بيىل شەگىرتكەلەر ەگىستىك القاپتارىنا قانشا زيان كەلتىردى

استانا. قازاقپارات - اۋىل شارۋاشىلىعى مينيسترلىگى شەگىرتكەلەردىڭ قانشا گەكتار ەگىستىك القابىن بۇلدىرگەنىن اتادى، دەپ حابارلايدى قازاقپارات ءتىلشىسى.

«شەگىرتكە تەكتەس زيانكەستەرگە قارسى قورعانىس ءىس-شارالارى ەلىمىزدىڭ بارلىق ايماقتارىندا وتكىزىلۋدە. بۇگىنگى كۇنى 1612,323 مىڭ گەكتار نەمەسە وڭدەۋگە جاتقىزىلعان كولەمنىڭ 99,78 پايىزى وڭدەلدى. اقتوبە مەن قوستاناي وبلىستارىنىڭ شەكاراعا جاقىن اۋداندارىندا ەكى شارۋاشىلىقتىڭ 20 مىڭ گەكتار، ونىڭ ىشىندە «قۇمقۇدىق» جاۋاپكەرشىلىگى شەكتەۋلى سەرىكتەستىگىنىڭ 10 مىڭ، «التىنسارين» جاۋاپكەرشىلىگى شەكتەۋلى سەرىكتەستىگىنىڭ 10 مىڭ گەكتار اۋىل شارۋاشىلىعى ەگىستىكتەرىنە شەگىرتكە تەكتەس زيانكەستەردىڭ ۇشىپ كەلگەنى انىقتالدى»، - دەپ اتاپ وتەدى مينيسترلىكتەن اگەنتتىكتىڭ رەسمي ساۋالىنا وراي.

اتالعان تارالۋ وشاقتارىندا شەگىرتكە تەكتەس زيانكەستەرگە قارسى حيميالىق وڭدەۋ جۇمىستارى جۇرگىزىلگەن. اۋىل شارۋاشىلىعى داقىلدارىنىڭ زاقىمدانعانى بايقالماعان.

«سونىمەن قاتار قوستاناي وبلىسىنداعى جانگەلدى اۋدانىندا «الماز» شارۋا قوجالىعىنىڭ 10 مىڭ گەكتار ەگىستىكتەرىنە شەگىرتكە تەكتەس زيانكەستەردىڭ ۇشىپ كەلگەنى بەلگىلى بولدى. شەگىركەلەر قونىستانعان اۋماقتار زەرتتەپ-قارالىپ، حيميالىق وڭدەۋ جۇرگىزىلدى. تەك 0,5 مىڭ گەكتار ەگىستىكتىڭ بۇلىنگەنى تىركەلدى. كەلگەن شىعىندى وتەۋ قاراستىرىلماعان»، - دەدى ۆەدومستۆودان.