الماتى وبلىسىنىڭ دارىگەرلەرى وڭەشىنە سۇيەك تۇرىپ قالعان ايەلدى امان الىپ قالدى
قالا تۇرعىنىنىڭ ايتۋىنشا، ول ءتورت كۇن بۇرىن تاماق ءىشىپ وتىرعاندا، سۇيەك جۇتىپ قويعان.
«سۇيەك تاماعىما كەتىپ قالعاندا مەن دەرەۋ ءبىزدىڭ اۋداندىق اۋرۋحاناعا باردىم، دارىگەرلەر امبۋلاتوريالىق ەمدەلۋگە جىبەردى. تاماعىمنىڭ اۋىرعانى باسىلمادى، سودان جەكە كلينيكاعا باردىم، ولار مەنى وبلىستىق اۋرۋحاناعا جىبەردى»، - دەيدى ناۋقاس.
تەكسەرۋ بارىسىندا دارىگەرلەر وڭەشتىڭ ءىش قۋىسىنىڭ شىرىشتى قابىعىندا وتكىر سىزىقتىق جىرتىلۋلاردىڭ پايدا بولعانىن انىقتاعان.
«باستاپقىدا حيرۋرگيالىق ارالاسۋ ارقىلى سۇيەكتى الۋ ماسەلەسى تۋىندادى، ويتكەنى شىرىشتى قابىق جارىلعان ەدى جانە سۇيەك اعزادا ءتورت كۇننەن استام بولدى. ءبىراق، كونسيليۋم ەندوسكوپيالىق ەمدەۋ ءادىسىن جۇرگىزۋ تۋرالى شەشىم قابىلدادى»، - دەيدى كلينيكالىق-دياگنوستيكالىق بولىمشەنىڭ دارىگەرى دانيار قوجانتاي ۇلى.
الماتى وبلىستىق دەنساۋلىق ساقتاۋ باسقارماسى اتاپ وتكەندەي، الماتى كوپسالالى كلينيكالىق اۋرۋحاناسىنىڭ دارىگەرلەرى دياگنوستيكا مەن ەمدەۋدىڭ از ينۆازيۆتى ەندوسكوپيالىق ادىستەرىن كەڭىنەن قولدانادى، ولار كوپتەگەن جاعدايلاردا كلاسسيكالىق جەدەل حيرۋرگيا ادىستەرىن ءتيىمدى الماستىرادى.
«اعزاعا حيرۋرگيالىق پىشاق تيمەگەن سوڭ، مۇنداي ارالاسۋلاردان كەيىن ناۋقاستىڭ وڭالۋى الدەقايدا جىلدام وتەدى. قازىر كەزدە ناۋقاستىڭ جاعدايى قاناعاتتانارلىق دەپ باعالانىپ وتىر»، - دەدى دارىگەر.
