قازاقستان شاحتاسى قاساقانا ورتەلگەنى راس پا

استانا. قازاقپارات - كەيبىر اقپارات اگەنتتىكتەرى مەن الەۋمەتتىك جەلىلەردە قاراعاندى وبلىسىنىڭ پوليتسيا دەپارتامەنتىنە سىلتەمە جاساي وتىرىپ «قازاقستان» شاحتاسى قاساقانا ورتەلدى دەگەن مالىمەت تارادى.

قاراعاندى وبلىسى پ د باسپا ءسوز قىزمەتى بۇل اقپاراتتى جوققا شىعاردى، دەپ حابارلايدى قازاقپارات.

قازىرگى كەزدە ءتيىستى تەرگەۋ امالدارى جۇرگىزىلىپ جاتىر، ءورتتىڭ سەبەبىن انىقتايتىن ساراپتامالار تاعايىندالدى.

«وبلىس تۇرعىندارىنان ىقتيمال قاۋەسەت پەن ارانداتۋشىلىققا بەرىلمەۋىن، تەك رەسمي اقپاراتقا جۇگىنۋىن سۇرايمىز» دەپ ەسكەرتتى ۆەدومستۆودان.

ەسكە سالا كەتەيىك، ق ر قىلمىستىق كودەكسىنىڭ 274-بابىنا سايكەس كورىنەۋ جالعان اقپارات تاراتقانى ءۇشىن قىلمىستىق جاۋاپكەرشىلىك بار.

ەسكە سالساق، 17- تامىز كۇنى قاراعاندى وبلىسىنداعى «قازاقستان» شاحتاسىندا ءورت تۇتاندى.

اپات كەزىندە جەر استىندا 227 كەنشى بولدى. 222 ادامدى جەر بەتىنە جەدەل كوتەرۋ مۇمكىن بولدى، سەگىزى زارداپ شەكتى.

شاحتانىڭ استىندا قالىپ قويعان بەس كەنشىنىڭ دەنەسى تابىلدى.

18- تامىزداعى جاعداي بويىنشا مەديتسينا مەكەمەلەرىندە ورتتەن زارداپ شەككەن 11 كەنشى ەم قابىلداپ جاتىر.

ەڭبەك جانە حالىقتى الەۋمەتتىك قورعاۋ مينيسترلىگى ەڭبەك جانە الەۋمەتتىك قورعاۋ كوميتەتىنىڭ ءتوراعاسى تولەگەن وسپانقۇلوۆ ءمالىم ەتكەندەي، «قازاقستان» شاحتاسىنداعى اپات ءۇشىن جاۋاپتى تۇلعا 7 جىلعا دەيىن تۇرمەگە قامالۋى مۇمكىن.

پرەزيدەنت قاسىم-جومارت توقايەۆ ءورت سەبەبىن انىقتاۋ ءۇشىن جان-جاقتى تەرگەۋ جۇرگىزۋدى تاپسىردى.