ەلوردادا تالعات بيگەلدينوۆتىڭ قۇرمەتىنە جۇگىرۋدەن جارىس ءوتتى
ەرلەر مەن ايەلدەر اراسىنداعى جارىس ەكى جاس ساناتىندا، 10,1 جانە 5 شاقىرىم بويىنشا ءوتتى.
ءىس-شارا «اتامنىڭ اماناتى» قوعامدىق بىرلەستىگىنىڭ باستاماسىمەن قورعانىس مينيسترلىگى، ۇلتتىق ۇلان جانە ەلوردا اكىمدىگىنىڭ قولداۋىمەن ۇيىمداستىرىلدى. وعان 700-دەن استام ادام قاتىستى. ولاردىڭ اراسىندا اقمولا گارنيزونىنىڭ، شەكارا قىزمەتىنىڭ، ۇلتتىق ۇلاننىڭ اسكەري قىزمەتشىلەرى، قارۋلى كۇشتەردىڭ ارداگەرلەرى، كاسىبي سپورتشىلار مەن سپورت سۇيەر قاۋىم بار.
اۋە قورعانىسى كۇشتەرىنىڭ باس قولباسشىسى اۆياتسيا گەنەرال-مايورى داۋرەن قوسانوۆ جارىسقا قاتىسۋشىلارعا ارناپ ءسوز سويلەدى.
«ءبىز بۇل شارانى داڭقتى ۇشقىش، اۋە شايقاسىنىڭ شەبەرى اۆياتسيا گەنەرال-مايورى تالعات بيگەلدينوۆكە ارنادىق. ءبىزدىڭ كۋرسانتتار 22 جاسىندا تەك ينستۋتتى اياقتاپ جاتادى، ال ول وسى جاستا كەڭەس وداعىنىڭ باتىرى اتاندى. ول 300 دەن اسا جاۋىنگەرلىك ۇشۋ ورىنداپ، جاۋدىڭ 7 ۇشاعىن اتىپ تۇسىرگەن. ونىڭ ءومىرى - باتىلدىقتىڭ، تاباندىلىقتىڭ جانە وتانعا جانقيارلىقپەن قىزمەت ەتۋدىڭ ۇلگىسى»، - دەپ اتاپ ءوتتى د. قوسانوۆ.
جارىس الدىندا قورعانىس مينيسترلىگىنىڭ، قارۋلى كۇشتەردىڭ، شەكارا قىزمەتى مەن ۇلتتىق ۇلاننىڭ قۇرىلىمدىق بولىمشەلەرىنىڭ اتىنان قاتىسقان اسكەري قىزمەتشىلەر جۇگىردى.
18-49 جاس ارالىعىنداعى ەرلەر اراسىندا 10,1 شاقىرىم قاشىقتىقتى جارىستىڭ قورىتىندىسى بويىنشا ءبىرىنشى بولىپ كەلگەن - ءالىمجان بالتابەك، ەكىنشى ورىندى دامير ءابدىراحمانوۆ، ءۇشىنشى ورىندى سۇلتان بازاربايەۆ يەلەندى. وسى جاس ساناتىنداعى ايەلدەر اراسىندا جاننا ءالجانوۆا ۇزدىك دەپ تانىلدى، اليسا كرافت جانە الەنا اقىمبەكوۆا وسى ۇشتىككە ءىلىندى.
50 جاستان اسقان ەرلەر اراسىندا رينات ساليكجانوۆ ءبىرىنشى ورىن السا، لورەنس روسسوۆ ەكىنشى، ارسان جۇزەنوۆ ءۇشىنشى ورىندى قانجىعالارىنا بايلادى. 50 جاستان اسقان ايەلدەر اراسىندا سونيا ۆەكستەين جەڭىمپاز اتاندى.
18-49 جاس ارالىعىنداعى ەرلەر اراسىندا 5 شاقىرىم قاشىقتىقتا داۋلەت ءسادۋاقاسوۆ مارە سىزىعىن ءبىرىنشى بولىپ كەسىپ ءوتتى. ودان كەيىن ارحات قالدىبەك كەلسە، ءۇشىنشى بولىپ بەيبىت احمۋروۆ مارەگە جەتتى. وسىنداي ساناتتاعى ايەلدەر اراسىندا دينا جاكەنوۆا جەڭىسكە جەتسە، ەكىنشى ورىنعا مادينا بەرقالييەۆا، ال ءۇشىنشى ورىنعا لۋنارا بەكەيەۆا تابان تىرەدى.
50 جاستان اسقان ەرلەر اراسىندا ەلەۋسىز پارداباي جەڭىسكە جەتسە، ەكىنشى ورىندى ساكەن گۋباشيەۆ، ءۇشىنشى ورىندى اباي تاسبولاتوۆ يەلەندى. ودان وزگە 50 دەن اسقان ايەلدەر اراسىندا گۇلميرا تۇرلىحانوۆا جەڭىس تۇعىرىنان كورىندى.
جارىس قاتىسۋشىلارىنا ميليتاري ۇلگىسىندەگى فۋتبولكالار مەن اتى اڭىزعا اينالعان ۇشقىش باسقارعان شابۋىلداۋشى ۇشاق تۇرىندەگى مەدالدار تابىس ەتىلدى.
ءىس-شارا اياسىندا قورعانىس مينيسترلىگى مەن ۇلتتىق ۇلاننىڭ اسكەري انسامبلدەرى، ەلوردانىڭ شىعارماشىلىق ۇجىمدارى مەن قۇرمەت قاراۋىل روتاسىنىڭ دەفيلەسى كورسەتىلدى.
