مەكتەپ فورماسىن قالاي تاڭداۋ كەرەك

استانا. قازاقپارات - مەكتەپكە ارنالعان كيىمگە قويىلاتىن بارلىق تالاپ «بالالار مەن جاسوسپىرىمدەرگە ارنالعان ءونىمنىڭ قاۋىپسىزدىگى تۋرالى» كەدەن وداعىنىڭ تەحنيكالىق رەگلامەنتىنە سايكەس رەتتەلەدى.

وسىعان وراي دسم سانيتاريالىق- ەپيدەميالوگيالىق باقىلاۋ كوميتەتى وقۋشىلاردىڭ مەكتەپ فورماسىن الاردا وسى تالاپتارعا ساي بولۋىن قاداعالاۋعا شاقىردى، دەپ حابارلايدى قازاقپارات.

تەحنيكالىق رەگلامەنتكە سايكەس ول حيميالىق، بيولوگيالىق قاۋىپسىزدىكتى (بوس فورمالدەگيدتىڭ ماسسالىق ۇلەسى، گيگروسكوپيالىعى، اۋا وتكىزگىشتىگى) قامتاماسىز ەتەتىندەي ەتىپ دايىندالۋى ءتيىس. كيىمگە ارنالعان ماتەريالدار بوياۋىنىڭ ورنىقتىلىعىنا قويىلاتىن تالاپتارعا سايكەس كەلۋى ءتيىس. ەسىڭىزدە بولسىن، بالا مەكتەپ فورماسىندا بەس- التى ساعات نەمەسە ودان دا كوپ ۋاقىت وتكىزەدى، سوندىقتان سينتەتيكالىق ماتەريالدى تاڭداماڭىز. بۇل بالانىڭ جۇيكە جۇيەسىنە اسەر ەتەتىن ستاتيكالىق ەلەكتر ەنەرگياسىنىڭ جينالۋىنا ىقپال ەتەدى، ياعني ول تىتىركەنۋدى تۋدىرىپ، تەز شارشاۋعا اكەلۋى مۇمكىن. قۇرامىندا تابيعي تالشىقتار باسىم ماتالاردان جاسالعان ءونىمدى العان دۇرىس. ماقتا مەن زىعىر ماتالارىن جاز بەن كوكتەمگى ۋاقىتقا، ءجۇن مەن كاشەميردى كۇز بەن قىس ۋاقىتىنا تاڭداعان ابزال.

سونىمەن بىرگە بالالار كيىمىن ساتىپ العاندا، تاڭبالاۋدى وقىپ شىعىڭىز، ول سەنىمدى، انىق، وڭاي وقىلاتىن، مەملەكەتتىك جانە ورىس تىلدەرىندە بولۋى كەرەك.

تاڭبالاۋ كەلەسى اقپاراتتى قامتۋى كەرەك:

- ءونىم دايىندالعان ەلدىڭ اتاۋى؛

- دايىنداۋشىنىڭ (دايىنداۋشى ۋاكىلەتتىك بەرگەن تۇلعانىڭ)، يمپورتتاۋشىنىڭ، ديستريبيۋتوردىڭ اتاۋى جانە ورنالاسقان جەرى؛

- بۇيىمنىڭ اتاۋى؛

- دايىندالعان كۇنى (ايى، جىلى)؛

- «ە ا س» بەلگىسى؛

- ماتەريالداعى تابيعي جانە حيميالىق شيكىزاتتىڭ ءتۇرى مەن سالماقتىق ۇلەسى (پايىزدىق قۇرامى)؛

- ءجۇننىڭ ءتۇرى جانە ونى وڭدەۋ ءتۇرى (بويالعان نەمەسە بويالماعان)؛

- بۇيىمنىڭ ولشەمى.

سونىمەن قاتار قاجەت بولعان جاعدايدا:

- بۇيىمدى كۇتۋ سيمۆولدارى جانە (نەمەسە) پايدالانۋ پروتسەسىندە بۇيىمدى كۇتۋ ەرەكشەلىكتەرى جونىندەگى نۇسقاۋلىق؛

- بۇيىمنىڭ ءتۇرى (ماقساتى)؛

- ءونىمنىڭ قىزمەت ەتۋ مەرزىمى؛

- كەپىلدى قىزمەت ەتۋ مەرزىمى؛

- بار بولعان جاعدايدا تاۋار بەلگىسى.

سونىمەن قاتار بالالار كيىمىنە ونىڭ تەحنيكالىق رەگلامەنتتەر تالاپتارىنا سايكەستىگىن راستايتىن قۇجاتتار (سايكەستىك سەرتيفيكاتى، سايكەستىك تۋرالى دەكلاراتسيا) بولۋى ءتيىس. سوندىقتان ساتۋشىدان وسى قۇجاتتاردى تالاپ ەتۋگە قۇقىعىڭىز بار. بولماعان جاعدايدا، تاۋاردى ساتىپ الۋدان اۋلاق بولىڭىز. سونداي- اق مەكتەپ فورماسىن مامانداندىرىلعان دۇكەندەردەن ساتىپ الۋ ۇسىنىلادى.