قاسىم-جومارت توقايەۆ ۆەتنام پرەمەر-ءمينيسترى فام مين چينمەن كەزدەستى

None
Фото: t.me/aqorda_resmi
استانا. قازاقپارات - پرەزيدەنت قاسىم-جومارت توقايەۆ ۆەتنام پرەمەر-ءمينيسترى فام مين چينمەن كەزدەستى، دەپ حابارلايدى اقوردا.

كەزدەسۋدە مەملەكەت باسشىسى بۇگىن پرەزيدەنت ۆو ۆانگ تحىونگپەن ناتيجەلى كەلىسسوز جۇرگىزگەنىن جانە ونىڭ بارىسىندا ەكىجاقتى ىنتىماقتاستىقتىڭ نەگىزگى باعىتتارى تالقىلانعانىن اتاپ ءوتتى.

- بۇگىن تاڭەرتەڭ پرەزيدەنت ۆو ۆان تحىونگپەن وتە ناتيجەلى كەلىسسوز جۇرگىزدىم. ءبىز كوپتەگەن سالاداعى قارىم-قاتىناستارىمىز بەن ىنتىماقتاستىعىمىزدى نىعايتۋعا ىقپال ەتەتىن وتە ماڭىزدى ۋاعدالاستىقتارعا قول جەتكىزدىك. سونداي-اق ۆەتنام كاسىپكەرلەرىمەن كەزدەسۋ وتكىزدىم. ولاردىڭ قازاقستان نارىعىنداعى قىزمەتىن قولداۋعا دايىنمىن. ءبىز ەلىمىزدە ۆەتنامدىق بيزنەستىڭ ۇزاق ۋاقىت جۇمىس ىستەۋىنە شىن مانىندە مۇددەلى بولعاندىقتان كومەك كورسەتەمىز، - دەدى قاسىم-جومارت توقايەۆ.

مەملەكەت باسشىسى بۇگىن قول قويىلعان ساۋدا-ەكونوميكالىق ىنتىماقتاستىقتى جەدەل دامىتۋ جونىندەگى ۇكىمەتارالىق بىرلەسكەن ءىس-قيمىلدار جوسپارى ساۋدا، ينۆەستيتسيا، تەحنولوگيا، اۋىل شارۋاشىلىعى، ترانزيت جانە تۋريزم سياقتى ماڭىزدى سالالار بويىنشا ەكى ەلدىڭ ءوزارا بايلانىستارىن جانداندىرۋعا ىقپال ەتەتىن نەگىزگى قۇجات بولاتىنىنا سەنىم ءبىلدىردى.

ۆەتنام پرەمەر-ءمينيسترى فام مين چين قاسىم-جومارت توقايەۆتىڭ ساپارى قازاقستان مەن ۆەتنامنىڭ ەكىجاقتى ىنتىماقتاستىعىنا تىڭ سەرپىن بەرەتىنىن اتاپ ءوتتى.

- ەكى تاراپ قول قويعان قۇجاتتار مەن كەلىسىمدەر كەلەشەكتە ىنتىماقتاستىعىمىزعا بەرىك نەگىز بولادى. سىزبەن قازاقستان مەن ۆەتنامنىڭ ساياسات، ديپلوماتيا، ينۆەستيتسيا جانە ساۋدا سالالارىنداعى قارىم-قاتىناسىن ودان ءارى دامىتىپ، تەرەڭدەتۋ جولدارىن تالقىلاۋعا مۇددەلىمىز، - دەدى فام مين چين.


سوڭعى جاڭالىقتار