شاحتاداعى ءورت: بار كۇش ادامداردى ىزدەۋگە جۇمىلدىرىلعان
بۇل تۋرالى اسكەريلەندىرىلگەن كاسىبي اپاتتىق-قۇتقارۋ قىزمەتى رەسپۋبليكالىق ورتالىق شتابىنىڭ قاراعاندى وبلىسى بويىنشا فيليالى ديرەكتورىنىڭ ءبىرىنشى ورىنباسارى گەنناديي سيلينسكي ايتتى، دەپ حابارلايدى قازاقپارات.
«شاحتادا ءورت ءالى دە جالعاسۋدا. ءبىز قازىر بارلىق كۇش-جىگەرىمىزدى ادامداردى ىزدەۋگە باعىتتادىق. ءورتتى سوندىرۋمەن ءالى اينالىسپادىق. وكىنىشكە قاراي، قازىرگى ۋاقىتتا ءبىر ادامنىڭ ءمايىتىن تاپتىق، ءبولىم ونى جەر ۇستىنە ەۆاكۋاتسيالادى. قازىر ءبىز ەسەپتەۋلەر جۇرگىزدىك، بلوكتىڭ جوعارعى بولىگىندەگى قازبالارداعى ءتۇتىندى ازايتۋ ءۇشىن مانيەۆرلەر جاسادىق، ويتكەنى شاحتاعا بارعان 12 بولىمشە قويۋ تۇتىنگە بايلانىستى ادامدار بولۋى مۇمكىن ورىندارعا كىرە المادى.
تيىسىنشە، قوزعالىس جىلدامدىعى تومەن جانە قورعانىس رەسپيراتورىنىڭ ۋاقىتى ءارى قاراي جۇمىس ىستەۋگە مۇمكىندىك بەرمەيدى، ويتكەنى قوزعالىسى از قۇتقارۋشى بولىمشەلەر الىسقا بارا المايدى. قازىر كورىنىستى جاقسارتۋ ءۇشىن جەلدەتۋ مانيەۆرىن جاسادىق، شاحتاعا 4 ءبولىم باعىتتالدى، 2 ءبولىم دايىن تۇر. ءبىز ادامدار بولۋى مۇمكىن سكيپتىك ۇڭعى ماڭىنداعى قازبالارعا زەرتتەۋ جۇرگىزۋدى جوسپارلاپ وتىرمىز. بۇل مالىمەتتى بىزگە شاحتا قىزمەتكەرلەرى بەردى. وسى بارلاۋ ناتيجەلەرى بويىنشا تاعى قوسىمشا اقپارات بەرە الامىز.
سونىمەن بىرگە، بىزدە پايدا بولعان مۇمكىندىكتى پايدالانىپ، نەگىزگى كونۆەيەر كەڭىستىگىنىڭ جوعارعى بولىگىن بارلاپ جاتىرمىز، بۇل شاحتانى اپاتقا دەيىنگى رەجيمدە جەلدەتۋدى قالپىنا كەلتىرۋ بويىنشا ءارى قاراي شەشىم قابىلداۋعا مۇمكىندىك بەرەدى. بۇل ارقىلى ءورت وشاقتارىنداعى اۆاريالىق قازباعا تىكەلەي كىرە الامىز جانە شاحتا بلوگىنداعى ءتۇتىندى ازايتىپ، ءبىز ءالى بارماعان قازبالارعا وتە الامىز» دەلىنگەن حابارلامادا.
ايتا كەتەيىك، بۇعان دەيىن قاراعاندى وبلىسىندا شاحتا ورتەنىپ، 227 ادام ەۆاكۋاتسيالانعانى تۋرالى حابارلاعان ەدىك.
قازىرگى ساتتە وسى اپاتتان جاپا شەككەندەر سانى 8 ادامعا جەتتى.
سونداي-اق، ەكى جۇمىسشىنىڭ دەنەسى تابىلعانى تۋرالى اقپارات تارادى، ءبىراق كەيىن تەك ءبىر ادامنىڭ دەنەسى تابىلعانى ناقتىلاندى.
