اۆستريالىق كومپانيا اقمولا وبلىسىندا كەراميكالىق بۇيىمدار شىعاراتىن زاۋىت سالماق
اقمولا وبلىسى اكىمدىگى باسپا ءسوز قىزمەتىنىڭ مالىمەتىنشە، كومپانيا وكىلدەرىنىڭ ءوڭىر باسشىسىمەن كەزدەسۋىندە ەكىجاقتى ىنتىماقتاستىقتى دامىتۋ پەرسپەكتيۆالارى تالقىلاندى.
«ءبىزدىڭ ونەركاسىپتىك الەۋەتىمىز جوعارى، بۇگىندە ءبىز مويىنتىرەكتەردىڭ ءجۇز پايىزعا جۋىعىن، ءاربىر ەكىنشى استىق جينايتىن كومبايندى، ءۇشىنشى ك گ التىندى، ءۇشىنشى كىرپىشتى، ءاربىر جەتىنشى توننا ۋراندى شىعارامىز. ءبىز الەمنىڭ 90 ەلىمەن ىنتىماقتاسامىز. ءبىز اۆستريامەن جۇمىس ىستەيمىز. بەس ايدىڭ ىشىندە سىرتقى ساۋدا اينالىمى شامامەن 5 ميلليون ا ق ش دوللارىنا جەتتى. ءبىزدىڭ ءوزارا ءىس - قيمىلىمىزدىڭ الەۋەتى زور دەپ سانايمىن»، - دەدى ءوڭىر باسشىسى.
وسى رەتتە، ايماق باسشىسى ەرمەك مارجىقپايەۆ وبلىستىق ينۆەستيتسيالىق جوبالاردى ىسكە اسىرۋ ءۇشىن بارلىق ماسەلەنى تالقىلاۋعا دايىن ەكەنىن اتاپ ءوتتى. ال «Lasselsberger Group» حالىقارالىق كورپوراتسياسىنىڭ وكىلدەرى اۋداننىڭ دا، وبلىستىڭ دا ەكونوميكاسىن دامىتۋعا ودان ءارى مۋلتيپليكاتيۆتى اسەر ەتەتىن كەراميكالىق بۇيىمدار شىعاراتىن زاۋىت سالۋعا نيەتتى ەكەنىن ايتتى.
«ءبىز ءۇشىن ەڭ باستىسى - كەراميكا ءبۇيىمدارىن شىعاراتىن ءوندىرىستى اشۋ. ەڭ باستىسى - شيكىزاتتى تابۋ. ءبىز ساپاسىز ءونىم شىعاراتىن كومپانيا ەمەسپىز. بىزدە بۇكىل الەم بويىنشا 90 نان استام زاۋىت بار. ءبىز ءۇش باعىتتا جۇمىس ىستەيمىز: قاعاز ونىمدەرىنە، كەراميكاعا، شىنىعا ارنالعان مينەرالدار شىعارامىز. ەكىنشى باعىت - كەراميكا ءوندىرىسى، ال ءۇشىنشى باعىت - قۇرىلىس ماتەريالدارى. ءبىز تسەمەنت، قۇرعاق قۇرىلىس قوسپالارى، جەلىم جانە باسقالارىن شىعارامىز، ول عيماراتتىڭ ىشىندە دە، سىرتىندا دا بەزەندىرۋ ءۇشىن قاجەت»، - دەپ اتاپ ءوتتى كومپانيا يەسى يوزەف لاسسەلسبەرگەر.
«Lasselsberger Group» - الەمنىڭ 17 ەلىندە 67 وندىرىستىك كاسىپورنى بار جانە شيكىزات، قۇرىلىس ماتەريالدارى مەن كەراميكالىق بۇيىمدار ءوندىرۋ بويىنشا ەۋروپاداعى جەتەكشى كومپانيالاردىڭ ءبىرى.
«مۇنداي جوبالار ءبىزدىڭ وبلىسىمىز ءۇشىن وتە ماڭىزدى. ءوز تاراپىمىزدان ءبىز بارلىق ماسەلە بويىنشا بارىنشا قولداۋ كورسەتۋگە ءارقاشان دايىنبىز. مۇنداي كەزدەسۋلەردى وتكىزۋ ءوزارا ءتيىمدى ىنتىماقتاستىقتى نىعايتاتىنىنا سەنىمدىمىن»، - دەپ قورىتىندىلادى ەرمەك مارجىقپايەۆ.
ايتا كەتسەك، بۇدان بۇرىن ساندىقتاۋ اۋدانىندا 4 ميلليارد تەڭگەنىڭ ينۆەستيتسيالىق جوبالارى جۇزەگە اسىپ جاتقانىن جازعان ەدىك.
