ەلىمىزدە سپورتپەن شۇعىلداناتىن ەرەكشە قاجەتتىلىگى بار ادامدار سانى كوبەيدى
ەگەر 2020 -جىلى بۇل كورسەتكىش 38352 بولسا، 2023 -جىلدىڭ باسىندا 51325 ادامعا جەتتى، دەپ حابارلايدى قازاقپارات مادەنيەت جانە سپورت مينيسترلىگىنىڭ باسپا ءسوز قىزمەتىنە سىلتەمە جاساپ.
سپورتپەن شۇعىلداناتىن ەرەكشە قاجەتتىلىكتەرى بار ادامداردىڭ سانى بويىنشا قوستاناي وبلىسى كوش باسىندا. وڭىردە ەرەكشە قاجەتتىلىكتەرى بار 5687 ادام سپورتپەن تۇراقتى تۇردە اينالىسادى. ودان كەيىن شىعىس قازاقستان وبلىسى (4997 ادام) جانە استانا قالاسى (4514 ادام) تۇر. ۇزدىك بەستىكتى تۇركىستان (4298 ادام) جانە جامبىل (4057 ادام) وبلىستارى تۇيىندەيدى.
ايتا كەتۋ كەرەك، ەڭ قارقىندى ءوسىم ەلوردادا: 3 جىل ىشىندە ەرەكشە قاجەتتىلىكتەرى بار سپورتپەن شۇعىلداناتىن ادامداردىڭ سانى 3232 ادامعا ارتتى. ەكىنشى ورىندا ش ق و (1585+ ادام)، ءۇشىنشى ورىندا - قوستاناي وبلىسى (+1295 ادام). جامبىل وبلىسىندا 668 ادامعا، تۇركىستاندا - 659 ادامعا ارتتى.
«ەرەكشە قاجەتتىلىكتەرى بار ادامداردىڭ دەنە شىنىقتىرۋمەن اينالىسۋىنا جاعداي جاساماي، بۇقارالىق سپورتتى دامىتۋ مۇمكىن ەمەس. قازاقستاندا ەرەكشە قاجەتتىلىكتەرى بار ادامدارعا ارنالعان 15 سپورت كلۋبى مەن 3 مەكتەپ، سونداي-اق الماتى وبلىسىندا سپورتتى دامىتۋ ديرەكسياسى جۇمىس ىستەيدى. ءبىز سپورتتىق ينفراقۇرىلىمدى قولجەتىمدى ەتۋگە نيەتتىمىز. سوندىقتان قازىر ەلىمىزدىڭ بارلىق وڭىرىندە 113 جاڭادان سپورت نىسانىن سالۋ بويىنشا جۇمىس ءجۇرىپ جاتىر»، - دەدى مادەنيەت جانە سپورت ۆيتسە-ءمينيسترى سارسەن قۇرانبەك.
