وقۋ جىلى جاقىندادى. الماتى مەن استانادا پاتەر جالداۋ قانشا بولىپ جاتىر؟

استانا. قازاقپارات - وقۋ جىلى جاقىندادى، دەمەك بۇل استانا، الماتى سەكىلدى ءىرى قالالارعا اعىلاتىن ستۋدەنتتەر قاتارى دا كوبەيدى دەگەندى بىلدىرەدى.

تامىزدىڭ ورتاسى مەن اياعى - پاتەر جالعا بەرەتىندەر ءۇشىن ماۋسىمدىق كەزەڭ. بۇل كەزەڭدە پاتەر باعاسى شارىقتاپ وسەتىنى ايتپاسا دا تۇسىنىكتى. ونىڭ ۇستىنە ەلىمىزدەگى جاتاقحانالاردا ستۋدەنتتەرگە 70 مىڭ ورىن جەتپەيدى. ءىرى قالالارداعى پاتەر باعالارىنا، ستۋدەنتتەر قايدا ورنالاسا الاتىنىنا شولۋ جاساعان.

قازىر الماتىدا پاتەر جالداۋ قۇنى قانشا؟

مينيستر ساياسات نۇربەك بۇعان دەيىن الماتىدا 30 مىڭنان اسا تۇلەككە ورىن جەتپەسە، بيىل ونىڭ 10 مىڭىنىڭ ماسەلەسى شەشىلگەنىن ايتقان ەدى. الايدا بۇل دا جاقسى كورسەتكىش ەمەس.

ءۇي ىزدەۋگە ارنالعان تانىمال سايتتاردىڭ بىرىنە شولۋ جاساپ كوردىك. شىلدەنىڭ اياعىندا 1 بولمەلى، ءبىراق تۇركسىب اۋدانىنداعى پاتەر 160 مىڭ تەڭگە بولسا، ناۋرىزباي اۋدانىنداعى مۇنداي پاتەر 170 مىڭ تەڭگەگە، ال 2 بولمەلى بوستاندىق اۋدانىنداعى پاتەر 300 مىڭ تەڭگەگە باعالانعان ەدى. ءدال وسى اۋدانداعى ەكى بولمەلى پاتەرلەردىڭ ءبىرى 450 مىڭ تەڭگەگە دە باعالانعان بولاتىن.

مەدەۋ اۋدانىنداعى ءۇش بولمەلى پاتەر باعاسى 700 مىڭ تەڭگەگە جەتكەن ەدى. ءتىپتى جاقسى جوندەۋ جاسالعان 3 بولمەلى ءۇيدىڭ باعاسى 1 ميلليون 50 تەڭگەگە باعالانعان. ال مەدەۋ اۋدانىنداعى 4 بولمەلى پاتەرلەردىڭ ءبىرىنىڭ باعاسى 1 ميلليون 300 مىڭ تەڭگە بولدى. دەمەك پاتەرلەر باعاسى 150 مىڭنان باستاپ وسە بەرەتىنى بايقالعان بولاتىن. اراسىندا 200، 250، 300، 350 مىڭعا دا پاتەرلەر بار.

18 كۇن ىشىندە باعا قالاي وزگەردى؟ قازىر دە ەڭ ارزان دەگەن 170 مىڭ تەڭگە كولەمىندەگى پاتەرلەر ناۋرىزباي، تۇركسىب اۋداندارىندا قالعان. المالى، بوستاندىق اۋداندارىنداعى 1 بولمەلى پاتەر قۇنى 250 مىڭ-280 تەڭگە ارالىعىندا بولسا، ال مەدەۋ، اۋەزوۆ اۋداندارىنداعى 2 بولمەلى پاتەر 300-450 مىڭ تەڭگە كولەمىندە. ءتىپتى ءبىر بولمەنى 350 مىڭ تەڭگەگە باعالاعاندار دا بار. مۇنداي باعا 2-3 ستۋدەنتكە اۋىر سوعاتىنىن ەسكەرسەك، كەم دەگەندە 4-5 ادامنان تۇرادى دەپ ەسەپتەسەك، ءار ستۋدەنتكە 50-60 مىڭنان كەلەدى. الايدا ءۇي يەلەرىنىڭ ءبارى دەرلىك كوپ ادام تۇرۋىنا كەلىسە بەرمەيدى.

Krisha.kz سايتىندا 180 مىڭعا دەيىنگى كولەمدە 229 جارناما جاريالانعان. ءبىراق بارلىعى دەرلىك قالانىڭ شەت اۋداندارىندا، ال جاقىن دەگەنى ەسكى جاتاقحانالاردا ورنالاسقان. الايدا امالى قۇرىعان ستۋدەنتتەر پاتەر تاپپاعاندا كەيدە وسىنداي جاتاقحانالارداعى بولمەلەردى دە الىپ جاتادى.

الماتىدا بىرنەشە جىلدان بەرى پاتەر جالداپ تۇراتىن جاينا ستۋدەنت بولماسا دا بۇل ماۋسىم باسقا پاتەر جالداپ تۇراتىندارعا دا اسەر ەتىپ جاتقانىن ايتادى.

«بۇرىنعى پاتەر يەسى ءۇيىن ساتۋعا شىعاراتىنىن ايتتى. سوندىقتان تەز ارادا پاتەر ىزدەۋگە ءماجبۇر بولدىق. ماۋسىمدا اۋەزوۆ اۋدانىنان ءبىر بولمەلى پاتەردى 200 مىڭ تەڭگەگە تاپتىق. الايدا ءۇي يەسى ماۋسىم قىزعان كەزدە 250 مىڭ تەڭگەگە كوتەرەتىنىن ايتتى. بۇرىنعى ءۇي يەسى دە باسىندا 200 مىڭ تەڭگەگە كەلىسكەنىمىزبەن كەيىن 250، ال ودان كەيىن 300 مىڭعا كوتەرىپ تاستاعان ەدى. قايدا اپارا جاتىر باعانى؟ تۇسىنبەيمىن. الدا تاعى سەزون كەلە جاتىر، تاعى كوتەرىلەتىن شىعار»، - دەيدى ول.

بىرنەشە جىلدان بەرى ءىرى قالالاردا پاتەر جالعا بەرۋ قىزمەتىمەن اينالىساتىن رەلتور، MAJOR TEAM جىلجىمايتىن مۇلىك اگەنتتىگىنىڭ ديرەكتورى ءالىمجان داۋىلبايەۆ الماتىدا پاتەر جالعا الۋ باسقا قالالارعا قاراعاندا قىمباتقا تۇسەتىنىن ايتادى.

«استاناعا قاراعاندا الماتىدان پاتەر تابۋ وڭايىراق. ويتكەنى كوپشىلىگى - ەسكى ۇيلەر. پاتەر يەلەرىنە كىم تۇرسا دا، ەشقانداي ايىرماشىلىق جوق. ءبىراق باعاسىنا كەلگەندە، استانادان ەكى ەسە جوعارى. الماتىدا كوپ ادام تۇرادى. جىل سايىن قانشاما ادام كەلىپ جاتىر. سوندىقتان باعاسى الدەقايدا جوعارى ءارى تومەندەمەيدى. استانادا 2 بولمەلى پاتەردى 200 مىڭ تەڭگەگە تابۋعا بولسا، الماتىدا 400-450 مىڭ تەڭگەگە دەيىن بارادى. كەم دەگەندە 300 مىڭ تەڭگە بولادى»، - دەيدى ول.

الماتىدا تۇركسىب، ناۋرىزباي اۋداندارىندا پاتەر جالداۋ قۇنى ارزانىراق. الايدا رەلتور ستۋدەنتتەر دە بۇل اۋدانداردان پاتەر الا بەرمەيتىنىن، ويتكەنى قالاعا قاتىناۋ قاشىعىراق بولعاندىقتان، ءتيىمسىز ەكەنىن ايتادى. ال قالانىڭ ىشىندەگى باعا كوپشىلىككە وڭاي تيمەيتىنى انىق.

«كەيىنگى 6-7 جىلدا الماتىدا باعا وسپەسە، ءتۇسىپ جاتقان جوق. باعا جىل سايىن ءوسىپ كەلە جاتىر. الدىڭعى جىلى ءوزىم دە پاتەر جالعا الدىم. ول كەزدە 200 مىڭعا السام، قازىر 350 مىڭ تەڭگەگە وتكىزىپ جاتىرمىز. تامىز، قىركۇيەكتە قاتتى وسسە، قىستا باعا 100 مىڭ تەڭگەگە دەيىن تۇسەدى. سونداي-اق، الماتىدا جاتاقحانا كوپ، سوندىقتان بىرنەشە ادام بىرىگىپ، سونداي ورىنداردى دا جالعا الىپ جاتادى»، - دەيدى ول.

استانادا پاتەر جالداۋ قۇنى قانشا؟

ستۋدەنتتەر جينالاتىن ءىرى قالانىڭ ءبىرى استانادا باعاسى 180 مىڭ تەڭگەگە دەيىنگى 610 جارناما جاريالانعان.

ونىڭ ىشىندە 110، 130، 150، 160، 170 مىڭ تەڭگەگە باعالانعاندار بار. شارشى مەترى مەن بولمە سانىنا قاراي وزگەرە بەرەدى.

رەلتور ءالىمجان داۋىلبايەۆ استانادا بىلتىرعا قاراعاندا پاتەر باعاسىندا ايىرماشىلىق بار ەكەنىن ايتادى. ونىڭ سوزىنشە، بىلتىر 700 مىڭ تەڭگەگە جالدانعان ءۇي بيىل 400 مىڭ تەڭگەگە جالعا بەرىلگەن.

بىلتىرعى باعا

بيىلعى باعا

الايدا رەلتور بۇل نارىقتا ءجيى وتەتىن 1-2 بولمەلى پاتەرلەرگە قاتىستى ەمەس ەكەنىن جەتكىزدى. ويتكەنى جاستار، جاس وتباسىلار كوبىنە 1-2 بولمەلى پاتەرلەردى جالعا الادى.

«پاتەر جالداۋ باعاسى بىلتىرعا قاراعاندا 25-30 پايىزعا تومەندەدى. سەبەبى وزگە ۇلت وكىلدەرى ازايدى. باسىم كوپشىلىگى رەسەيلىكتەر مەن ۋكراينالىقتار بولعاندىقتان، بىلتىر باعا كۇرت وسكەن ەدى. ءبىراق 3-4 بولمەلى پاتەرلەردىڭ باعاسى 50 پايىزعا تۇسكەنىمەن، 1-2 بولمەلى پاتەرلەردىڭ باعاسى سول كۇيىندە»، - دەيدى ول.

ستۋدەنتتەرگە كەلگەندە جاعداي قاشان دا كۇردەلى. ءالىمجان داۋىلبايەۆ تا كوپ ءۇي يەسى ءالى كۇنگە ستۋدەنتتەرگە پاتەرىن جالعا بەرۋدەن قاشقاقتايتىنىن جەتكىزدى.

«قازىر كوپشىلىك ءۇي يەسى ستۋدەنتتەرگە ءوز پاتەرلەرىن بەرگىسى كەلمەيدى. ويتكەنى ءۇي يەلەرىندە جاستار ءۇيدى توزدىرىپ تاستايدى، كوپ تۇرادى دەگەن تۇسىنىك قالىپتاسقان. بەرگەن جاعدايدىڭ وزىندە دە 80 پايىزى 100 پايىز كولەمىندە دەپوزيت الادى. الدىڭعى جىلعا قاراعاندا 150، 100 مىڭ تەڭگەگە تابۋ وتە قيىن. تاپقان جاعدايدىڭ وزىندە وڭتۇستىك شىعىس بولىكتەن بولادى. قازىرگى باعا 200 مىڭ تەڭگەدەن باستالادى»، - دەيدى رەلتور.

سونىمەن قاتار، ول ستۋدەنتتەر قولجەتىمدى باعادا پاتەر تابا الاتىن جەرلەردى اتادى: جاعالاۋ اۋدانى، جاستار شاعىناۋدانى، 13-ماگيسترال، مومىش ۇلىنىڭ بويى.

باسقا وڭىردەن كەلەتىن ستۋدەنتتەر قايدا ورنالاسا الادى؟

پاتەر جالداۋ باعاسى بىرنەشە جىل بۇرىنعىداي تومەن ەمەس. سوندىقتان ستۋدەنتتەرگە ارنالعان ەڭ ءتيىمدى نۇسقانىڭ ءبىرى - پاتەر جالداپ تۇراتىن ادامنىڭ جانىنا بارۋ.

Instagram مەن Telegram-دا پاتەر جالداپ تۇراتىنداردى ىزدەۋگە ارنالعان توپتار كوپ. ءبىراق مۇنداي كەزدە الاياقتار دا كوپ ەكەنىن دە ۇمىتپاۋ قاجەت. سوندىقتان مۇنداي توپتاردى قاراۋ كەزىندە وقىرمان، جارناما سانىنا نازار اۋدارعان دۇرىس.

ودان بولەك krisha.kz سايتىنداعى بولمەلەردى جالعا الۋ بولىمىنەن ىزدەۋگە بولادى.

ستۋدەنتتەرگە ارنالعان تاعى ءبىر نۇسقا - حوستەلدەر. بۇعان دەيىن مينيستر الماتى قالاسىنداعى 59 حوستەلمەن كەلىسىمشارتقا قول قويىلعانىن، 10 مىڭ توسەك-ورىنعا كەپىلدىك بەرىلگەنىن ايتقان ەدى. سوعان وراي بىرنەشە حوستەلگە جازىپ، باعاسىن سۇراپ كوردىك. ءبىرى ءبىر اي تۇرۋ باعاسى ءبىر توسەك ورىنعا 90 مىڭ تەڭگە ەكەنىن، ال ەندى ءبىرى ءبىر توسەك ورىنعا 80 مىڭ تەڭگە ەكەنىن ايتتى. حوستەلدەردە باعا ادام سانىنا بايلانىستى وزگەرەتىنىن ۇمىتپاۋ قاجەت.

بۇل ماسەلەگە بايلانىستى عىلىم جانە جوعارى ءبىلىم مينيسترلىگىنە رەسمي ساۋال جولداپ، حوستەلدەردىڭ باعاسى ارنايى بەكىتىلىپ- بەكىتىلمەيتىنىن جانە قاي حوستەلدەرمەن كەلىسىمشارتقا وتىرعاندارىن سۇرادىق.

ارەڭ تاپقان پاتەردى جالعا العاندا نەگە ءمان بەرۋ كەرەك؟

ايتا كەتەيىك، بۇعان دەيىن الماتىلىق رەلتور مامان ءلاززات يبرايەۆا پاتەر جالعا الۋعا بايلانىستى بىرنەشە كەڭەس بەرگەن ەدى.

1-كەڭەس. قۇجاتقا ءمان بەرۋ

ول ءۇشىن ءۇيدىڭ يەسىن راستايتىن قۇجاتتاردى سۇراۋىمىز كەرەك. ونداي قۇجاتقا جىلجىمايتىن مۇلىكتى ساتىپ العانى جونىندەگى كەلىسىمشارت پەن ءۇيدىڭ تەحنيكالىق پاسپورتى جاتادى. ءۇيدىڭ يەسىن بىلۋگە وسى قۇجات جەتكىلىكتى.

2-كەڭەس. قارىز بەن بورىش

ءۇيدىڭ ساتىلىمدا تۇرعان نە تۇرماعانىنا، كوممۋنالدى قارىزدارى بار-جوعىنا دا كوز جەتكىزگەن ابزال.

3-كەڭەس. كەلىسىمشارتقا قول قويۋ

ءۇيدىڭ يەسى كىم ەكەنىن بىلگەن سوڭ، سول ازاماتپەن كەلىسىمشارتقا وتىرۋ قاجەت. پاتەر يەلەرىنىڭ كەيبىرى كەلىسىمشارت جاساعىسى كەلمەيدى. ءبىراق كەلىسىمشارت قوس تاراپتىڭ دا قۇقىعىن قورعاۋعا، كەلەڭسىز جاعدايى دۇرىس رەتتەۋگە كومەكتەسەتىن قۇرال.

4-كەڭەس. دەپوزيت بەرۋگە ءمان بەرۋ

ماماننىڭ ايتۋىنشا، دەپوزيت بەرۋ - وتە داۋلى ماسەلە. بىرەۋى بەرۋ كەرەك دەسە، ەندى ءبىرى قارسى.

«دەپوزيت بەرۋ ءۇردىسى قازاقستاندا كەيىنگى 2-3 جىلدا پايدا بولدى. باتىستان كەلگەن جاڭالىق. دەپوزيت الۋ ارقىلى ءۇي يەسى مۇلكىن، ءۇيدىڭ جوندەۋىن ساقتاندىرادى. بۇل جاعىنان دۇرىس. دەپوزيت بەرىلگەنى جايلى كەلىسىمشارتقا دا قوسقان ءجون. ءبىراق مەنىڭ ويىمشا، ونىڭ سوماسى اقىلعا قونىمدى بولۋى ءتيىس. كەيبىر پاتەر يەلەرى دەپوزيتتىڭ قۇنىن ءبىر ايلىق جالعا بەرۋ قۇنىنان دا ارتىق سۇرايدى»، - دەگەن بولاتىن رەلتور.

5-كەڭەس. ەشكىمگە الدىن الا اقشا بەرمەۋ

ماماننىڭ ايتۋىنشا، رەلتورعا دا، ءۇيدىڭ يەسىنە دە الدىن الا اقشا بەرۋگە بولمايدى.

قازىر رەلتورلاردىڭ كوبى ناتيجە بولعاندا عانا اقى الادى. ء بىراق بۇلاردىڭ اراسىندا تەك جالعا بەرۋمەن عانا اينالىساتىن، كۇماندى اگەنتتىكتەر بار.

«ولار ادەتتە ءۇيدى تاۋىپ بەرمەستەن بۇرىن 15-20 مىڭ تەڭگە كولەمىندە اقى سۇرايدى. ول دۇرىس ەمەس. سوندىقتان مۇنداي كۇماندى ۇيىمداردان باس تارتقان ءجون»، - دەگەن ەدى ول.

ەسكە سالايىق، بۇعان دەيىن عىلىم جانە جوعارى ءبىلىم ءمينيسترى ساياسات نۇربەك الماتىداعى جاتاقحانالاردى تەكسەرىپ شىققانى، ناتيجەسىندە تاپشىلىقتىڭ باسىم بولىگى الماتى مەن استانا قالالارىندا ەكەنى حابارلانعان بولاتىن.

سونداي-اق، اتا-اناسىنان ايىرىلعان ستۋدەنتتەر ەندى جاتاقحانادا تەگىن تۇراتىنى ايتىلدى.

اقپارات دەرەككوزى: Massaget.kz