وسكەمەندەگى قىزداردىڭ جانتۇرشىگەرلىك توبەلەسى: ۇكىم قايتا قارالدى
بيىل ناۋرىزدا وسكەمەندە بولعان وقيعا ۇلكەن قوعامدىق رەزونانس تۋدىردى. ويىن-ساۋىق ورتالىعىندا كامەلەتكە تولماعان قىزدى قاتىگەزدىكپەن ۇرىپ-سوققان ۆيدەو جەلىگە ساۋىردە عانا شىققان ەدى.
قىزدىڭ اجەتحانادا قاتىگەزدىكپەن سوققىعا جىعىلعان ءساتىن سول جەردە بولعان قىزداردىڭ ءبىرى ۆيدەوعا ءتۇسىرىپ العان. دەرەكتى شىعىس قازاقستان وبلىسىنىڭ پوليتسيا دەپارتامەنتى راستاپ، تەكسەرۋ جۇرگىزىلگەنىن حابارلادى، ناتيجەسىندە ۇرىپ-سوعۋ دەرەگى ق ر ق ك- نىڭ 293-بابى 2-بولىگى بويىنشا تىركەلدى.
زارداپ شەككەن قىز بۇعان دەيىن بىرنەشە رەت سوققىعا جىعىلىپ، بوپسالاۋ قۇربانى بولعانى بىرنەشە ايعا سوزىلعان تەرگەۋ ناتيجەسىندە انىقتالعان. قىزدان ۆيدەونى جەلىگە تاراتامىز دەپ قورقىتىپ، بوپسالاۋ ارقىلى 50 مىڭ تەڭگە العان. جابىرلەنۋشىنىڭ تۋىستارى ق ر ق ك- ءنىڭ 293-بابى، 2-بولىگى بويىنشا عانا ءىس قوزعالۋىنا قارسىلىقتارىن ءبىلدىردى.
«نەگە ءبىلىم باسقارماسى بوپسالاۋ، وعان قوسا ۇرلىق بولعانىن ايتپايدى؟ ءبىز ءىستى «بۇزاقىلىق» بابى بويىنشا عانا ەمەس، سونىمەن قاتار «بوپسالاۋ» جانە «ۇرلىق» باپتارى بويىنشا دا جۇرگىزۋدى تالاپ ەتەمىز. ءبىز قىلمىسكەرلەردى زاڭ بويىنشا جازالاۋ ءۇشىن ءىستى سوتقا جەتكىزگىمىز كەلەدى. وسى ءىس بويىنشا ءبىر عانا قىزدىڭ اناسى وتكەن ايدا قوڭىراۋ شالىپ، كەشىرىم سۇرادى»، - دەدى جابىرلەنۋشىنىڭ اپكەسى توقجان دوسىموۆا.
بۇل ءىس بويىنشا سوتتالۋشى ءۇش ادام بار. ۇكىم شىلدەدە شىقتى.
«سوت ءىستىڭ ءمان-جايىن جانە سوتتالۋشىلاردىڭ جەكە باسىن، جابىرلەنۋشىلەردىڭ پىكىرىن، قۇقىققا قايشى ارەكەتتەردىڭ سيپاتىن، زالالدىڭ وتەلمەۋىن ەسكەرە وتىرىپ، ا. جانە ت. جازانى ق ك- ءنىڭ 293-بابى 2-بولىگى 1-تارماعى بويىنشا ءبىر جىلعا باس بوستاندىعىن شەكتەۋدى، ق ك- ءنىڭ 194-بابى 2-بولىگى 1، 2-تارماقتارى بويىنشا ءۇش جىل مەرزىمگە باس بوستاندىعىنان ايىرۋدى تاعايىندادى. تۇپكىلىكتى شەشىم جاۋاپتىلاردى ءۇش جىلعا باس بوستاندىعىنان ايىرۋ. و. - ءبىر جىل باس بوستاندىعىنان شەكتەلدى»، - دەلىنگەن سوت حابارلاماسىندا.
ءىس بويىنشا مورالدىق زياندى وتەۋ ماقساتىندا جابىرلەنۋشىنىڭ پايداسىنا 9 ميلليون تەڭگە سوماسى تاعايىندالدى.
ايتا كەتەيىك، سوتتالعانداردىڭ تاراپىنان اتا-انالارى اپەللياتسياعا ءوتىنىش بەرىپ، 14- تامىزدا اپەللياتسيالىق سوت ۇكىمدى كۇشىندە قالدىرۋ تۋرالى شەشىم شىعاردى.
«سوت اپەللياتسيالىق شاعىمدى مۇقيات زەرتتەپ، سوتتالعانداردىڭ كىناسى دالەلدەندى دەگەن قورىتىندىعا كەلدى»، - دەپ ءتۇسىندىردى وبلىستىق سوتتىڭ قىلمىستىق ىستەر جونىندەگى سوت كوميسسياسىنىڭ ءتوراعاسى ءادىل باكين.
الايدا، باسقا دا سۇمدىق مالىمەتتەر بار. جابىرلەنۋشى قىزدىڭ اناسى سوت پروتسەسىنە قاتىسۋشىلاردىڭ ءبىرى كامەلەتكە تولماعان بالانى قورلاۋ ءۇشىن كامەرا ورناتىپ، پاتەر دايىندالعانىن ايتقان.
سونداي-اق، جابىرلەنۋشىنىڭ تۋىستارى مەن ادۆوكاتىنىڭ ايتۋىنشا، جانجالدىڭ باسقا دا، شامامەن 11 قاتىسۋشىسى جازادان سىتىلىپ شىققان. قىزعا قورلىق كورسەتۋدە ولاردىڭ دا قاتىسى بار دەگەن بولجام بار. ولاردىڭ اراسىندا كامەلەتكە تولماعان بالالار بار بولعاندىقتان، جاۋاپقا تارتىلعان جوق.
