاجەت» دەگەن بولاتىن. مەملەكەت باسشىسىنىڭ تاپسىرماسى بويىنشا، بىلتىر پرەزيدەنت ءىس باسقارماسى وسى ماسەلەنى قولعا الىپ، مەملەكەتتىك ورگانداردىڭ جۇمىسىن ۇيلەستىرۋمەن اينالىستى. جۇمىس توبى قۇرىلىپ، ەكولوگيا جانە تابيعي رەسۋرستار مينيسترلىگى وكىلەتتى ورگان رەتىندە بەكىتىلدى. ۇلتتىق قۇندىلىعىمىز سانالاتىن يت تۇقىمدارىن قورعاۋعا باعىتتالعان زاڭ قابىلداندى. ەندى مىنە، جەنيەۆادان جەتكەن جاڭالىقتىڭ ارقاسىندا قازاقى تازى مەن توبەتتى حالىقارالىق دەڭگەيدە تانىتۋعا باعىتتالعان ۇلكەن قادام جاسالدى. الداعى ۋاقىتتا حالىقارالىق كينولوگيالىق فەدەراتسيامەن، سونىڭ ىشىندە ستاندارتتاۋ جونىندەگى كوميسسيامەن تىعىز بايلانىستا جۇمىس اتقارىلۋى كەرەك. ەكولوگيا جانە تابيعي رەسۋرستار مينيسترلىگى ءوز كەزەگىندە ۇلتتىق تازى مەن توبەت ورتالىعىنىڭ جۇمىسىن جولعا قويىپ، عىلىمي زەرتتەۋلەردى، سالاداعى ماسەلەردى جۇيەلى تۇردە شەشۋدى قولعا الادى دەپ جوسپارلانىپ وتىر»، - دەيدى ايبەك دادەبايەۆ.
ەسكە سالا كەتەيىك، بۇعان دەيىن جەنيەۆادا ۇيىمداستىرىلاتىن «World Dog Show-2023» يتتەر كورمەسىنە قازاقستاننان ەكى تازى قاتىساتىنىن حابارلاعان ەدىك.
كەشە جەنيەۆاداعى وسى جيىندا قازاقستاننىڭ حالىقارالىق كينولوگيا فەدەراتسياسىنا قوسىلۋ ماسەلەسى تالقىلاندى.
