ماسكەۋدە جەراستى كوللەكتورلارىنا ەكسكۋرسياعا تۇسكەندەر قازا بولدى
وسى ۋاقىتتا جەر استىنا تۇسكەن 5 ادامنىڭ كوز جۇمعانى ءمالىم بولىپ وتىر، دەپ حابارلايدى قازاقپارات تاسس-قا سىلتەمە جاساپ.
«قازىر زاڭسىز ەكسكۋرسياعا قاتىسقان 5 ادامنىڭ قازا بولعانى راستالىپ وتىر. «زاريادە» ساياباعىنا جاقىن ماڭدا تاعى ءبىر ادامنىڭ دەنەسى تابىلدى»، - دەپ جازادى اگەنتتىك دەرەككوزگە سىلتەمە جاساپ. بۇعان دەيىن 4 ادامنىڭ دەنەسى تابىلعانى تۋرالى حابارلانعان بولاتىن.
ديگگەرلەردىڭ(جەراستى پانالارى مەن جەر استىنداعى وزگە دە نىسانداردى زەرتتەۋشىلەر) جوعالعانى تۋرالى 21-تامىز كۇنى تاڭەرتەڭ بەلگىلى بولدى. ماسكەۋدە كەنەت نوسەر جاۋىن باستالىپ، كوللەكتورلار سۋعا تولعان. توتەنشە جاعدايعا قاتىستى قىلمىستىق ءىس قوزعالدى. زاڭسىز ەكسكۋرسيانى ۇيىمداستىرعان تۇلعادان تەرگەۋشىلەر جاۋاپ الىپ جاتىر.
ماسكەۋ مەرى سەرگەي سوبيانين قازا بولعانداردىڭ وتباسىلارىنا كوڭىل ايتىپ، ىزدەستىرۋ جالعاسىپ جاتقانىن جەتكىزدى.
الدىن الا بولجام بويىنشا ديگگەرلەر توبىنىڭ قۇرامىندا سەگىز ادامعا دەيىن بولعان.
