جاتىر موينى قاتەرلى ىسىگى نەلىكتەن پايدا بولادى؟

استانا. قازاقپارات - دەنساۋلىق ساقتاۋ مينيسترلىگىنىڭ مالىمەتى بويىنشا، قاتەرلى ىسىك الەمدە جانە قازاقستاندا ءولىم-ءجىتىم سانى بويىنشا جۇرەك-قان تامىرلار اۋرۋلارىنان كەيىن ەكىنشى ورىندا تۇر.

قازاقستانداعى ايەلدەر اراسىنداعى ەڭ كوپ تاراعان قاتەرلى ىسىك تۇرلەرىنىڭ ءبىرى - جاتىر موينى قاتەرلى ىسىگى.

Massaget.kz جاتىر موينى قاتەرلى ىسىگىنىڭ بەلگىلەرى مەن ونىڭ الدىن الۋ جولدارىن ۇسىنادى.

ادەتتە، جاتىر موينى قاتەرلى ىسىگى 40-60 جاستاعى ايەلدەردە پايدا بولادى، ءبىراق سوڭعى كەزدەرى بۇل كورسەتكىش «جاسارىپ» كەلەدى.

جاتىر موينى وبىرى نەلىكتەن پايدا بولادى؟

جاتىر موينى قاتەرلى ىسىگى پايدا بولۋىنىڭ نەگىزگى سەبەپتەرى:

پاپيللوموۆيرۋستى جۇقپا؛

جىنىس گەرپەسىن، ا ي ت ۆ، تسيتومەگالوۆيرۋس، حلاميديوز جۇقتىرۋ؛

جىنىستىق ءومىردى ەرتە باستاۋ (16 جاسقا دەيىن)؛

ەرتە جاستا بالا كوتەرۋ؛

ۇزاق ۋاقىت بويى جانە كوپ تەمەكى شەگۋ؛

يممۋنيتەتتىڭ ءتۇسىپ كەتۋى؛

جاتىر موينى اۋرۋلارى؛

اعزاعا رادياتسيانىڭ جانە حيميالىق ۋىتتاردىڭ اسەرى؛

ەرتە تۇسىك جاساتۋ؛

ورگان جاراقاتتارى.

نەگىزگى قاۋىپتى ۆيرۋستار توندىرەدى: ولار ساۋ جاسۋشالاردىڭ قاتەرلىگە اينالۋىن ىنتالاندىرادى. اۋرۋ كەزىندە قاتەرلى جاسۋشالار ليمفامەن جاقىندا ورنالاسقان ليمفا تۇيىندەرىنە بارادى، سولايشا مەتاستاز تۇزەدى.

جاتىر موينى قاتەرلى ىسىگىنىڭ بەلگىلەرى

اۋرۋدىڭ دامۋىنا جانە تارالۋىنا قاراماستان، جاتىر موينى قاتەرلى ىسىگىنىڭ بەلگىلەرى بۇل ستاديادا مۇلدەم جوق بولۋى مۇمكىن نەمەسە ايقىن كورىنبەۋى مۇمكىن. دەسە دە، مىنا بەلگىلەردى بايقاعان بويدا دارىگەرگە كورىنۋ كەرەك:

ءتۇرلى بولىنىستەر، قان اعۋ (ەتەككىر ەمەس)؛

ءىش استىنىڭ اۋىرۋى؛

ءزار شىعارۋ كەزىندە اۋىرسىنۋ؛

جامباس تۇسىنان اۋىرلىق سەزىنۋ؛

جىنىستىق قاتىناس كەزىندە اۋىرۋ؛

اياق-قولدىڭ، سىرتقى جىنىستىق ورگانداردىڭ ءىسىنۋى؛

ىشەكتەر جانە قۋىق جۇمىسىنىڭ بۇزىلۋى؛

ءبىر جاق اياقتىڭ ءىسىنۋى.

سونداي-اق جاتىر موينى قاتەرلى ىسىگى كەزىندە سالماق تاستاۋ، جالپى السىزدىك، ناشار تابەت، جوعارى تەمپەراتۋرا، باس اينالۋ سەكىلدى جالپى بەلگىلەر دە بايقالۋى مۇمكىن.

جاتىر موينى قاتەرلى ىسىگىن قالاي انىقتايدى؟

ەڭ الدىمەن گينەكولوگ دارىگەردىڭ تەكسەرىسىنەن ءوتۋ كەرەك. گينەكولوگ ناقتى دياگنوز قويۋ ءۇشىن ناۋقاستى جان-جاقتى تەكسەرىستەن وتكىزەدى:

تسيتولوگيالىق سكرينينگ - جاتىر موينىنان الىنعان جۇعىندىنى تەكسەرۋ؛

كولپوسكوپيا - وپتيكالىق قۇرىلعى ارقىلى جىنىس ورگاندارىن تەكسەرۋ؛

باكتەريوسكوپيالىق تەكسەرىس - جۇعىندىنى جۇقپاعا تەكسەرۋدىڭ لابوراتوريالىق ءادىسى؛

جاتىر موينىنا كوزدەمەلى بيوپسيا - تىندەر ۇلگىسىنە اتيپيالىق جاسۋشالاردى انىقتاۋ اناليزى؛

كەۋدە، ءىش جانە جامباستى كومپيۋتەرلىك توموگرافياعا ءتۇسىرۋ.

جاتىر موينى قاتەرلى ىسىگىنىڭ ستاديالارى

ونكولوگتار دياگنوزدى ىسىكتىڭ مولشەرىنە جانە ونىڭ بۇكىل دەنەدە تارالۋ دارەجەسىنە قاراي قويادى.

قاتەرلى ىسىكتىڭ ستاديا بويىنشا دامۋ كەزەڭدەرى:

1-كەزەڭ: ىسىك جاتىر موينىمەن شەكتەلگەن؛

2-كەزەڭ: جاڭا ءتۇزىلىس جاتىردىڭ سىرتىنا شىققان، ءبىراق جامباس قابىرعاسىنا نەمەسە قىناپتىڭ تومەنگى ۇشتەن بىرىنە تارالماعان؛

3-كەزەڭ: ىسىك جامباس قابىرعاسىنا تارالعان جانە/نەمەسە قىناپتىڭ تومەنگى ۇشتەن بىرىنە اسەر ەتەدى، گيدرونەفروزدى تۋدىرادى (بۇيرەك تامشىسى)؛

4-كەزەڭ: جاڭا ءتۇزىلىس جامباستىڭ سىرتىنا شىققان جانە قۋىقتىڭ نەمەسە تىك ىشەكتىڭ شىرىشتى قابىعىنا اسەر ەتەدى.

جاتىر موينى قاتەرلى ىسىگىن الدىن الۋ جولدارى

جاتىر موينى قاتەرلى ىسىگىنىڭ الدىن الۋ ءۇشىن مىنا كەڭەستەرگە ءمان بەرىڭىز:

جىنىستىق قاتىناسقا ەرتە تۇسپەۋ؛

جىنىستىق سەرىكتەردى ءجيى اۋىستىرماۋ؛

جىنىستىق جولمەن بەرىلەتىن جۇقپالاردىڭ الدىن الۋ ءۇشىن قورعانۋ قۇرالدارىن پايدالانۋ؛

پاپيللوما ۆيرۋسىنا قارسى ۆاكسينا الۋ؛

گينەكولوگقا 6 ايدا ءبىر رەت قارالىپ تۇرۋ.