قايتارىلعان اكتيۆتەردى باسقارۋ كومپانياسىنا قانداي ماماندار تارتىلادى
سەرىكتەستىك قارجى مينيسترلىگىنىڭ مەملەكەتتىك مۇلىك جانە جەكەشەلەندىرۋ كوميتەتىنىڭ قاراماعىندا بولۋى مۇمكىن، دەپ حابارلايدى قازاقپارات ءتىلشىسى.
قارجى مينيسترلىگىنىڭ مالىمەتىنشە، كومپانيانىڭ جالعىز قۇرىلتايشىسى جانە قاتىسۋشىسى - قازاقستان رەسپۋليكاسىنىڭ ۇكىمەتى.
«شتات سانى ۇلكەن ەمەس، شامامەن 15-20 ادامعا دەيىن بولادى. شتات زاڭگەرلىك جانە ەكونوميكالىق ءبىلىمى بار، شەت تىلدەرىن مەڭگەرگەن مامانداردان جاساقتالادى دەپ جوسپارلانىپ وتىر»، - دەلىنگەن قازاقپارات ءتىلشىسىنىڭ ساۋالىنا جولدانعان مينيسترلىك جاۋابىندا.
ۆەدومستۆودان ءمالىم ەتكەندەي، بۇل كومپانيانى كىم باسقاراتىنى، باسشىعا قانداي تالاپ قويىلاتىنى جانە قىزمەتكەرلەردىڭ قاي عيماراتتا جۇمىس ىستەيتىنى تۋرالى ماسەلەلەر پىسىقتالىپ جاتىر.
جاۋاپكەرشىلىگى شەكتەۋلى سەرىكتەستىك تۋرالى زاڭدا كوزدەلگەن ورگانداردان باسقا، كومپانيادا قامقورشىلىق كەڭەسى قۇرىلادى. ونىڭ قۇرامىنا قر پارلامەنتىنىڭ دەپۋتاتتارى، قوعام وكىلدەرى مەن تاۋەلسىز ساراپشىلار ەنۋى مۇمكىن.
كومپانيانى قارجىلاندىرۋ ەكى كوزدەن جۇرگىزىلۋى ىقتيمال. اتاپ ايتقاندا، الداعى جىلعا ارنالعان رەسپۋبليكالىق بيۋدجەتتەن قارجىلاندىرۋ بولماعان جاعدايدا، ءوز قىزمەتى ءۇشىن كوميسسيالىق سىياقى ەسەبىنەن نەمەسە شىعىندار رەسپۋبليكالىق بيۋجەت قاراجاتىنان جابىلادى.
«كوميسسيالىق سىياقىلاردىڭ مولشەرى ءتيىستى قارجى جىلىنداعى باسقارۋشى كومپانيانىڭ اعىمداعى شىعىندارىن قارجىلاندىرۋعا قاجەتتى قاراجات كولەمىمەن شەكتەلەدى»، - دەپ ءتۇسىندىردى قارجى مينيسترلىگىنەن.
ەسكە سالايىق، بۇعان دەيىن «قايتارىلعان اكتيۆتەردى باسقارۋ جونىندەگى كومپانيا» قۇرىلاتىنىن جازىپ ەدىك.
