التىن زەرگەرلىك بۇيىمدارى جوعالعاننان كەيىن مۇراجاي قىزمەتكەرى جۇمىستان شىعارىلدى

لوندون. قازاقپارات - بىرنەشە ەكسپونات جوعالىپ كەتكەننەن كەيىن لوندونداعى بريتان مۇراجايىنىڭ قىزمەتكەرى جۇمىستان شىعارىلدى.

پوليتسيا تەرگەۋ جۇرگىزىپ جاتىر، دەپ حابارلايدى قازاقپارات BBC- گە سىلتەمە جاساپ.

جوعالعان زاتتاردىڭ اراسىندا التىن جانە جارتىلاي اسىل تاستاردان جاسالعان بۇيىمدار بار.

مۇراجاي قىزمەتكەرلەرىنىڭ ايتۋىنشا، ءبىزدىڭ داۋىرىمىزگە دەيىنگى XV عاسىردان ءبىزدىڭ ءداۋىرىمىزدىڭ XIX عاسىرىنا دەيىنگى كەزەڭگە جاتاتىن ەكسپوناتتار ءبىراز ۋاقىتتان بەرى كورمەگە قويىلماعان. ولاردىڭ ءبىرازى كوبىنەسە عىلىمي جۇمىستار جۇرگىزۋ ءۇشىن مۇراجاي قويماسىندا بولعان.

بريتان مۇراجايىنىڭ ديرەكتورى حارتۆيگ فيشەر جوعالعان زاتتاردى تابۋعا بار كۇش-جىگەرىن سالاتىنىن ايتتى. ونىڭ ايتۋىنشا، مۇراجاي قويماداعى ەكسپوناتتاردىڭ ساقتالۋىنا مۇقيات قارايدى، بۇل بۇرىن-سوڭدى بولماعان ادەتتەن تىس وقيعا.

مۇراجايدا قاۋىپسىزدىك شارالارى كۇشەيتىلدى. قىزمەتكەرلەر مەن ساراپشىلار جوعالعان، بۇلىنگەن جانە ۇرلانعان زاتتار تۋرالى ەسەپ بەرۋگە كىرىستى. جۇمىستان شىعارىلعان قىزمەتكەرگە قاتىستى زاڭدى شارا قولدانىلادى.

پوليتسيا تەرگەۋ جۇرگىزىپ جاتىر.

لوندونداعى بريتان مۇراجايى – ۇلى بريتانياداعى باس تاريحي-ارحەولوگيالىق مۇراجاي.