گونكونگ قازاقستانعا باكالاۆريات جۇيەسى بويىنشا ءبىلىم الۋعا گرانتتار بولەدى
مينيستر گونكونگتىڭ وقۋ گرانتتارىن ءبولۋ تۋرالى جانە قازاقستاندا گونكونگتىق جوعارى وقۋ ورنىنىڭ فيليالىن اشۋ تۋرالى ءبىرقاتار كەلىسىمگە قول قويدى.
گونكونگتىڭ ءبىلىم حاتشىسىمەن كەزدەسۋدە مينيستر ساياسات نۇربەك قازاقستاننىڭ جوعارى ءبىلىم جانە عىلىم جۇيەسىن دامىتۋ ماقساتىندا عىلىم جانە جوعارى ءبىلىم مينيسترلىگى جۇرگىزىپ جاتقان رەفورمالار تۋرالى ايتتى.
ونىڭ ىشىندە «بولاشاق» جانە «500 عالىم» باعدارلامالارى، قازاقستاندا جەتەكشى شەتەلدىك جوعارى وقۋ ورىندارىنىڭ فيليالدارىن اشۋ تۋرالى.
ءوز كەزەگىندە، چوي يۋكلين ءمينيستردى گونكونگتىڭ ءبىلىم بەرۋ جۇيەسىمەن تانىستىردى. تاراپتار عىلىم جانە جوعارى ءبىلىم سالاسىنداعى ەكىجاقتى ىنتىماقتاستىقتى ودان ءارى دامىتۋ مەن تەرەڭدەتۋ ماسەلەسىن تالقىلادى.
كەزدەسۋدىڭ قورىتىندىسى بويىنشا ق ر عىلىم جانە جوعارى ءبىلىم مينيسترلىگى مەن گونكونگ ءبىلىم بيۋروسى اراسىندا ءوزارا تۇسىنىستىك تۋرالى مەموراندۋمعا قول قويىلدى.
كەلىسىم شەڭبەرىندە تاراپتار ءبىلىم بەرۋ سالاسىنداعى ىنتىماقتاستىقتى كوتەرمەلەۋگە جانە ىلگەرىلەتۋگە، قازاقستاندىق وقۋشىلارعا باكالاۆرياتتا وقۋعا گرانتتار بولۋگە، عالىمدار، ساراپشىلار، ستۋدەنتتەر، ج و و پروفەسسور- وقىتۋشىلار قۇرامى جانە ت. ب. الماسۋعا جاردەمدەسۋگە ۋاعدالاستى.
سول كۇنى، ساياسات نۇربەك Hong Kong Polytechnic University (PolyU) پرەزيدەنتى پروفەسسور Jin-Guang Teng-پەن كەزدەستى.
ۋنيۆەرسيتەت الەمدەگى ەڭ ۇزدىك وقۋ ورىندارىنىڭ قاتارىنا كىرەدى. تاراپتار ءتۇرلى سالالارداعى ىنتىماقتاستىق تۋرالى جەمىستى پىكىرتالاستار وتكىزدى. PolyU باسشىسى ۋنيۆەرسيتەتتىڭ نەگىزگى جەتىستىكتەرى تۋرالى ايتىپ، قازاقستاندىق ستۋدەنتتەردىڭ دايىندىق دەڭگەيى مەن ۇلگەرىمىن جوعارى باعالادى. پروفەسسور ەلىمىزدە وسى ج و و فيليالىن اشۋ مۇمكىندىگىنە جوعارى قىزىعۋشىلىق تانىتتى.
City University of Hong Kong (CityU) ساپارى بارىسىندا ق ر ع ج ب م مەن ۋنيۆەرسيتەت اراسىندا ستراتەگيالىق ارىپتەستىك ورناتۋ بويىنشا ءوزارا تۇسىنىستىك تۋرالى مەموراندۋمعا قول قويىلدى. مەموراندۋمعا سايكەس تاراپتار تالانتتار مەن ينستيتۋتسيونالدىق ىنتىماقتاستىقتى دامىتۋعا، ءبىلىم الماسۋدى كەڭەيتۋگە جانە گونكونگ پەن قازاقستان اراسىنداعى مادەني ءوزارا تۇسىنىستىكتى نىعايتۋعا ىقپال ەتەتىن باستامالاردى زەردەلەيدى. سونداي-اق، قازاقستاندا CityU فيليالىن اشۋ تۋرالى ۋاعدالاستىققا قول جەتكىزىلدى.
«ق ر پرەزيدەنتى قاسىم-جومارت توقايەۆ عىلىم جانە جوعارى ءبىلىم مينيسترلىگىنىڭ الدىنا قازاقستاندا شەتەلدىك جوعارى وقۋ ورىندارىنىڭ فيليالدارىن اشۋ مىندەتىن قويىپ وتىر. وسى ماقساتتا ق ر ۇكىمەتى ىنتىماقتاستىق گەوگرافياسىن كەڭەيتۋ ءۇشىن جاعداي جاساۋدا. ءبىز CityU- مەن ستراتەگيالىق ىنتىماقتاستىق ورناتۋعا قۋانىشتىمىز. ءوزارا تۇسىنىستىك تۋرالى مەموراندۋم قازاقستان مەن گونكونگ اراسىنداعى ءبىلىم بەرۋ بايلانىستارىن نىعايتادى، تاجىريبە الماسۋدى جەڭىلدەتەدى جانە زەرتتەۋلەر مەن تالانتتاردى دامىتۋ ءۇشىن جاڭا مۇمكىندىكتەر اشادى»، - دەپ اتاپ ءوتتى ساياسات نۇربەك.
ءوز كەزەگىندە، پروۆوست جانە ۋنيۆەرسيتەت پرەزيدەنتىنىڭ ورىنباسارى، پروفەسسور Chun-Sing Lee كەلىسىم ءوزارا مۇددەلى جوبالاردا عىلىمي- زەرتتەۋ ىنتىماقتاستىقتى ىنتالاندىرادى دەپ اتاپ ءوتتى.
«ءبىز جاھاندىق ىنتىماقتاستىقتىڭ جاڭا ءداۋىرىنىڭ قارساڭىندا تۇرعاندىقتان، ءبىز قازاقستاننىڭ جوعارى وقۋ ورىندارىمەن سەرىكتەستىكتىڭ جاڭا مۇمكىندىگىنە قۋانىشتىمىز جانە ماقتانامىز»، - دەپ اتاپ ءوتتى Chun-Sing Lee.
سونىمەن قاتار، مينيستر ساياسات نۇربەك گونكونگتا وقيتىن قازاقستاندىق ستۋدەنتتەرمەن كەزدەستى. ول عىلىم جانە جوعارى ءبىلىم سالاسىنداعى يننوۆاتسيالار تۋرالى ايتىپ، وسى وزگەرىستەرگە بەلسەندى قاتىسۋعا شاقىردى.
ساياسات نۇربەك ق ر پرەزيدەنتى ق. ق. توقايەۆتىڭ تەحنيكالىق باعىتتاعى مامانداردىڭ ساپاسى مەن سانىن ارتتىرۋ جونىندەگى تاپسىرماسىنا تىڭداۋشىلاردىڭ نازارىن ەرەكشە اۋداردى. ءمينيستردىڭ ايتۋىنشا، شەتەلدىك جەتەكشى تەحنيكالىق جوعارى وقۋ ورىندارىندا وقىعان جاس ينجەنەرلەر جاڭا وندىرىستىك الاڭداردا كادرلىق تاپشىلىقتى ءبىرىنشى بولىپ تولتىرۋى ءتيىس. ستۋدەنتتەر ءوز قىزىعۋشىلىقتارىن ءبىلدىرىپ، ەلدىڭ عىلىمى مەن جوعارى ءبىلىمىن دامىتۋ بويىنشا ءوز يدەيالارىن ۇسىندى. مينيستر بارلىق ۇسىنىستاردى مۇقيات تىڭداپ، نازارعا الدى.
