شەكارادان زاڭسىز ءوتۋ ءۇشىن ادامدار ءتۇرلى قۋلىققا بارادى - شەكاراشى
27 جاستاعى اسكەري قىزمەتشى وسى سالاعا كەلگەلى 30 عا جۋىق شەكارا بۇزۋشىنى قولعا ءتۇسىرىپ، وزىنە جۇكتەلگەن مىندەتتى جاۋاپكەرشىلىكپەن ورىنداپ كەلەدى. كاسىبي مەرەكە قارساڭىندا ارنۇر نۇرماعانبەت ۇلىن قازاقپارات ءتىلشىسى اڭگىمەگە تارتتى.
ارنۇر امىرعاليەۆ ماعجان جۇمابايەۆ اۋدانىنداعى بايان باتىر شەكارا بولىمشەسىن وتكەن جىلدىڭ قازان ايىنان باستاپ باسقارىپ كەلەدى. ءوز مىندەتىنە بەرىك، سوزدەن گورى ءىستىڭ ادامى ارنۇر نۇرماعانبەت ۇلى وڭىردەگى جيىرمادان استام شەكارا بولىمشەسى باستىعىنىڭ ىشىنەن توپ جارىپ، بىلتىر وبلىستىڭ ۇزدىك شەكارا بولىمشەسىنىڭ باستىعى اتاندى.
ايتۋىنشا، ول جەردە بارلىق كورسەتكىش ەسكەرىلگەن، بولىمشەدەگى ىشكى تارتىپتەن باستاپ، شەكارا بۇزۋعا ارەكەت جاساپ جاتقانداردى انىقتاپ، ۇستاۋعا دەيىن. قول استىنداعى قىزمەتشىلەردىڭ ەشقانداي جاۋاپكەرشىلىككە تارتىلماۋى - وسىنىڭ بارىنەن ەڭ جوعارى بالل جيناعان باستىق ۇزدىك اتانادى.
«مەن الماتى وبلىسى الاكول اۋدانى جايپاق اۋىلىندا دۇنيەگە كەلدىم. 2014 -جىلى تۋعان اۋىلىمداعى مۇقان تولەبايەۆ اتىنداعى ورتا مەكتەپتە ءبىتىرىپ، سول جىلى الماتى قالاسىنداعى شەكارا قىزمەتى اكادەمياسىنا وقۋعا ءتۇستىم، وسىلايشا شەكاراشى ماماندىعىن الىپ شىقتىم. تۋعان جەرىن سۇيمەيتىن ادام جوق، اركىم قولىنان كەلگەنشە وتانىنا قىزمەت ەتكىسى كەلەدى. ال مەن بولسام بايتاق جەرىمىزدى، تۋعان ەلىمىزدى قورعايتىن شەكاراشى بولسام دەدىم.
قازىبەك ءبيدىڭ «جەرىنىڭ شەتىن جاۋ باسپاسىن دەپ نايزاعا ۇكى تاققان» دەگەن ءسوزى بار، شەكاراشى بولۋ ءۇشىن ەڭ الدىمەن پاتريوت بولۋ قاجەت. سونداي-اق شىدامدىلىق، قايسارلىق ادام بويىندا بولعانى ءجون. ەل سەنىمىن، ءۇمىتىن تولىق اقتاۋ ءۇشىن الدىڭعى شەپتە كەڭ- بايتاق ەلىمىزدىڭ شەكاراسىن كۇزەتىپ ءجۇرمىز»، - دەيدى ارنۇر امىرعاليەۆ.
بايان باتىر شەكارا بولىمشەسىنىڭ قىزمەتكەرلەرى بيىل مەملەكەتتىك شەكارانى بۇزىپ وتپەك بولعان 14 ادامدى قولعا ءتۇسىردى. ولار كورشى مەملەكەتكە بارىپ، جاقسى جۇمىسقا ورنالاسۋدى، قاراجات تابۋدى كوزدەگەن. ەندى ءبىرى تۋىستارىنا وتپەك بولعان ەكەن.
«رەسەيدە بالا-شاعاسى، اعايىن-تۋىستارى بار، سولارعا بارىپ-قايتقىلارى كەلەدى، ءبىراق نەگىزگى بەكەتتەن وتە المايدى، تىيىم سالىنعان بولۋى مۇمكىن. كەيبىرىنىڭ قارىزى بار، ەندى ءبىرى قىلمىستىق جاۋاپكەرشىلىككە تارتىلعان بولۋى مۇمكىن. مىنە وسىندايلار زاڭسىز وتۋگە ارەكەت جاسايدى. مىسالى، بيىل قولعا تۇسكەندەردىڭ بەسەۋى - ەل ازاماتى، ەكەۋى - وزبەكستان ازاماتى. ەكەۋى سىعان جانە قالعانى رەسەيلىكتەر. ولاردى ۇستاپ، مەملەكەتتىك شەكارا رەجيمىن بۇزعانى ءۇشىن ق ر مەملەكەتتىك شەكارا تۋرالى زاڭىنىڭ 514-بابىنا سايكەس ايىپپۇل سالامىز، ەگەر قازاقستان ازاماتى بولعان جاعدايدا ايىپپۇل مولشەرى – 10 ايلىق ەسەپتىك كورسەتكىش. شەتەلدىك بولسا ميگراتسيالىق پوليتسياعا تاپسىرىپ، رەسپۋبليكا اۋماعىنان 10 كۇن ىشىندە شىعارىلادى، ەلدەرىنە قايتارىلادى.
مەملەكەتتىك شەكارانى بۇزۋشىلار وزدەرىمەن بىرگە اكەلە جاتقان زاتتارىن، تەمەكى قالدىقتارىن، ىشكەن سۋسىندارىنىڭ بوس ىدىستارىن قالدىرىپ كەتەدى. سول ارقىلى تابۋعا بولادى. ءيىسشىل، ۇيرەتىلگەن يتتەرىمىز بار، سولاردى ىزگە سالىپ، الىسقا ۇزاتپاي قۇرىقتايمىز»، - دەيدى شەكاراشى.
وتان تىنىشتىعىن كۇزەتۋ جولىندا ەڭبەك ەتىپ جۇرگەن ارنۇر نۇرماعانبەت ۇلى وسى ۋاقىتقا دەيىن 30 عا جۋىق شەكارا بۇزۋشىنى قولعا تۇسىرگەن.
«شەكارانى بۇزۋشىلار ءتۇرلى ءىس-ارەكەت، ايلا-تاسىلدەرگە بارادى. بىزدە شەكارا سىزىعى بويىمەن ءىز باقىلاۋ جولاعى بار. ونى شەكارادان زاڭسىز ءوتۋشىنىڭ ءىزىن كورۋ ءۇشىن تراكتورمەن جىرتىپ قويامىز. وتكەندە ءىز قالىپ قويادى. سول ءىزدى جويۋ ءۇشىن ارتتارىنان سىپىرتقىمەن سىپىراتىندار بولادى نە بولماسا جىلقىنىڭ، سيىردىڭ تۇياعىن اياقتارىنا بايلاپ الىپ، سول ارقىلى اتتاپ وتەدى. كەيبىرى تالدى، تاياق تاستاپ، ءىزىن كورسەتپەۋ ءۇشىن سونىڭ ۇستىمەن وتەدى. ەندى ءبىرى سىرعاۋىلدى جەرگە قاداپ، كەلەسى بەتكە سەكىرىپ وتەدى.
جالپى كۇش قۇرىلىمىندا ىستەيتىندەر مىندەتتى تۇردە سپورتقا جاقىن بولۋى ءتيىس. ويتكەنى قىلمىسكەرلەرمەن بەتپە-بەت كەلەتىن كەزدەر بولادى. قارسىلىق كورسەتكەندە ءادىس كورسەتىپ، قاشقان كەزدە قۋىپ جەتىپ ۇستاۋ - جاقسى فيزيكالىق دايىندىقتىڭ بەرەرى كوپ. اكادەميادا وقىپ جۇرگەندە قويان-قولتىق ۇرىستان وسى وقۋ ورنىنىڭ 55 ك گ سالماقتا چەمپيونى بولدىم. بىلتىر وبلىس بويىنشا شەكارا قىزمەتى دەپارتامەنتى باستىعىنىڭ كۋبوگى بولدى، وعان بارلىق كۇش قۇرىلىم وكىلدەرى قاتىستى. سولاردىڭ اراسىندا ءبىرىنشى ورىن الدىم.
قازاقتىڭ داڭقتى باتىر ۇلدارىنىڭ ءبىرى باۋىرجان مومىش ۇلى «وتان ءۇشىن وتقا ءتۇس - كۇيمەيسىڭ» دەگەن ەكەن. كەڭ-بايتاق جەرىمىزدى باتىر بابالارىمىز جاۋعا بەرمەي امان الىپ قالىپ، بىزگە امانات ەتتى. مەنىڭ شەكاراشى رەتىندەگى مىندەتىم - ەل شەاراسىن قىراعىلىقپەن، ابىرويمەن كۇزەتۋ»، - دەيدى ارنۇر امىرعاليەۆ.
اۆتور:
اقەركە داۋرەنبەك قىزى
