استانا پروكۋراتۋراسى اكىمدىك قىزمەتكەرلەرىن تەكسەرۋ ءۇشىن انتيكورعا ماتەريالدار جولدادى

استانا. قازاقپارات - استانا قالالىق پروكۋراتۋراسى ەلوردا اكىمدىگىندەگى جەر، ساۋلەت جانە قالا قۇرىلىسى زاڭناماسى سالاسىنداعى كوپتەگەن ولقىلىقتاردى انىقتادى.

لاۋازىمدى تۇلعالاردىڭ ءىس-ارەكەتىن باعالاۋ ءۇشىن جينالعان ماتەريالدار ەلوردالىق سىبايلاس جەمقورلىققا قارسى قىزمەتكە جولدانعان، دەپ حابارلايدى قازاقپارات ءتىلشىسى.

«پروكۋراتۋرا جۇرگىزگەن تەكسەرىس ناتيجەسىندە كوپتەگەن بۇزۋشىلىقتار انىقتالدى. ونىڭ ىشىندە ناقتى جوسپار جوباسىنا وزگەرىس ەنگىزۋ، مەملەكەتتىك جەرلەردى بەرۋ، جوبالاۋ جۇمىستارىنا رۇقسات ەتۋ، سونداي-اق ەسكيزدىك جوبالاردى كەلىسۋ تۋرالى شەشىمدەر قابىلداۋ ارەكەتتەرى بار»، - دەلىنگەن ەلوردالىق پروكۋراتۋرانىڭ قازاقپارات ءتىلشىسىنىڭ ساۋالىنا جولداعان جاۋابىندا.

ۆەدومستۆودان اتاپ وتكەندەي، انىقتالعان فاكتىلەر بويىنشا قاداعالاۋ اكتىسى شىعارىلعان. بۇگىنگدە اكىمدىك انىقتالعان ولقىلىقتاردى جويۋ ءۇشىن جۇمىستار جۇرگىزۋدە.

«سونىمەن قاتار، لاۋازىمدى تۇلعالاردىڭ ءىس-ارەكەتتەرىنە باعا بەرۋ ءۇشىن اقپاراتتار ەلوردالىق سىبايلاس جەمقورلىققا قارسى قىزمەتكە جىبەرىلدى»، - دەپ ءمالىم ەتتى پروكۋراتۋرادان.

قۇزىرلى ورگان تەكسەرۋ ناتيجەلەرىن ەگجەي-تەگجەي بايانداعان جوق.

ەسكە سالايىق، تاياۋدا ب ا ق بەتتەرىندە 2019-2022-جىلدار ارالىعىندا جەر ۋچاسكەلەرىن بەرۋگە جانە قالادا قۇرىلىس سالۋعا جاۋاپتى استانا اكىمدىگىنىڭ بولىمشەلەرىن تەكسەرۋ ءجۇرىپ جاتقانى تۋرالى اقپارات تارادى. بۇل ارالىقتا ەلوردا اكىمى لاۋازىمىندا التاي كولگىنوۆ قىزمەت ەتتى. پروكۋراتۋرا ماماندارى باستاپقىدا ونداعان مەكتەپ، اۋرۋحانا مەن بالاباقشا سالۋ جوسپارلانعان ۋچاسكەلەردىڭ ناقتى جوباسىنا تۇزەتۋ ەنگىزۋدىڭ 61 فاكتىسىن انىقتاعان. تيىسىنشە، ءبىلىم وردالارى مەن مەديتسينالىق ۇيىمدار بوي كوتەرۋى ءتيىس جەرلەرگە تۇرعىن ۇيلەر سالىنعان.