پرەزيدەنت باكنين پروۆينتسياسى مەن قازاقستاننىڭ ءبىر ءوڭىرى اراسىندا باۋىرلاستىق قاتىناس ورناتۋدى ۇسىندى

استانا. قازاقپارات - پرەزيدەنت پروۆينتسيالىق كوميتەتتىڭ حاتشىسى، ۇلتتىق جينالىستاعى باكنين پروۆينتسياسى دەپۋتاتتارى دەلەگاتسياسىنىڭ باسشىسى نگۋەن ان تۋانمەن كەزدەستى، دەپ حابارلايدى قازاقپارات اقوردانىڭ رەسمي سايتىنا سىلتەمە جاساپ.

كەزدەسۋ بارىسىندا قازاقستان مەن ۆەتنامنىڭ وڭىرلەرى اراسىنداعى بايلانىستاردى دامىتۋ پەرسپەكتيۆالارى تالقىلاندى.

قاسىم-جومارت توقايەۆ ەلىمىز ۆەتنامنىڭ جانە بۇكىل وڭتۇستىك شىعىس ازيانىڭ ينتەللەكتۋالدىق-وندىرىستىك حابى سانالاتىن باكنين پروۆينتسياسىمەن تىعىز قارىم-قاتىناس ورناتۋعا نيەتتى ەكەنىن اتاپ ءوتتى.

پرەزيدەنت ءوڭىرارالىق جان-جاقتى ىنتىماقتاستىقتى دامىتۋ ماقساتىندا باكنين پروۆينتسياسى مەن قازاقستان وڭىرلەرىنىڭ ءبىرى اراسىندا باۋىرلاستىق قاتىناس ورناتۋدى ۇسىندى.

سونىمەن قاتار اڭگىمەلەسۋ بارىسىندا ينۆەستيتسيا تارتۋ، يننوۆاتسيانى دامىتۋ، ارناۋلى ەكونوميكالىق جانە يندۋستريالىق ايماقتاردىڭ جۇمىستارى، اسا ماڭىزدى شيكىزات ماتەريالدارى مەن جارتىلاي وتكىزگىشتەردى ءوندىرۋ ماسەلەلەرى قاراستىرىلدى.