زاينۋتدينوۆقا دەيىن تۇركيادا دوپ تەپكەن قازاقستاندىق فۋتبولشىلار

استانا. قازاقپارات - بيىلعى ماۋسىمنان باستاپ قازاق فۋتبولشىلارى تۇركيادا لەگيونەر بولىپ ەسەپتەلمەيدى.

قازاقستاندىق فۋتبولشىلاردىڭ تۇركيا چەمپيوناتىندا لەگيونەر سانالماۋى ەكى تاراپقا ءتيىمدى بولارى انىق. قازاق فۋتبولشىلارىنا ەۋروپاعا ءبىر جول اشىلسا، تۇركيالىق كلۋبتار ءۇشىن بۇل ءبىر مۇمكىندىك.

تۇركيا سۋپەرليگاسى UEFA كلۋبتار رەيتينگىندە 12-ورىندا. ال ەڭ ۇزدىك كلۋبتارى ەۋروكۋبوكتىڭ توپتىق كەزەڭدەرىندە باق سىناپ ءجۇر.

جۋىردا عانا رەسەيدىڭ تسسكا كلۋبى ساپىندا ويناپ جۇرگەن وتانداسىمىز باحتيەر زاينۋتدينوۆ «بەشيكتاشقا» اۋىستى. ال وعان دەيىن تۇركيا سۋپەرليگاسىندا قازاقستاندىق فۋتبولشىلاردان كىمدەر وينادى؟ بىرگە ەسكە ءتۇسىرىپ كورەيىك.

ەۆگەني ياروۆەنكو («سارىەر»، 1993-1994)

جامبىل وبىلسىنىڭ تۋماسى فۋتبولداعى مانسابىن «فوسفوريت» (قاراتاۋ)، «حيميك» (تاراز) كلۋبتارىندا باستاعان. كەيىننەن «قايراتتا» (الماتى) ويناپ كاپيتان دا بولدى. كييەۆتىڭ «دينامو» كومانداسىنان دا شاقىرتۋ العان.

1993-جىلدىڭ جازىندا تۇركيانىڭ «سارىەر» كومانداسىنا اۋىسقان. وندا قورعاۋشى ءبىر جىلدان اسىق ۋاقىت دوپ تەۋىپ، 29 ويىنعا قاتىسقان. الايدا كلۋب سۋپەرليگاداعى ورنىن ساقتاپ قالا العان جوق.

تۇركيادان كەيىن ياروۆەنكو رەسەي جانە ۋكراينا كلۋبتارىندا وينادى. 90-جىلداردىڭ سوڭىنا قاراي جاتتىقتىرۋشىلىق قىزمەتكە كىرىستى.

الي اليەۆ

«اكچاابات سەباتسپور»، «كايسەري ەردجيەسسپور»، «كارتالسپورت»، «ديارباكىرسپور» - 2006-2011

«قىزىلجار» كومانداسىنىڭ قازىرگى جاتتىقتىرۋشىسى ءتورت بىردەي تۇركيالىق كلۋبتا ويناعان. بۇل كورسەتكىش جاعىنان رەكورد يەسى.

5 جىل ىشىندە تۇركيالىق كلۋبتار ساپىندا 97 ويىنعا قاتىسىپ، 7 گول سوققان. الايدا الي اليەۆ ويناعان كلۋبتار قازىر كاسىبي دەڭگەيدە ەمەس.

«اكچاابات» جانە «كايسەري ەردجيەسسپور» كلۋبتارى تاراتىلىپ كەتسە، «كارتالسپورت» پەن «ديارباكىرسپور» قازىر اۋەسقوي دەڭگەيگە ءتۇسىپ قالعان.

داۆيد لوريا

«ريزەسپور» - 2012-2013، «كارشياكا» - 2014-2015

قازاقستاندىق تانىمال قاقپاشى تۇركيا چەمپيوناتىنا 30 جاسىندا اۋىسىپ باردى. وعان دەيىن قازاقستاننان بولەك، اۋستراليا، شۆەتسيا جانە رەسەي كلۋبتارىندا ويناعان.

2012-جىلدىڭ جازىندا قاقپاشى تۇركيا ءبىرىنشى ليگاسىنداعى «ريزەسپور» كومانداسى قاتارىن تولىقتىردى. نەگىزگى قاقپاشى بولىپ، كوماندانىڭ جوعارعى ليگاعا وتۋىنە كومەگىن تيگىزدى. الايدا كوماندادا قالعان جوق. «قايراتقا» كەلىپ، ودان كەيىن تاعى دا تۇركيا جەرىنە تابان تىرەدى.

ءبىر جىلدان كەيىن لوريا ەكىنشى ليگاداعى «كارشياكا» كومانداسىنا باردى. وندا 8 ويىن عانا وتكىزىپ، تۇرىك جەرىندەگى ساپارىن اياقتادى.

قاقپاشى تۇركيالىق كلۋبتار ساپىندا 41 ويىنعا قاتىسىپ، 41 گول وتكىزدى. 15 ويىندا قاقپاسىنا گول وتكىزبەدى. ودان كەيىنگى مانسابى ەلىمىزدە جالعاستى.

سامات سماقوۆ

«ريزەسپور» كلۋبىندا داۆيد لوريا جالعىز بولعان جوق. سامات سماقوۆپەن بىرگە وينادى. سامات بولسا جارتى ماۋسىم ويناپ، 16 كەزدەسۋگە قاتىستى. نەگىزگى قۇرام ويىنشىسى بولىپ، كوماندانىڭ جوعارعى ليگاعا شىعۋىنا سەپتىگىن تيگىزدى. كەيىننەن ەلگە ورالىپ، 2017-جىلى مانسابىن اياقتادى.

انتون چيچۋلين («گيرەسۋنسپور»، 2014)

قازاقستان قۇراماسىندا 24 ويىن وتكىزگەن قورعاۋشى 2014-جىلى تۇركيانىڭ «گيرەسۋنسپور» كومانداسىمەن كەلىسىمشارتقا قول قويدى. ءبىراق ونىڭ بۇل ساپارى ۇزاققا سوزىلمادى. تۇركيانىڭ ءبىرىنشى ليگاسىندا جارتى ماۋسىمدا 10 ويىنعا قاتىسىپ قايتتى. ءبىر گول، ءبىر ناتيجەلى پاس بەردى.

فۋتبولداعى مانسابىن ەلگە كەلىپ اياقتادى.

ميكاەل اسقاروۆ

20 جاستاعى قورعاۋشى فۋتبولداعى جولىن تۇركيانىڭ «فەنەرباحچە» جانە «ادانا دەميرسپور» جاس وسپىرىمدەر كومانداسىندا باستاعان. قازىرگى «قايرات» ويىنشىسى ءبىرىنشى ليگاداعى «ەكىباستۇزدا» جالدا ويناپ ءجۇر.

شىمكەنت قالاسىندا دۇنيەگە كەلگەن. 8 جاسىندا وتباسىمەن تۇركياعا قونىس اۋدارعان.

تۇركياداعى جاس وسپىرىمدەر كومانداسىندا 31 ويىنعا قاتىسقان.

الەكساندر مەركەل («گازيانتەپ»، 2021-2023)

2021-جىلدىڭ جازىندا قازاقستان قۇراماسىنىڭ ەكس-جارتىلاي قورعاۋشىسى «گازيانتەپ» كلۋبىنا اۋىستى. وعان دەيىن ەۋروپا كلۋبتارىندا ويناپ كەلگەن.

2023-جىلدىڭ اقپان ايىنا دەيىن الەكساندر ءساتتى ويناپ كەلدى. الايدا تۇركياداعى جەر سىلكىنىسىنەن گازيانتەپ قالاسى كوپ زارداپ شەكتى. كوماندا چەمپيوناتتان شىعىپ، ويىنشىلار تارادى. ال مەركەل بولسا ەركىن اگەنت رەتىندە قازىر جاڭا كوماندا قاراستىرۋدا.

«گازيانتەپ» كومانداسىندا 44 ويىنعا قاتىسىپ، 4 گول سوقتى. 3 ناتيجەلى پاس بەردى.

باحتيەر زاينۋتدينوۆتان بولەك «زەنيتتە» وينايتىن ءنۇرالى ءالىپ تە تۇركيالىق كلۋبقا اۋىسادى دەگەن اقپارات تاراعان. بۇل ءالى ناقتىلانبادى. سونداي-اق ۇلتتىق قۇراما مەن «ورداباسىنىڭ» كاپيتانى اسحات تاعىبەرگەنگە دە تۇركيالىق كوماندالاردىڭ ءبىرى قىزىققان دەگەن دە اقپارلار بار.

massaget.kz