التاي اۋدانىندا كورشىسىنىڭ تەرەزەسىنە مىلتىقتان وق اتقان جىگىت ۇستالدى
ش ق و پوليتسيا دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، التاي قالاسىندا پوليتسياعا قوڭىراۋ شالعان ازامات كەشكى ۋاقىتتا پاتەرىنىڭ تەرەزەسىنە بەلگىسىز بىرەۋدىڭ وق اتقانى جايلى حابار بەردى.
پوليتسيا قىزمەتكەرلەرى كوپقاباتتى ۇيگە بارىپ، جەدەل ىزدەستىرۋ شارالارىن جۇرگىزدى. سونىڭ بارىسىندا كۇدىكتى رەتىندە كورشى پودەزدە تۇراتىن 23 جاستاعى جىگىت ۇستالدى.
ونىڭ ۇيىنە شۇعىل ءتىنتۋ جۇرگىزۋ كەزىندە «ي ج-18 ەم-م» ماركالى ءبىر ۇڭعىلى اڭشىلىق مىلتىقتى، 12 كاليبرلى ءۇش گيلزا مەن 8 وقتى تاپقان.
«بەلگىلى بولعانداي، ۇستالعان ەر ادام جابىرلەنۋشىدەن ءبىر قابات جوعارى تۇراتىن كورشىسىمەن ەرەگەسىپ قالعان. اۋلاعا شىققان ول قاراما-قارسى ۇيدەگى الگى كورشىسىنىڭ تەرەزەسىن ناقتىلاماق بولادى. مىلتىقتى نىساناعا باعىتتاعانىمەن اتىلعان وق ەش كىناسى جوق باسقا تۇرعىننىڭ تەرەزەسىنە ءتيىپ كەتكەن. ال سوزگە كەلىپ قالعان كورشىسىنىڭ تەرەزەلەرى اۋلانىڭ باسقا جاعىنا قارايتىن بولىپ شىقتى»، - دەلىنگەن اقپاراتتا.
اتالعان فاكتى بويىنشا ق ر ق ك-نىڭ 293-بابى 3-بولىگىمەن (بۇزاقىلىق) سوتقا دەيىنگى تەرگەۋ امالدارى باستالدى.
كۇدىكتى 3 تەن 7 جىلعا دەيىنگى مەرزىمگە باس بوستاندىعىنان ايىرىلۋى مۇمكىن.
