اقمولالىق قولونەر شەبەرى ۇلتتىق قۇندىلىقتارىمىزدى دارىپتەپ ءجۇر - فوتو

كوكشەتاۋ. قازاقپارات - اسقان توزىمدىلىكتى، ەپتىلىكتى تالاپ ەتەتىن ونەردە وزىندىك قولتاڭباسى قالىپتاسقان اقمولالىق شەبەر، سەلينوگراد اۋدانى قوياندى اۋىلى مەكتەبىنىڭ ۇستازى باحشاگۇل بايدولدا قىزى وسى كۇنى زەرگەرلىك بۇيىمدار، قۋىرشاقتار مەن مۇسىندەردىڭ ءتۇر-ءتۇرىن جاسايدى.

تەحنولوگيا ءپانىنىڭ مۇعالىمى تۋىندىلاردى جاساۋدى 2015 -جىلى قولعا العان.

سودان بەرى ۇلتتىق بولمىسىمىزدى ايشىقتايتىن زەرگەرلىك ونەردى دامىتۋعا ەلەۋلى ۇلەس قوسىپ كەلەدى، دەپ حابارلايدى قازاقپارات ءتىلشىسى.

باحشاگۇل بايدولدا قىزى ونەرلى وتباسىنان شىققان. جاقىندارىمەن بىرگە شىعارماشىلىقپەن اينالىسقاندى ۇناتادى. ينە مەن ءجىپتى جانىنا سەرىك ەتكەن شەبەردىڭ جاساعان زەرگەرلىك بۇيىمدارى ەرىكسىز كوزدىڭ جاۋىن الىپ، تاڭداي قاقتىرادى.

كوپتەگەن حالىقارالىق، رەسپۋبليكالىق سايىستارعا قاتىسىپ، جۇلدەلى ورىندارعا يە بولىپ جۇرگەن ۇستاز ءوزىنىڭ بار بىلگەنىن شاكىرتتەرىنە ۇيرەتىپ كەلەدى. بۇگىندە ونەرگە قىزىعۋشىلىق تانىتقان شەبەردىڭ شاكىرتتەرى رەسپۋبليكالىق بايقاۋلاردا جۇلدەلى ورىن الىپ ءجۇر.

«كەز كەلگەن ۇستازدىڭ مىندەتى - شاكىرت تاربيەلەۋ. ۇستاز رەتىندە مەن دە قازاقتىڭ ۇلتتىق ونەرىن جاقسى تانيتىن شىعارماشىل ءىزباسارلار تاربيەلەۋدى ماقسات ەتىپ وتىرمىن. قازىر زامان تالابىنا ساي قۇندى دۇنيەنى كەز كەلگەن زاتتان جاساۋعا بولادى. وسى رەتتە، قايتا سۇرىپتاۋ ارقىلى قالدىق زاتتاردان ادەمى دۇنيەلەر جاسايمىز، ونىڭ ناتيجەسىن كورگەندە كوڭىلىمىزگە قۋانىش ۇيالايدى. شاكىرتىم زەرە سامات قىزى گازەتتەن ءساندى باس كيىمدەر مەن اشەكەيلەر جاساپ، «ەكو ءسان» رەسپۋبليكالىق بايقاۋىندا 1-ورىندى يەلەنۋى مەن ءۇشىن ۇلكەن قۋانىش بولدى»، - دەيدى باحشاگۇل بايدولدا قىزى.

كەيىپكەرىمىز جاستايىنان قولونەردى جانىنا سەرىك ەتكەن. ءتىپتى، جۇمىسىنان شارشاپ كەلگەنىندە سۋرەت سالىپ، بويىنا كۇش- قۋات الاتىنىن ايتادى. «بۇل - ونەردىڭ كيەسى»، - دەيدى شەبەر.

پەداگوگتىڭ كوز تارتار تۋىندىلارىنا قىزىعا قارايتىندار كوپ. ول امەريكا مەن تۇركياعا ارنايى شاقىرتۋ الىپ، امەريكا ەلشىلىگىندە بولىپ قايتتى. باحشاگۇل بايدولدا قىزى ۇلتتىق قۇندىلىقتار مەن حالىق ءداستۇرىن دارىپتەۋ ماقساتىندا كوپبالالى انالارعا، جاستارعا تەگىن شەبەرلىك ساباقتار وتكىزىپ ءجۇر. تۇرمىستا قولدانىلاتىن پلاستيك شولمەكتەردەن، مارجان- مونشاقتاردان، شەگەدەن جاسالعان قولونەر شەبەرىنىڭ تۋىندىلارى ەشكىمدى بەي- جاي قالدىرمايدى.

ءوز ىسىنە دەگەن سۇيىسپەنشىلىگىنىڭ، اتقارىپ جۇرگەن ەڭبەگىنىڭ ارقاسىندا قولونەرشىنىڭ ءتۇرلى دەڭگەيدە الىپ جۇرگەن ماراپاتى جەتەرلىك. ول العىس حاتتار، قۇرمەت گراموتالارىمەن قاتار، قر «ورلەۋ» شىعارماشىلىقتى دامىتۋ ورتالىعىنىڭ «قازاقستان رەسپۋبليكاسىنىڭ ۇزدىك مۇعالىمى» توسبەلگىسىنىڭ جانە «ەۋرازيا ديزاينەرلەر وداعىنا 10 جىل» توسبەلگىسىنىڭ يەگەرى.

باحشاگۇل بايدولدا قىزىنىڭ ماقالالارى وبلىستىق، رەسپۋبليكالىق گازەت- جۋرنالداردا جارىق كورىپ، شەبەرلىك ساباقتارى جاريالانىپ تۇرادى. دارىندى وقۋشىلارعا ارنالعان رەسپۋبليكالىق عىلىمي- تانىمدىق جۋرنالدا شاكىرتتەرى جاساعان قول ەڭبەكتەرى، سۋرەتتەر مەن قولونەرلەر توپتاماسى كىتاپشا بولىپ جاريالانعان.

ىبىراي التىنساريننىڭ تۋعانىنا 180 جىل تولۋىنا وراي، «بابالار اماناتى» ەنسيكلوپەدياسىنا ەڭ ۇزدىك تۋىندىلارى جاريالانىپ، ەڭ ۇزدىك توپتاما رەتىندە ا ق ش-قا جىبەرىلدى. سونىمەن قاتار تۇركيادا وتكەن حالىقارالىق سۋرەت گالەرەياسىندا كورمەگە قويىلعان تۋىندىسى جوعارى باعالاندى.