استانادا ءۇش مىڭعا جۋىق جارنامالىق ماڭدايشا الىنىپ تاستالدى

استانا. قازاقپارات - جىل باسىنان بەرى ەلوردانىڭ بەس اۋدانىندا ءۇش مىڭعا جۋىق جارنامالىق بيلبورد، ماڭدايشا مەن جارنامالار الىنىپ تاستالدى.

بۇل جۇمىس قالانىڭ سىرت كەلبەتىن ديزاين- كودقا سايكەستەندىرۋ ماقساتىندا جۇرگىزىلىپ جاتىر، دەپ حابارلايدى قازاقپارات استانا اكىمدىگىنىڭ رەسمي سايتىنا سىلتەپ.

عيماراتتاردىڭ قاسبەتىنەن ديزاين كودقا سايكەس كەلمەيتىن جارنامالىق بەلگىلەر مەن باننەرلەر الىنىپ تاستالادى. استانا تۇرعىندارى مۇنداي وزگەرىستەر قالانى ادەمى ءارى زاماناۋي ەتەدى دەپ سانايدى.

جىل باسىنان بەرى ەلوردادا ءۇش مىڭعا جۋىق باننەر، جارنامالىق بەلگى، ونىڭ ىشىندە قالانىڭ ديزاين كودىنا سايكەس كەلمەيتىن دوڭگەلەكتەردەگى جارنامالار الىنىپ تاستالدى.

«مەن قالامىزدىڭ كەلبەتى كۇننەن كۇنگە قۇلپىرىپ كەلە جاتقانىنا قۋانامىن، ول ءبىر ستاندارتقا اينالىپ كەلەدى، ماڭدايشالار الىنىپ تاستالادى، بۇل ءبىزدىڭ ءۇيدى عانا ەمەس، قالانى دا قۇلپىرتا تۇسەدى»، - دەپ ەسەپتەيدى استانالىق ايمان تۇرداحينوۆا.

«جاقسى جۇمىستار جۇرگىزىلىپ جاتىر، قالانىڭ سىرت كەلبەتى رەتكە كەلتىرىلۋدە. وتە دۇرىس دەپ سانايمىن» ، - دەدى ەلوردا تۇرعىنى نۇرمان راحيموۆ.

ايتا كەتەيىك، بەس اۋدان اكىمدىگىنىڭ قىزمەتكەرلەرى زاڭسىز جانە سايكەس كەلمەيتىن جارنامانىڭ ديزاين كودىن ءتۇسىندىرۋ جانە الىپ تاستاۋ بويىنشا كوشپەلى ءىس- شارالار وتكىزەدى.

كاسىپكەرلەرمەن ءتيىستى اڭگىمەلەر جۇرگىزىلەدى، ديزاين كودقا سايكەس كەلمەيتىن ماڭدايشالاردى اۋىستىرۋ قاجەتتىلىگى تۋرالى بۋكلەتتەر بەرىلەدى.

ايتا كەتەيىك، 2023 -جىلدىڭ قاڭتار ايىندا استانانى دامىتۋ ماسەلەلەرى جونىندەگى كەڭەستە پرەزيدەنت قاسىم- جومارت توقايەۆ كوشە جارناماسىن ورنالاستىرۋعا قويىلاتىن تالاپتاردىڭ ساقتالۋىن باقىلاۋدى كۇشەيتۋدى تاپسىرعان بولاتىن.