قازاقستان مەن ساۋد ارابياسى ەكولوگيا پروبلەمالارىن بىرلەسىپ شەشپەك

استانا. قازاقپارات - قازاقستاننىڭ ەكولوگيا جانە تابيعي رەسۋرستار ءمينيسترى ءزۇلفيا سۇلەيمەنوۆا مەن ساۋد ارابياسى كورولدىگىنىڭ قورشاعان ورتا، سۋ رەسۋرستارى جانە اۋىل شارۋاشىلىعى ءمينيسترى ابدۋلراحمان ءال-فادلي ەكىجاقتى كەزدەسۋ وتكىزدى، دەپ حابارلايدى قازاقپارات.

ءىس-شارا بارىسىندا تاراپتار سۋ رەسۋرستارىنا، كليماتتىڭ وزگەرۋىنە، بيوارتۇرلىلىكتى ساقتاۋعا بايلانىستى ءبىرقاتار ماسەلەلەردى تالقىلادى.

«قازاقستان مەن ساۋد ارابياسى سۋ رەسۋرستارىمەن بايلانىستى پروبلەمالارعا تاپ بولىپ وتىر. بۇل رەتتە ءبىز ءسىزدىڭ ەلىڭىز سۋ رەسۋرستارىن تۇشىلاندىرۋ جانە ءتيىمدى پايدالانۋ سالاسىندا جاڭاشىل بولىپ تابىلاتىنىن بىلەمىز. وسىعان بايلانىستى سۋ رەسۋرستارىن باسقارۋ سالاسىنداعى ىنتىماقتاستىققا دايىندىعىمىزدى اتاپ ءوتۋ قاجەت»، - دەپ اتاپ ءوتتى مينيستر ارىپتەسىنە سويلەگەن سوزىندە.

كومىرتەكتى بەيتاراپتىق ماسەلەسى بويىنشا قازاقستان پاريج كەلىسىمىنىڭ تاراپى بولىپ تابىلادى جانە ونىڭ ەرەجەلەرى مەن باسشىلىق قاعيداتتارىن ىسكە اسىرۋدى قاتاڭ ۇستانادى دەپ ايتىلدى. قورىتىندىلاي كەلە، ەكونوميكانى تەرەڭ دەكاربونيزاتسيالاۋدا باعدار بولاتىن 2060 -جىلعا دەيىن كومىرتەگى بەيتاراپتىعىنا قول جەتكىزۋ ستراتەگياسىن بەكىتۋدى اتاپ وتۋگە بولادى. 2030 -جىلعا قاراي ءابسوليۋتتى شىعارىندىلاردى 1990 -جىلعى دەڭگەيدەن %15 عا قىسقارتۋ جوسپارلانۋدا.

ال بونن شاقىرۋى شەڭبەرىندە قازاقستان 2030 -جىلعا دەيىن ورمان ءوسىرۋ جانە ورماندى قالپىنا كەلتىرۋ ەسەبىنەن كەم دەگەندە 1,5 ميلليون گەكتار توزعان جەردى قالپىنا كەلتىرۋگە مىندەتتەندى.

ەكولوگيا مينيسترلىگىنىڭ باسشىسى: «بىلىممەن، تەحنولوگيالارمەن جانە وزىق تاجىريبەلەرمەن الماسىپ، ءبىزدىڭ ەلدەر ەكولوگيالىق تۇراقتىلىقتى ارتتىرۋعا جانە شولەيتتەنۋگە قارسى كۇرەسكە ىقپال ەتە وتىرىپ، جەر رەسۋرستارىن تۇراقتى باسقارۋ ستراتەگيالارىن ازىرلەۋدە ىنتىماقتاسا الادى»، - دەپ اتاپ ءوتتى.

تاراپتار كليماتتىڭ وزگەرۋىنە قارسى كۇرەس ماسەلەلەرىن دە قوزعادى.

«ءبىزدىڭ ەلدەرىمىزدىڭ كليماتىنىڭ وزگەرۋىنە قارسى كۇرەستەگى سەرىكتەستىك تۇراقتى، تومەن كومىرتەكتى بولاشاققا جول اشىپ، ءۇمىت شامى رەتىندە قىزمەت ەتە الادى جانە باسقا ەلدەردى دە وسى ۇلگىنى ۇستانۋعا شابىتتاندىرادى»، - دەدى ز. سۇلەيمەنوۆا.

بۇدان باسقا، ەكىجاقتى ىنتىماقتاستىقتى نىعايتۋ ماقساتىندا قازاقستاندىق تاراپ قازاقستان رەسپۋبليكاسىنىڭ ەكولوگيا جانە تابيعي رەسۋرستار مينيسترلىگى مەن ساۋد ارابياسى كورولدىگىنىڭ قورشاعان ورتا، سۋ جانە اۋىلشارۋاشىلىعى مينيسترلىگى اراسىندا قورشاعان ورتانى قورعاۋ سالاسىنداعى ءوزارا تۇسىنىستىك تۋرالى مەموراندۋم جوباسىن ازىرلەدى. قازىرگى ۋاقىتتا مەملەكەتىشىلىك كەلىسۋ راسىمدەرى جۇرگىزىلۋدە.

بۇل قۇجات ەكى ەلدىڭ قورشاعان ورتانى قورعاۋ سالاسىنداعى ءوزارا ءىس-قيمىلىن كۇشەيتۋگە جانە دامىتۋعا مۇمكىندىك بەرەدى.