ەكىنشى دۇنيەجۇزىلىك سوعىستا قازا تاپقان ەكى اسكەردىڭ سۇيەگى تۋعان جەرىنە قايتا جەرلەنبەك
وعان قورعانىس مينيسترلىگىنىڭ وكىلدەرى، قارۋلى كۇشتەردىڭ ارداگەرلەرى، «Atamnyn Amanaty» ق ب، «اسكەري-پاتريوتتىق جانە ىزدەستىرۋ قوزعالىسى قاۋىمداستىعى» ر ق ب وكىلدەرى، قارۋلى كۇشتەر ۇلتتىق اسكەري-پاتريوتتىق ورتالىعىنىڭ اسكەري قىزمەتشىلەرى قاتىستى.
بەينەكونفەرەنتسبايلانىس رەجيمىندە وتكەن شاراعا پەتروپاۆل قالاسى مەن جەتىسۋ وبلىسى الاكول اۋدانى اكىمدىكتەرىنىڭ وكىلدەرى قوسىلدى.
- بۇگىن ۇلى وتان سوعىسى مايداندارىندا قازا تاپقان قازاقستاندىق جاۋىنگەرلەر تۋعان توپىراعىنا ورالدى. حابارسىز كەتكەندەردىڭ تاعدىرى ولاردىڭ ۇرپاقتارىن ءالى كۇنگە دەيىن الاڭداتادى. ولار اتالارى مەن اكەلەرىنەن قانداي دا بولسا حابار كۇتەدى. ۇرپاعى ءۇشىن ءوز ومىرلەرىن قۇربان ەتكەن بارلىق جاۋىنگەرلەر ماڭگى ەسىمىزدە، - دەپ اتاپ ءوتتى تاربيە جانە يدەولوگيالىق جۇمىس دەپارتامەنتىنىڭ باستىعى ادىلەت پولكوۆنيگى تىلەۋحان باسقوجايەۆ.
ىزدەستىرۋشىلەردىڭ ەرىك- جىگەرىنىڭ ارقاسىندا ەكى قازاقستاندىق قىزىلاسكەر: 1913-جىلى تۋعان يۆان سۋرنين مەن 1903-جىلى تۋعان فيليپپ پاراسەنكونىڭ تاعدىرى بەلگىلى بولدى.
117 جەكە اتقىشتار بريگاداسىنىڭ قىزىلاسكەرى يۆان فيليپپوۆيچ سۋرنيندى «پوكولەنيە» ىزدەستىرۋ جاساعىنىڭ ىزدەۋشىلەرى تۆەر وبلىسى، ولەنين مۋنيتسيپالدى وكرۋگى، درونيچەنو ەلدى مەكەنىنەن تاپقان. ول سولتۇستىك قازاقستان وبلىسىنىڭ پرەسنوۆ اۋداندىق اسكەري كوميسسارياتىنان شاقىرىلعان.
الماتى وبلىسىنىڭ تۋماسى فيليپپ لاۆرەنتيەۆيچ پاراسەنكونىڭ سۇيەگىن ايماقتىق «فرونتوۆىە دوروگي» اسكەري-پاتريوتتىق ىزدەۋ كلۋبىنىڭ ىزدەۋشىلەرى ىزدەپ تاپقان. ول الماتى وبلىسىنىڭ الاكول اۋدانىنان شاقىرىلعان.
سولتۇستىك قازاقستان وبلىسىندا يۆان سۋرنيننىڭ نەمەرەسى گالينا سامسونوۆا تۇرادى.
- اتامىزدىڭ وتانىنا ورالعانى ءۇشىن قورعانىس مينيسترلىگى مەن رەسەيلىك ىزدەۋشىلەرگە شىن جۇرەكتەن العىس ايتامىن. اتامىز قىزىنىڭ جانىنا جەرلەنەتىن بولادى. انام اكەسىنىڭ اۋىر شايقاستا قازا تاپقانىن بىلەتىن. ول بۇل تۋرالى سوعىستان امان ورالعان اتامنىڭ قارۋلاس دوسىنان ەستىپ بىلگەن، - دەيدى گالينا تاراسوۆنا.
وكىنىشكە قاراي، فيليپپ لاۆرەنتيەۆيچ پاراسەنكونىڭ تۋىستارى ءالى تابىلا قويعان جوق. ونى قايتا جەرلەۋمەن جەتىسۋ وبلىسى الاكول اۋدانىنىڭ اكىمدىگى اينالىساتىن بولادى.
قايتا جەرلەۋ راسىمدەرى وڭىرلەردە اسكەري قۇرمەتپەن وتەدى.
