استانادا الاياقتىق جولمەن اقشا بوپسالاعاندار سوتتالدى

استانا. قازاقپارات - سوت ۇكىمىمەن قىلمىستىق ورتادا بايلانىسى بار ادامدار توبى بوپسالاۋ مەن الاياقتىق جاساعانى ءۇشىن كىنالى دەپ تانىلدى، دەپ حابارلادى قازاقپارات.

باس پروكۋراتۋرانىڭ مالىمەتىنشە، 2016 -جىلى ەلوردا اۋماعىندا كىنالى تۇلعالار وتكىزىلەتىن اۋكتسيون قورىتىندىلارىنا ىقپال ەتۋگە جانە بيزنەس- كەشەن عيماراتىن بەرۋگە ۋادە ەتىپ، جابىرلەنۋشىدەن شامامەن 300 مىڭ ا ق ش دوللارى كولەمىندە اقشالاي قاراجاتتى الداۋ ارقىلى يەلەنگەن.

ودان ءارى قىلمىسكەرلەر جابىرلەنۋشىنىڭ قارجىلىق جاعدايى تۋرالى ءبىلىپ، ۇزاق ۋاقىت بويى قوقان- لوققى، فيزيكالىق زورلىق- زومبىلىق ارقىلى جابىرلەنۋشى مەن ونىڭ تانىسىنان ويدان شىعارىلعان 120 مىڭ ا ق ش دوللارى كولەمىندە جالعان قارىزدى بوپسالاعان.

2021 -جىلعا دەيىن اتالعان قۇقىق بۇزۋشىلىقتار اشىلعان جوق.

تەك استانا قالاسى پروكۋراتۋراسىنىڭ نۇسقاۋلارىنان كەيىن عانا قىلمىستىق ءىس قايتا جاندانىپ، اسا اۋىر قىلمىستار جاسالعانىن كۋالاندىراتىن جەتكىلىكتى جانە جول بەرىلەتىن دالەلدەمەلەر جيناقتالدى.

تەرگەۋ ناتيجەلەرى بويىنشا پروكۋراتۋرا ايىپتاۋ اكتىسىن جاسادى.

سوتتا مەملەكەتتىك ايىپتاۋشىمەن ولاردىڭ كىناسى تۋرالى كۇمانسىز دالەلدەر كەلتىرىلدى.

سوت ۇكىمىمەن كىنالى تۇلعالار ۇزاق مەرزىمگە باس بوستاندىعىنان ايىرۋ جازاسىنا سوتتالدى.

ۇكىم زاڭدى كۇشىنە ەندى.