18:30, 17 - تامىز 2023 | GMT +6
زەينەتكەرلەرگە كوممۋنالدىق قىزمەتتى تولەۋگە كومەك كورسەتىلەتىنى راس پا؟
استانا. قازاقپارات - مەسسەندجەرلەر مەن الەۋمەتتىك جەلىلەردە ۇكىمەت قاۋلىسىنا سايكەس بارلىق زەينەتكەرلەرگە كوممۋنالدىق قىزمەت باعاسىنىڭ وسۋىنە بايلانىستى قارجىلىق كومەك كورسەتىلەتىنى تۋرالى اقپارات تاراپ جاتىر.
بۇل اقپاراتقا قاتىستى ەڭبەك جانە حالىقتى الەۋمەتتىك قورعاۋ مينيسترلىگى پىكىر ءبىلدىردى، - دەپ حابارلايدى Massaget.kz ءتىلشىسى.
مينيسترلىك مالىمەتىنشە، اقپارات شىندىققا جاناسپايدى.
«قازاقستان ۇكىمەتى دوتاتسيالىق قارجىلىق كومەك تۋرالى قاۋلى قابىلداماعاندىقتان، بۇل اقپارات شىندىققا جاناسپايدى»، - دەپ ناقتىلادى ەڭبەك مينيسترلىگى.
سونىمەن قاتار، مينيسترلىك «تۇرعىن ءۇي قاتىناستارى تۋرالى» زاڭعا سايكەس اكىمدىكتەر جەرگىلىكتى بيۋجەت قاراجاتى ەسەبىنەن از قامتىلعان وتباسىلار مەن ازاماتتارعا جالعىز تۇرعىن ءۇيدى ۇستاۋعا جۇمسالاتىن شىعىستار مەن شەكتى رۇقسات ەتىلگەن شىعىستار دەڭگەيى اراسىنداعى ايىرماشىلىقتى وتەۋ ءۇشىن تۇرعىن ءۇي كومەگىن كورسەتەتىنىن ەسكە سالدى.
