اقكەنتتەگى ءورت كەزىندە ادامداردى قۇتقارعان ازاماتتار پرەزيدەنت اتىنان ماراپاتتالدى - فوتو

الماتى. قازاقپارات - الماتى اكىمى ەربولات دوسايەۆ مەملەكەت باسشىسى قاسىم-جومارت توقايەۆتىڭ اتىنان «اقكەنت» شاعىن اۋدانىنداعى ءورت كەزىندە ادامداردى قۇتقارعان ازاماتتارعا مەملەكەتتىك ناگرادالاردى تابىس ەتتى، دەپ حابارلايدى قازاقپارات ءتىلشىسى.

اتاپ ايتقاندا، توتەنشە جاعدايدا كورسەتكەن ەرلىگى مەن جانقيارلىعى ءۇشىن مەملەكەت باسشىسىنىڭ جارلىعىمەن «ەرلىگى ءۇشىن» مەدالىمەن «Expo Masters» ج ش س مەنەدجەرى تىلەۋجان احمەتحانوۆ، «سپارك ەلەكترومەحانيك» ج ش س ەلەكتريگى گيۋناي شيۋكريۋ، «سپارك ەلەكترومەحانيك» ج ش س ەلەكترومەحانيگى ەلدار يسمايلوۆ، «Gask Construction» ج ش س اۆتوكران وپەراتورى يەردەلەن حاليل، «سپارك ەلەكترومەحانيك» ج ش س ەلەكترومەحانيگى كەنان مامەدوۆ، سونىمەن قاتار «Frank-Asia» ج ك اۆتوكرانىنىڭ وپەراتورى ۆاديم رومانوۆ ماراپاتتالدى.

«بۇل قايعىلى وقيعا حالقىمىزدىڭ باسقالار ءۇشىن قانشالىقتى بەيجاي، جاناشىر جانە تاۋەكەلگە بارۋعا دايىن ەكەنىن كورسەتتى. مەن سول ءبىر تابيعي اپات كۇنى اينالىپ وتپەگەن، ءورت سوندىرۋشىلەرگە كومەكتەسۋگە اسىققان بارلىق جانعا العىسىمدى بىلدىرەمىن. ءدال وسىنداي ادام - جاۋاپتى ازامات، «ادال ازامات» تۋرالى مەملەكەت باسشىسى جاقىندا وتكەن قۇرىلتايدا ايتتى. ءبارىمىز سونداي قامقور ادام بولۋعا تىرىسامىز»، - دەدى ەربولات دوسايەۆ.

سونىمەن بىرگە، قالا اكىمى ءورتتى كاسىبي ءارى جەدەل تۇردە اۋىزدىقتاعان ءورت سوندىرۋشىلەرگە العىسىن ءبىلدىردى.

ەسكە سالا كەتەيىك، 1-تامىز كۇنى 16 قاباتتى ۇيدە ءورت تۇتانعانىن حابارلاعان ەدىك.

قىزىل جالىن ساعات سول كۇنى 18:46 كەزىندە وقشاۋلانىپ، ءسوندىرىلدى.

31 ادام، ونىڭ ىشىندە 16 بالا اۋرۋحاناعا جەتكىزىلگەن بولاتىن. امالى قالماعان تۇرعىندار بالالارىن تەرەزەدەن لاقتىردى. زارداپ شەككەندەردىڭ ىشىندە 2 جۇكتى ايەل بار.