وتباسى، ايەلدەر، بالالار جانە جاستار ىستەرى جونىندەگى ۋاكىلەتتى ورگان قۇرىلۋى مۇمكىن
بۇل جايىندا ءماجىلىس دەپۋتاتتارىنىڭ ساۋالىنا پرەمەر-مينيستر ءاليحان سمايىلوۆتىڭ جاۋابىندا ايتىلعان، دەپ حابارلايدى قازاقپارات ءتىلشىسى.
«قازىرگى ۋاقىتتا قازاقستان ۇكىمەتى وتباسىلاردى، ايەلدەردى، بالالار مەن جاستاردى قولداۋ بويىنشا جوسپارلى جۇمىس جۇرگىزۋدە. ورتالىق دەڭگەيدە مەملەكەتتىك وتباسىلىق جانە جاستار ساياساتىن ىسكە اسىرۋ جونىندەگى فۋنكتسيالار اقپارات جانە قوعامدىق دامۋ مينيسترلىگىنىڭ جاستار جانە وتباسى ىستەرى كوميتەتىنە جۇكتەلگەن. كوميتەت وتباسى ساياساتى سالاسىندا مەملەكەتتىك ساياساتتى قالىپتاستىرۋ بويىنشا جۇمىس جۇرگىزەدى. مەملەكەتتىك وتباسى ساياساتى سالاسىندا سالاارالىق ۇيلەستىرۋ؛ ورتالىق، جەرگىلىكتى اتقارۋشى ورگاندار مەن وزگە دە سۋبەكتىلەردىڭ وتباسىلىق ساياسات ماسەلەلەرى بويىنشا قىزمەتىن ۇيلەستىرۋ؛ وتباسى ساياساتى سالاسىنداعى نورماتيۆتىك قۇقىقتىق اكتىلەرگە قۇقىقتىق مونيتورينگتى جۇزەگە اسىرۋ بويىنشا جۇمىستاردى جۇزەگە اسىرادى»، - دەپ اتاپ وتەدى ۇكىمەت باسشىسى.
پرەمەر-ءمينيستردىڭ اتاپ وتۋىنشە، بالالاردىڭ قۇقىقتارى مەن ءال-اۋقاتىن قورعاۋعا باعىتتالعان ءتۇرلى باعدارلامالىق قۇجاتتار ءبىلىم بەرۋ سالاسىندا ىسكە اسىرىلاتىندىعىنا بايلانىستى وقۋ-اعارتۋ مينيسترلىگىندە بالالاردىڭ قۇقىقتارىن قورعاۋ كوميتەتى جۇمىس ىستەيدى. ونىڭ مىندەتتەرىنە بالا قۇقىقتارىن قورعاۋ سالاسىنداعى مەملەكەتتىك ساياساتتى ىسكە اسىرۋ، بالالاردىڭ قۇقىقتارى مەن زاڭدى مۇددەلەرىن قورعاۋدى قامتاماسىز ەتۋ، ولاردى كەمسىتۋگە جول بەرمەۋ جانە بالالاردىڭ قۇقىقتارى مەن زاڭدى مۇددەلەرىنىڭ نەگىزگى كەپىلدىكتەرىن نىعايتۋ، سونداي-اق بۇزۋشىلىقتار بولعان جاعدايدا ولاردىڭ قۇقىقتارىن قالپىنا كەلتىرۋ كىرەدى.
«بالالاردىڭ قۇقىقتارىن قورعاۋ كوميتەتى ءبىلىم بەرۋ سالاسىندا بالالاردىڭ قۇقىقتارىنىڭ ساقتالۋىنا مونيتورينگ جانە باقىلاۋ جۇرگىزەدى. ونىڭ ىشىندە ەرتە كەزەڭدەردە بۇزۋشىلىقتار مەن پروبلەمالار انىقتالادى جانە ولاردى جويۋ بويىنشا شارالار قابىلدانادى. بالالاردى ءبىلىم بەرۋ پروتسەسىنە ينتەگراتسيالاۋ جانە تاعى باسقالارى قامتاماسىز ەتىلەدى. سونداي-اق، ەڭبەك جانە حالىقتى الەۋمەتتىك قورعاۋ مينيسترلىگى ءوز قۇزىرەتى اياسىندا ازاماتتاردى الەۋمەتتىك قورعاۋ جانە ارناۋلى الەۋمەتتىك قىزمەتتەر كورسەتۋ بويىنشا كەشەندى جۇمىس جۇرگىزۋدە. ءسىزدىڭ ۇسىنىستارىڭىزدى ەسكەرە وتىرىپ، وتباسى، ايەلدەر، بالالار جانە جاستار ماسەلەلەرى جونىندەگى ءبىر ۋاكىلەتتى ورگاندى ناقتىلاۋ ماسەلەسى پىسىقتالۋدا. ەگجەي-تەگجەيلى قاراستىرىپ، شەشىم قابىلدانعاننان كەيىن قوسىمشا اقپارات جولداناتىن بولادى»، - دەدى ءاليحان سمايىلوۆ.
