ايەل دارەتحانادا بوسانىپ، ۇلىن سول جەرگە تاستاپ كەتكەن
تەرگەۋ مالىمەتتەرى بويىنشا 32 جاستاعى س. م. دارەتحانادا بوسانعان سوڭ بالانى شۇڭقىردا تاستاپ كەتكەن. الايدا نارەستە قۇتقارىلدى.
«ساراپشىلاردىڭ پىكىرىنشە، ايەل جۇكتىلىكتىڭ 38-39-اپتاسىندا بوسانعان، بالانىڭ سالماعى - 3 كەلى 540 گرام. نارەستەنىڭ اياعىنىڭ تەرىسى زاقىمدانعان. ودان اۋىر جاراقاتتار انىقتالعان جوق. ايىپتالۋشىدان دا پسيحيكالىق اۋىتقۋ بەلگىلەرى انىقتالمادى. سوت وتىرىسى كەزىندە ول كىنانى جارتىلاي مويىندادى. سوتتالۋشى تۋىستارىنا قوناققا كەلگەنىن، ءبىراز ۋاقىتتان كەيىن دارەتحاناعا بارعانىن ايتتى. ونىڭ سوزىنشە، كۇشەنگەن كەزدە بالانىڭ باسى كورىنگەن. ول سولاي بالا شۇڭقىرعا قۇلاعانىن ايتتى. ايىپتالۋشى بالا جىلاماعانىن، سوندىقتان ونى ءولى دەپ ويلاعانىن جەتكىزدى. سونداي-اق، ايەل نە ىستەۋ كەرەك ەكەنىن بىلمەي، دارەتحانادان شىققانىن ايتتى. ءبىراز ۋاقىتتان كەيىن ونىڭ اپكەسى ۇيگە كىرىپ، دارەتحانادا بالا جىلاپ جاتقانىن ايتقان. نارەستە كورشىلەرىنىڭ كومەگىمەن شىعارىلعان. س. م. جەڭىل جازا سۇراپ، ونىڭ تاعى ءۇش قىزى بار ەكەنىن ايتتى»، - دەلىنگەن ۇكىمدە.
باسىلىم مالىمەتىنشە، ايەلدىڭ جۇبايى رەسەيدە، ال بالا قازىر اناسىمەن بىرگە. سوت شەشىمىمەن ايەلدى ءبىر جىلعا پروباتسيالىق قاداعالاۋعا ۇكىم شىعارىلدى.
ەسكە سالايىق، بۇعان دەيىن ايەل ۇيدە بوسانعان بالاسىن سومكەگە سالىپ، كوشەگە تاستاپ كەتكەنى حابارلانعان ەدى.
