نەلىكتەن ادامدار كوبىنە جاقىندارىن رەنجىتەدى؟

استانا. قازاقپارات - ادامدار ءجيى وزدەرى جاقسى كورەتىن جانداردى نەمەسە جاقىندارىن رەنجىتەدى.

كەيدە اشۋىن باسقادان ەمەس، جاقىنىنان الادى: شىن مانىندە ولاي ويلاماسا دا، اشۋ ۇستىندە رەنجىتكىش سوزدەر ايتىپ قالادى. ونىڭ سەبەبى نەدە؟

ول جاقىنىنا سەنەدى

ادامدار ءبىر- بىرىنە جاقىن بولعاندىقتان جانە سەنگەندىكتەن، ولار وزدەرىن ەركىن سەزىنەدى. ولار وزدەرىن قالاي بار سولاي قابىلدايتىنىن بىلەدى. سول ءۇشىن دە ولار جاقىندارىنا نەمەسە سۇيىكتىلەرىنە نە ايتىپ جاتقانىن بايقاماۋى دا مۇمكىن. ءبىراق ۇنەمى جەكە شەكارانى ساقتاماۋ جانە ءوز- ءوزىڭىزدى ۇستاي الماۋ جاقسى كورەتىن ادامدارىڭىزعا زيان كەلتىرۋى مۇمكىن. ءتىپتى، كەيىن كەشىرىم سۇراساڭىز دا، ءسىزدىڭ ويلانباستان ايتا سالعان ءسوزىڭىز ول ادامنىڭ كوڭىلىنە ءتيۋى مۇمكىن.

ول قىزبالىققا سالىنادى

ەگەر ادامنىڭ مىنەزى قىزبا بولسا، ول جاقىن ادامدارىن ءجيى رەنجىتەدى. سەبەبى ول ءبىرىنشى بىردەڭە ايتادى نەمەسە جاسايدى، سودان سوڭ عانا ءوز ارەكەتىنىڭ سالدارى جايلى ويلانادى. ونىڭ بۇل ارەكەتى ادەتكە اينالىپ كەتكەن. بۇل ادەتتەن ارىلۋعا تىرىسۋ كەرەك، سەبەبى ول وزىڭىزگە زيان كەلتىرەدى: ادامدار سىزدەن الشاقتاي باستايدى، ۇنەمى ارەكەتتەرىڭىز ءۇشىن وكىنەتىن بولاسىز جانە بۇل كوڭىل كۇيىڭىزگە اسەر ەتپەي قويمايدى.

ول ءۇشىن باسقالاردىڭ ويى ماڭىزدىراق

كوپشىلىك «باسقالار نە ويلايدى» پرينسيپىمەن ءومىر سۇرەدى. وزىنە قاتتى جاقىن بولماسا دا باسقانىڭ جاعدايىن جاسايدى، ال ءوزىنىڭ شىنىمەن دە جاقىن ادامىن «ىسىرىپ» قويادى. باسقاعا جاۋاپ قايتارۋعا قىسىلادى، ال جاقىنىنا «اۋىر» سوزدەر ايتىپ تاستايدى. سەبەبى ول جاقىن ادامى ونى تۇسىنەتىنىنە جانە اركەز كەشىرەتىنىنە سەنىمدى. الايدا جاقىندارىڭىزعا ۇنەمى وسىنداي قاتىناس جاسايتىن بولساڭىز، ارالارىڭىزدىڭ سۋىپ كەتۋى ابدەن مۇمكىن. باسقالاردىڭ ويىن باقىلاي المايسىز، ءسىز قانشا تىرىسساڭىز دا، ولار سىزدەن ءبىر ءمىن تاۋىپ الۋى مۇمكىن. ال جاقىندارىڭىز ءسىزدى ءاردايىم قولدايدى جانە ءارقاشان سىزبەن بىرگە بولادى.

ول باۋىر باسىپ قالۋدان قورقادى

كەي ادامدار بىرەۋمەن كەزدەسۋگە كەلىسەدى، ءبىراق سەرىگىنە اشىلۋعا، ءوزىن جاقسى تانۋعا مۇمكىندىك بەرۋگە قورقادى. نەگىزىندە ول جاقىندارىنىڭ قاسىندا بولعىسى كەلەدى، ءبىراق ءالسىز بولۋدان قورقادى جانە ولارعا تولىقتاي سەنە المايدى. سوندىقتان اينالاسىنداعىلاردى رەنجىتەدى جانە ولاردى وزىنەن الشاق ۇستايدى.

ول جاقىندارىنا جوعارى تالاپ قويادى

كەي ادامدار جاقىندارىنا باسقالارعا قاراعاندا جوعارى تالاپتار قويادى. ولار جاقسى كورەتىن ادامدارىن ءمىنسىز ەتكىسى كەلەدى. سوندىقتان دا ولار جاقىندارىنا سىنشىل كەلەدى. ادامدار سۇيىكتىلەرىنە كوپتەگەن ءرول بەرىپ قويادى جانە ولاردان سونىڭ ورىندالۋىن كۇتەدى، ءتىپتى، تالاپ ەتەدى. ال ولاردىڭ بۇل ارەكەتى جاقىندارىن رەنجىتەدى.

ول باسقالاردىڭ سەزىمدەرى مەن ەموتسيالارىن انىقتاي المايدى

ەگەر ادام ەمپاتياعا يە بولماسا، ياعني باسقانىڭ سەزىمدەرىن تاني الماسا جانە وعان ورتاقتاسا الماسا، ول جاقىندارىن ءجيى رەنجىتۋى مۇمكىن. تانىستارىمەن قارىم-قاتىناس كەزىندە ونىڭ بۇل مىنەزى بايقالماۋى مۇمكىن. ءبىراق دوستارى نەمەسە تۋىستارىنا كەلگەندە بۇل ءجيى رەنىشكە جانە تۇسىنىسپەۋشىلىككە اكەلەدى. الايدا ەمپاتيانى دامىتۋعا بولادى. بۇل جاقسى كورەتىن ادامدارىڭىزدى رەنجىتپەۋگە كومەكتەسەدى. ول ءۇشىن جاقىندارىڭىزدى تىڭداپ ۇيرەنىڭىز، اڭگىمەلەسۋ كەزىندە ناقتىلاۋشى سۇراقتار قويىڭىز. سونداي-اق ەموتسيالار جايلى كوبىرەك زەرتتەڭىز.

اقپارات دەرەككوزى: massaget.kz