قازاقستان الدىنداعى بۇكىل مىندەتىمىزدەن قۇتىلدىق: قىرعىزستان جامبىل وبلىسىنا سۋ جىبەرۋ جايىندا
مەكەمە اقپاراتى بويىنشا، سۋ قويماسىنىڭ جوبالىق كولەمى - 550 ميلليون تەكشە مەتر. بيىل ودان قىرعىز تاراپى 21- ساۋىردە 445,6 ميلليون تەكشە مەتر كەزىندە سۋ جىبەرە باستادى.
«سۋ قازاقستان مەن قىرعىزستان قول قويعان سۋ ءبولۋ تۋرالى حاتتاما مەن كەستەگە سايكەس بەرىلىپ وتىردى. قازىرگى ۋاقىتتا قىرعىزستان قازاقستان الدىنداعى بار مىندەتىن ورىندادى»، - دەپ اتاپ ءوتتى قىرعىز اۋىل شارۋاشىلىعى مينيسترلىگى.
22- تامىزداعى جاعداي بويىنشا، كيروۆ سۋ قويماسىنىڭ كولەمى - 14,5 ميلليون تەكشە مەتر، بۇل بىلتىرعى جىلمەن سالىستىرعاندا 6,3 ەسە نەمەسە 92,1 ميلليون تەكشە مەترگە كوپ.
بۇگىنگى كۇنى سۋدىڭ كەلۋى سەكۋندىنا 0,7 تەكشە مەتر. كورسەتكىش كوتەرىلىپ جاتقان جوق. 2022-جىلى سۋدىڭ كەلۋى سەكۋندىنا 13,7 تەكشە مەتر بولعان، ياعني 19,6 ەسە كوپ.
قىرعىز رەسپۋبليكاسى ۇلتتىق قاۋىپسىزدىك مەملەكەتتىك كوميتەتى (ۇ ق م ك) شەكارا قىزمەتىنىڭ اقپاراتى بويىنشا، بۇگىن 12:00 دە «اقتىلەك-اۆتودوروجنىي» وتكىزۋ پۋنكتىنىڭ الدىندا قىرعىزستاننان شىعۋ ءۇشىن 430 كولىك كەزەكتە تۇر.
كەشە 18:00 دە كۇتىپ تۇرعان اۋىر جۇك كولىكتەرىنىڭ سانى 370 بولعان.
ءبىر تاۋلىك ىشىندە قازاقستاننان قىرعىزستانعا 274 اۆتوكولىك كىردى.
قىرعىز رەسپۋبليكاسى ۇقمك شەكارا قىزمەتى ەشقانداي شەكتەۋ ەنگىزگەن جوق جانە وتكىزۋ پۋنكتى قالىپتى رەجيمدە جۇمىس ىستەپ تۇر.
بۇل جاعدايعا قىرعىز رەسپۋبليكاسى اۋىلشارۋاشىلىعى مينيسترلىگىنىڭ يرريگاتسيا عىلىمي-زەرتتەۋ ينستيتۋتىنىڭ ديرەكتورى، ەكونوميكا عىلىمدارىنىڭ دوكتورى ۋلان چورتومبايەۆ پىكىر ءبىلدىرىپ، شەكاراداعى ماسەلە بويىنشا قازاقستان بيلىگىنە ۇندەۋ جولدادى.
ەسكە سالايىق، بۇگىن پرەمەر-ءمينيستردىڭ وكىمىمەن سۋ تاپشىلىعى بولعان جامبىل وبلىسىنداعى 6 اۋداندا وڭىرلىك اۋقىمداعى تابيعي سيپاتتاعى توتەنشە جاعداي جاريالاندى.
سونىمەن قاتار بۇگىن وتكەن ۇكىمەت وتىرىسىندا پرەمەر-مينيستر ءاليحان سمايىلوۆ بيىل قۇرعاقشىلىق سالدارىنان جينالاتىن ءونىم كولەمى ازايىپ قالۋى مۇمكىن ەكەنىن ايتتى.
اۋىل شارۋاشىلىعى ءمينيسترىنىڭ ايتۋىنشا، ەگىس القابى قۋراپ كەتكەن جامبىلدىق شارۋالاردىڭ شىعىنى وتەلەدى.
