قاراعاندى وبلىسىنداعى شاحتاداعى ورتكە بايلانىستى قىلمىستىق ءىس قوزعالدى
بۇل تۋرالى وبلىستىق پروكۋراتۋرانىڭ باسپا ءسوز قىزمەتى ءمالىم ەتتى، دەپ حابارلايدى قازاقپارات.
ءىس قاراعاندى وبلىسى پروكۋراتۋراسىنىڭ تىكەلەي باقىلاۋىندا.
سونداي-اق، پوليتسيا بۇل فاكت بويىنشا ق ر ق ك- ءنىڭ 277-بابى 3-بولىگى «تاۋ-كەن نەمەسە قۇرىلىس جۇمىستارىن جۇرگىزۋ كەزىندە قاۋىپسىزدىك قاعيدالارىن بۇزۋ» بويىنشا قىلمىستىق ءىس تىركەلگەنىن حابارلايدى.
قاراعاندى وبلىسى پوليتسيا دەپارتامەنتىنىڭ باسشىلىعى وقيعا ورنىندا.
قازىرگى ۋاقىتتا قاجەتتى تەرگەۋ شارالارى جۇرگىزىلىپ جاتىر.
قازىرگى ساتتە وسى اپاتتان جاپا شەككەندەر سانى 8 ادامعا جەتتى.
بۇعان دەيىن حابارلانعانداي، «ارسەلورميتتال تەمىرتاۋ» اق كومىر دەپارتامەنتىنىڭ «قازاقستان» شاحتاسىندا ت ج ناتيجەسىندە زارداپ شەككەن التى ادام اۋرۋحاناعا جاتقىزىلدى.
- «قازاقستان» شاحتاسىندا زارداپ شەككەن ەكى ادام ماقاجانوۆ كلينيكاسىنا جەتكىزىلدى. قابىلداۋ ءبولىمىنىڭ دارىگەرلەرى ناۋقاستاردىڭ جاعدايىن تەكسەردى. الدىن الا دياگنوز - شاحتا گازدارىمەن جەدەل ينگالياتسيالىق ۋلانۋ، ونىڭ ىشىندە اۋىر كومىرتەگى توتىعىمەن ۋلانۋ، توكسيكو- گيپوكسيالىق ەنتسەفالوپاتيا، ۋىتتى برونحيت. ولار رەانيماتسيا بولىمشەسىنە جاتقىزىلدى، - دەدى توكسيكولوگيا بولىمشەسىنىڭ مەڭگەرۋشىسى، قاراعاندى وبلىسىنىڭ باس شتاتتان تىس توكسيكولوگى ساۋلە سماعۇلوۆا.
سونداي-اق، بۇعان دەيىن ەكى جۇمىسشىنىڭ دەنەسى تابىلعانىن حابارلاعان ەدىك.
«ەكى جۇمىسشى قايتىس بولدى. قالعاندارى ىزدەستىرىلىپ جاتىر»، - دەدى وبلىس اكىمدىگىنىڭ باسپا ءسوز حاتشىسى مارينا شاپوۆالوۆا.
بۇعان دەيىن بەس كەنشىنىڭ ءالى تابىلماي جاتقانى تۋرالى جازعانبىز.
ايتا كەتەيىك، بۇعان دەيىن قاراعاندى وبلىسىندا شاحتا ورتەنىپ، 227 ادام ەۆاكۋاتسيالانعانى تۋرالى حابارلاعان ەدىك.
شاحتادادا 227 ادام بولعان. شاحتادان قاپتال ۇڭعىما ارقىلى ادامدار جوعارى شىعارىلعان.
كەيىن ءورت كەزىندە 5 كەنشىنىڭ ءىز-ءتۇسسىز قالعانى جانە 4 ادام اۋرۋحاناعا جەتكىزىلگەنى ايتىلدى.
الدىن الا مالىمەتكە سايكەس، قاۋىپسىز جەرگە شىعارىلعان 13 ادام باس اۋرۋى مەن جوتەلگە شاعىمدانعان. قازىرگى ۋاقىتتا 4 ادام، ونىڭ ىشىندە ەكەۋى شاحتينسك قالاسىنىڭ ورتالىق اۋرۋحاناسىنا، تاعى ەكەۋى وبلىستىق مەديتسينالىق ورتالىققا جاتقىزىلدى.
