شىمكەنت ساياباعىنداعى كولدە قولتىراۋىن ءجۇر: ۆيدەوعا تۇسىنىك بەرىلدى

شىمكەنت. قازاقپارات - شىمكەنتتەگى «جايلاۋكول» ساياباعىنداعى كولدە ەشقانداي قولتىراۋىن جوق، دەپ حابارلايدى قازاقپارات ءتىلشىسى.

الەۋمەتتىك جەلىگە ۆيدەو جۇكتەگەن تۇرعىن «جايلاۋكول» ساياباعىنداعى كولدەن ۇلكەن قولتىراۋىن كورگەندىگىن جەتكىزەدى. ونىڭ سوزىنشە، بالا-شاعاسىمەن بىرگە كاتامارانمەن سۋ ۇستىندە سەرۋەندەپ جۇرگەن كەزدە 2 مەترگە جۋىق قولتىراۋىن الدارىنان كەسىپ وتكەن.

ۆيدەو اۆتورىنىڭ ايتۋىنشا، سول جەرگە ساياباق اكىمشىسى شاقىرىلعان، ءبىراق ولار قولتىراۋىننىڭ كولدە بولۋى ىقتيمالدىعىن جوققا شىعارعان.

جەلىدە جاريالانعان جازباعا پىكىر بىلدىرۋشىلەر ەكىگە ءبولىندى. ءبىرى شىندىق دەپ قابىلداسا، ەندى ءبىرى وقيعاعا سەنبەيتىندىكتەرىن جەتكىزۋدە. اراسىندا «باي-باقۋاتتى ادامدار ۇيىندە اسىراپ وتىرعان قولتىراۋىندى باعا الماي، كولگە الىپ كەلىپ تاستاپتى» ، «زووباقتان قولتىراۋىن قاشىپ كەتىپتى» دەگەن سىڭايداعى جازبالار دا بار.

اتالعان ۆيدەوعا قاتىستى «جايلاۋكول» ساياباعىنىڭ اكىمشىلىگىنە حابارلاسىپ، ءمان-جايدى بىلدىك.

«بۇل - جالعان اقپارات. مۇنى ءتۇسىندىرۋ ءۇشىن ۆيدەو اۆتورىن ىزدەستىرىپ ەدىك، تاپپادىق. قۇقىق قورعاۋ ورگاندارىنا جۇگىنگەنىمىز جوق. ساياباقتاعى كولدە ەشقانداي قولتىراۋىن جوق. تەك بالىقتار عانا بار»، - دەلىنگەن دەمالىس ورنى اكىمشىلىگى ۇسىنعان اقپاراتتا.

سونداي-اق قالا زووباعىنا حابارلاسىپ كوردىك. ماماندار مەكەمەدەن ەشقانداي قولتىراۋىن قاشپاعاندىعىن، بارلىعى ورنىندا ەكەندىگىن ءمالىم ەتتى.