مادەنيەت ءمينيسترى سپورت سالاسىنىڭ ارداگەرلەرى مەن قىزمەتكەرلەرىن ماراپاتتادى
Qazaqstan ورتالىق كونسەرت زالىندا ەلىمىزدىڭ سپورتشىلارى، سالا ارداگەرلەرى مەن قىزمەتكەرلەرى قۇرمەت گراموتالارىمەن جانە مەدالدارمەن ماراپاتتالدى.
«سپورت كۇنى ءبىز حالىقارالىق تۋرنيرلەردە ەلىمىزدىڭ نامىسىن قورعايتىن سپورتشىلاردىڭ، چەمپيونداردى تاربيەلەۋگە ۋاقىت پەن كۇش-جىگەرىن جۇمسايتىن جاتتىقتىرۋشىلار مەن سپورت ۇيىمدارى قىزمەتكەرلەرىنىڭ، وسى سالاعا ءومىرىن ارناعان ارداگەرلەرىمىزدىڭ ەڭبەگى مەن وراسان زور ۇلەسىن اتاپ وتەمىز. مەملەكەت باسشىسى قازاقستاندا بۇقارالىق سپورتتى دامىتۋعا كوپ كوڭىل بولەدى، مينيسترلىك وسى سالانىڭ قىزمەتكەرلەرىنە بارىنشا قولداۋ كورسەتۋ ءۇشىن بەلسەندى جۇمىس جاساپ جاتىر. مىسالى، ءبىز سپورتشىلاردى دايارلاۋدىڭ كەلەسى كەزەڭىنە بەرۋ جانە توپتاردى باسقارۋ ءۇشىن جاتتىقتىرۋشى- وقىتۋشىلارعا قوسىمشا تولەم ەنگىزۋ بويىنشا جوبا ازىرلەدىك»، - دەدى مادەنيەت جانە سپورت ءمينيسترى اسحات ورالوۆ كەشتىڭ اشىلۋ سالتاناتىندا.
مينيستر وتاندىق سپورت ارداگەرلەرىنە «ەڭبەك ارداگەرى» مەدالىن تابىس ەتتى، ولاردىڭ اراسىندا بوكستان قر ەڭبەك سىڭىرگەن جاتتىقتىرۋشىسى مارات ەلەۋسىنوۆ، بوكستان ق ر ەڭبەك سىڭىرگەن جاتتىقتىرۋشىسى جانات ماناشيەۆ، 1972-جىلعى وليمپيادانىڭ كۇمىس جۇلدەگەرى ۆيكتور ابويموۆ جانە باسقا دا تانىمال سپورتشىلار مەن جاتتىقتىرۋشىلار بار.
سونىمەن بىرگە، بوكستان الەم چەمپيونى مەرەي اقشالوۆ، ۆەلوسپورت فەدەراتسياسىنىڭ باس حاتشىسى اسەم قوناقبايەۆا، سپورت جۋرناليسى اسلان قاجەنوۆ ق ر پرەمەر-ءمينيسترىنىڭ ورىنباسارى تامارا دۇيسەنوۆانىڭ العىس حاتىمەن ماراپاتتالدى.
«دەنە شىنىقتىرۋ مەن سپورتقا سىڭىرگەن ەڭبەگى ءۇشىن» توسبەلگىلەرى 15 ادامعا تابىستالدى. ولاردىڭ ىشىندە ءتۇرلى وڭىرلەردەن كەلگەن سپورتشىلار، جاتتىقتىرۋشىلار مەن سپورت ۇيىمدارىنىڭ قىزمەتكەرلەرى بار.
ءوز كەزەگىندە «سپورت سالاسىنىڭ قۇرمەتتى قىزمەتكەرى» توسبەلگىسىمەن 12 ادام ماراپاتتالدى.
سونىمەن بىرگە، قر مادەنيەت جانە سپورت مينيسترلىگىنىڭ قۇرمەت گراموتاسى جانە العىس حاتتارى بەرىلدى. وسىلايشا، ايتۋلى كۇن قارساڭىندا بارلىعى 250 ادام قۇرمەتكە يە بولدى.
