تاماقتانۋ كەزىندەگى بۇل بەلگى اسقازان قاتەرلى ىسىگىنەن حابار بەرۋى مۇمكىن

استانا. قازاقپارات - اسقازان قاتەرلى ىسىگىن اۋرۋدىڭ ءبىرىنشى ستادياسىندا انىقتاسا، تولىقتاي جازىلۋ مۇمكىندىگى ون ادامنىڭ توعىزىندا بار.

الايدا كوپ جاعدايدا قاۋىپتى پاتولوگيا ۋاقىتىندا انىقتالمايدى، سەبەبى ادامدار دارىگەرگە اۋرۋ اسقىنعان كەزدە ءبىر-اق بارادى. اۋرۋدىڭ ءۇشىنشى جانە ءتورتىنشى ستاديالارىندا جازىلۋ مۇمكىندىگى ازايىپ كەتەدى. سوندىقتان دارىگەرلەر حال-جاعدايىڭىز بەن ادەتتەرىڭىزدەگى كەز كەلگەن وزگەرىستەرگە ءمان بەرۋگە شاقىرادى.

Cancer Research UK ۇيىمىنىڭ ساراپشىلارى ەسكەرتەدى: اسقازان قاتەرلى ىسىگى تاماقتانۋ كەزىندە بەلگى بەرۋى مۇمكىن. ەگەر بۇرىنعىداي ەمەس، قازىر از تاماقتىڭ وزىنە تويىپ قالا بەرەتىن بولساڭىز جانە بۇل ۇنەمى سولاي بولسا، بۇل ءسىزدى ويلاندىرۋى كەرەك. ءسىز ءومىر ءسۇرۋ سالتىڭىزدى وزگەرتپەدىڭىز، قارنىڭىز اشىپ تۇر جانە ۇيرەنشىكتى كولەمدەگى سورپا نەمەسە باسقا دا تاماق جەگىڭىز كەلەدى. ءبىراق ونىڭ جارتىسىنىڭ وزىنە بىردەن تويىپ قالدىڭىز. قالعانىن مۇلدەم جەي المايسىز، ءتىپتى، تاعى كىشكەنە بولسىن جەيىن دەسەڭىز، جيىركەنىش سەزىمى پايدا بولادى.

«اسقازان قاتەرلى ىسىگىنىڭ العاشقى بەلگىلەرى اسقازان جاراسى سەكىلدى باسقا اۋرۋلاردىڭ بەلگىلەرىنە ۇقساۋى مۇمكىن. سول ءۇشىن دە ونى ءجيى ەسەپكە المايدى»، - دەيدى Cancer Research UK ساراپشىلارى.

اسقازان قاتەرلى ىسىگىنىڭ باسقا دا بەلگىلەرىنە مىنالار جاتادى:

ءتوس استىنىڭ اۋىرۋى؛

تابەتتىڭ جوعالۋى نەمەسە ونىڭ مۇلدەم بولماۋى؛

سەبەپسىز سالماق تاستاۋ؛

جۇرەك اينۋ نەمەسە قۇسۋ؛

قارا ءناجىس.