استانالىق مۇعالىم: ورىس سىنىبىنا المايمىز دەسەك، اتا-انالار قوقان-لوقى كورسەتەدى

استانا. قازاقپارات - سوڭعى ەكى-ءۇش كۇندە الەۋمەتتىك جەلى استانا قالاسىندا ءبىرىنشى سىنىپقا بارعان بالالاردىڭ اراسىندا ورىس ءتىلىن تاڭداعانداردىڭ كوبەيگەنى رەزونانس تۋدىردى.

وسى رەتتە ەلورداداعى №65-مەكتەپ ديرەكتورىنىڭ بەيىمدىك وقىتۋ جونىندەگى ورىنباسارى مايرا مىرزاحمەتوۆا بۇل اتا-انالارعا بايلانىستى بولىپ وتىرعانىن ايتىپ، پوست جاريالاعان. Qaz365.kz ءتىلشىسى وزىمەن حابارلاستى.

«بۇل ماسەلە بارلىق اتا-انالارعا بايلانىستى. اتا-انا قازاق نەمەسە ورىس سىنىبىنىڭ قايسىسىن قالاسا، سوعان بەرە الادى. سوڭعى ەكى-ءۇش جىل كولەمىندە قۇجاتتاردى قابىلداۋ ۋاقىتىندا ديرەكتور ەڭبەك دەمالىسىنا كەتىپ، ورنىنا مىندەتىن اتقارۋشى بولىپ قالىپ ءجۇرمىن. بايقاعانىم، ورىس سىنىبىنا وقىتقىسى كەلەتىندەر كوپ.

«سىنىپقا بالا جيناۋ تولدى. 30 بالا قۇجات تاپسىرىپ ۇلگەردى» دەپ ايتساڭ دا، 31-32-شى رەتىندە قوسقىسى كەلەتىندەر جەتەرلىك. ايتقاندارىن تىڭداماساڭ، وقۋ-اعارتۋ مينيسترلىگىنە، قالالىق ءبىلىم باسقارماسىنا ارىز جازادى. الەۋمەتتىك جەلىنى شۋلاتادى. ءوز قۇقىقتارىن تالاپ ەتەدى. ءبىر قىزىعى، سول اتا-انالار بىزبەن قازاق تىلىندە سويلەسەدى»، - دەيدى مايرا مىرزاحمەتوۆا.

ونىڭ ايتۋىنشا، استانا قالاسى ءبىلىم باسقارماسىنىڭ باسشىسى قاسىمحان سەنعازىيەۆ مەكتەپ ديرەكتورلارىنا ورىس سىنىپتارىن ازايتۋدى تاپسىرىپتى. قازاق تىلىنە جاناشىر ەكەنىن ايتىپ وتىر. ءبىراق اتا-انالاردىڭ قالاۋى باسقاشا بولعاندىقتان، ورىس تىلىنە بالاسىن بەرەتىندەردىڭ سانى ازايماي تۇرعان كورىنەدى.

«قاسىمحان سەنعازىيەۆ جينالىستا ءبىراز ديرەكتورلارعا ەسكەرتۋ جاسادى. تازا ورىسشا جانە ارالاس مەكتەپتەردىڭ اراسىندا ورىس سىنىپتارى كوبىرەك مەكتەپتەر بار. ولارعا ناسيحات جۇمىستارى كەمشىن ەكەنىن ايتىپ، ەسكەرتۋ بەردى. سىزدەردىڭ اۋداندا نەگە قازاق بالالارى ورىسشا وقيدى دەپ ءبىراز ديرەكتوردان سۇراعاندا، اتا-انالار تالاپ ەتەدى، ءبىز نە ىستەي الامىز دەگەندەر بار. مەن ىستەيتىن مەكتەپتە 1-سىنىپتار بويىنشا 6 قازاق سىنىبى، 6 ورىس سىنىبى اشىلعان. ياعني تەڭبە-تەڭ بولىپ ەدى. ورىس سىنىبىن ەندى اشپايمىز، وسىمەن توقتاتامىز دەپ ويلاعانبىز. ءبىراق ايقاي-شۋ، جانجال كوبەيىپ كەتتى. قورقىتادى، ۇركىتەدى. اتا-انالاردىڭ ادەبى جوق. بىردەن تەلەفوندارىن قوسىپ، تۇسىرە باستايدى. سوسىن ءبىلىم باسقارماسىنا بارادى»، - دەيدى مۇعالىم.

ول وسى رەتتە قازاق اتا-انالارىن كوندىرۋگە تىرىسقانىن ايتىپ قالدى. اراسىندا ورىن جوق دەگەن سوڭ، امال جوق كونگەن 10 شاقتىسى بولىپتى. كەيىن مۇمكىندىك بولىپ جاتسا، ورىس سىنىبىنا اۋىستىرىپ الايىق دەيتىن كورىنەدى. الايدا باسىم كوپشىلىگى كەلىسپەيدى ەكەن.

«وزگە ۇلت وكىلدەرى كەلىپ جاتسا، ۇسىنىس رەتىندە قازاق سىنىبىنا بەرسەڭىزدەر قايتەدى دەپ ايتامىز. ءبىراق قيناۋعا قاقىمىز جوق. بالاباقشادان ورىسشا وقىپ جۇرگەنىن العا تارتىپ، سوسىن ءارى قاراي جالعاستىرادى»، - دەيدى ديرەكتوردىڭ ورىنباسارى.

ول بۇل رەتتە ورىس سىنىبىنا بەرگىسى كەلەتىن اتا-انالاردىڭ ۋاجدەرىنە توقتالدى.

«اتا-انالار بالالارىنىڭ ءتىلى ورىسشا شىققانىن ايتادى. ويتكەنى تەلەفون ارقىلى ورىسشا ۇيرەنىپ العاندار. اينالامدا جۇرگەن مۇعالىمدەر دە سولاي ايتادى. الىپ كەلگەندە تۇگەل ورىسشا سويلەپ تۇرادى. ۇيلەرىندە تۇگەل قازاقشا سويلەيتىن وتباسىلاردىڭ وزىندە وسى جاعداي. بالكىم، وزدەرى تالاپ ەتپەيتىن شىعار. سوسىن بار جاۋاپكەرشىلىكتى بالاباقشاعا اۋدارا سالادى. مەكتەپتە قازاقشا وقىپ جۇرگەندەردىڭ اراسىندا دا ءتىلدى تولىق تۇسىنبەيتىندەر جەتەرلىك. ءبىر سىنىپتا 30-32 وقۋشى وقيدى. اراسىندا بىرەۋى ءتورت بالاعا تاتيتىن ينكليۋزيۆ بالالار دا بار. مۇعالىم ءارقايسىسىنا ۇلگەرمەيدى. اتا-انالارىنا قازاقشاسىن جەتىلدىرۋگە كومەكتەس دەسەڭ، قولدارى تيمەيتىنىن ايتىپ، قاشا جونەلەدى. مەكتەپ نەمەن اينالىسادى دەپ وزىمىزگە ۇرىسادى»، - دەيدى مۇعالىم.

ونىڭ ايتۋىنشا، ءبىلىم باسقارماسىنىڭ باسشىسى قاسىمحان سەنعازىيەۆتىڭ ءوتىنىشى بويىنشا قازاق سىنىپتارىن كوبەيتۋگە ناسيحات جۇمىستارىن جۇرگىزگەن. اتا-انالار چاتتارىنا روليكتەر جىبەرگەن. اتا-انالاردى شاقىرىپ، تۇسىندىرگەن.

مايرا مىرزاحمەتوۆا ىستەيتىن №65-مەكتەپتە 3500 بالا وقيدى. ال مەكتەپ 1200 بالاعا ارنالاسقان. سوندىقتان الداعى ۋاقىتتا ءۇش اۋىسىم بولۋى مۇمكىن دەپ وتىر.

ايتا كەتەيىك، بيىل استاناداعى ءبىلىم بەرۋ مەكەمەلەرى ءبىرىنشى سىنىپقا 26650 وقۋشىنى قابىلدادى. ونىڭ ىشىندە 15929 قازاق تىلىندە، 10571 ورىس تىلىندە.