ەلىمىزدە پرەزيدەنتتىك جاستار كادر رەزەرۆىنە ىرىكتەۋ باستالادى

استانا. قازاقپارات - مەملەكەتتىك باسقارۋ جۇيەسى ءۇشىن تالانتتى جاستاردى انىقتاۋ جانە تارتۋ ماقساتىندا پرەزيدەنتتىك جاستار كادر رەزەرۆىنە كەزەكتى ءۇشىنشى ىرىكتەۋ جوسپارلانىپ وتىر، دەپ حابارلايدى قازاقپارات.

دەنساۋلىق ساقتاۋ مينيسترلىگىنىڭ مالىمەتىنشە، ىرىكتەۋگە وتىنىمدەردى قابىلداۋ 1- قىركۇيەكتەن باستاپ pkrezerv.gov.kz سايتىندا قولجەتىمدى. وتىنىمدەر 30- قىركۇيەككە دەيىن قابىلدانادى.

ىرىكتەۋگە جاسى 35 تەن اسپاعان، جوعارى ءبىلىمى جانە 5 جىل جالپى جۇمىس تاجىريبەسى بار، قازاق ءتىلىن مەڭگەرگەن (ۆ1 دەڭگەيىنەن تومەن ەمەس) قازاقستان رەسپۋبليكاسىنىڭ ازاماتى قاتىسا الادى.

بيىل ىرىكتەۋ كەلەسى باعىتتار بويىنشا جۇرگىزىلەدى:

ينفراقۇرىلىمدى، ونەركاسىپتى دامىتۋ جانە ساۋدا ساياساتى؛

اگروونەركاسىپتىك كەشەن جانە قورشاعان ورتانى قورعاۋ؛

- سىرتقى ساياسات جانە ينۆەستيتسيالار؛

ەكونوميكالىق جانە قارجىلىق ساياسات؛

- سيفرلاندىرۋ؛

- الەۋمەتتىك ساياسات جانە ازاماتتىق قوعام.

ىرىكتەۋ 6 كەزەڭ بويىنشا وتكىزىلەدى:

قۇجاتتاردى قابىلداۋ؛

- ماتىندىك جانە ساندىق اقپاراتپەن جۇمىس ىستەۋ قابىلەتىن باعالاۋ؛

- سيتۋاتسيالىق تاپسىرمالاردى شەشۋدى باعالاۋ؛

- قۇزىرەتتەردى باعالاۋ (assessment center جانە hr- سۇحبات)؛

- ساراپشىلىق كوميسسيادا اڭگىمەلەسۋ؛

- ۇلتتىق كوميسسيا وتىرىسى.

ىرىكتەۋ قورىتىندىسى بويىنشا 50 كانديدات رەزەرۆكە الىنادى. جەڭىمپازدار اعىمداعى جىلعى جەلتوقساندا جاريالانادى.

پرەزيدەنتتىك جاستار كادر رەزەرۆى ءۇشىنشى ىرىكتەۋىنىڭ ەرەكشەلىكتەرى تۋرالى جازعان بولاتىنبىز.